Perdoan a un lucense unha débeda de 90.000 euros grazas á Lei da Segunda Oportunidade

Un veciño de Lugo logrou librar, segundo indica unha sentenza do Xulgado da cidade, dunha débeda de 90.000 euros, na que incorrera con varios bancos debido á súa adicción ao xogo. Esta sentenza está enmarcada dentro da Lei da Segunda Oportunidade.

O demandante supuxo un exemplo esperanzador para moitos afectados pola ludopatía. O afectado foi pedindo préstamos bancarios para poder xogar, aínda que co tempo a súa débeda non deixou de subir, tanto polas novas que ía acumulando como polas anteriores que non podía pagar.

É así como acumulou máis de 90.000 euros a deber, ademais dunha mala situación anímica. Foi enconces, coa axuda da súa familia, que se puxo en contacto coa Asociación de Axuda ao Endebedamento, despois de que os bancos se negasen a saldar a débeda mediante acordos.

A asociación axudou ao home estudando a orixe destas débedas, aconsellándolle tramitar a coñecida como Lei da Segunda Oportunidade, unha lei que permite a un debedor o perdón das débedas sempre que cumpra cos requisitos que esta mesma lei establece: demostrar que non se pode pagar, non ter antecedentes penais socioeconómicos e non haber acollido a ela nos 5 anos anteriores.

Segundo explica Fran Bautista, avogado da Asociación de Axuda ao Endebedamento, "unha vez iniciado o procedemento, o debedor pode empezar a deixar de pagar todas as súas débedas, podendo destinar o total dos seus ingresos a gastos esenciais como comida, transporte, subministracións, mesmo a un pequeno aforro".