E dia di ayera tabata hopi pisa pa e ex-mandatario. Guillfred Besaril ta atendiendo su tata di 81 aña di edad, cu ta confrontando reto pisa cu su salud. Dokternan a dicidi di intern’e den hospital pa mas observacion y pa haci test.
“Mi tabatin un dia largo awe, mi no a volg nada mes y mi ta hopi cansa”, asina Guillfred Besaril a sigura na nos. El a bisa mas leu “Mañan mi mester ta bek na Hospital y e contenido di e dia ki no por a gara mi na un momento mas malo cu esaki”.
No a sigui e reunion di Parlamento
Cu esaki e ex-Minister Plenipotenciario di Gabinete Wever-Croes I y II, a laga sa cu e no a logra scucha nada di e reunion di Parlamento y sinceramente bisa, e no tabatin cabes pa arende ci esey ayera tampoco. Tur atencion tabata pa su tata cu ta malo den hospital.
Besaril e ora no a sigui e reunion den cual tanto Centrale Accountants Dienst (CAD) y Departamento di Recurso Humano (DRH) a presenta tur su fayonan como mandatario den funcion. Ta e prome mandatario cu partido MEP a sacrifica asina, den e periodo di nan gobernacion.
Acusacionnan pisa
E acusacionnan ta basta pisa y facilmente por crisa caminda di ta un investigacion administrativo pa bira uno penal. No tin mucho diferencia den loke a acusa Alan Howell (POR) cu e lista largo cu ta colgando riba cabes di Besaril. Pero esun a keh’e na polis y e otro a dun’e chens pa paga bek. Ta un diferencia di anochi cu di dia, den con trata un parlamentario of un minister plebipotenciario.
Loke CAD a constata:
Guillfred Besaril tabata cumpra cos na Aruba Huis y despues check oferta y of wak si tabata necesario. Pero esey nota tur, contrario ma e ministernan di Aruba, e si tabatin un carchi di banco cu e por swipe unda cu ta. Asina den luna di december 2020, el a swipe 1300 Euro na Divi Village Aruba sin cu e tabatin permiso y no tabatin biahe pa trabou! Reaccion Besaril: Mester trata mi igual cu GevMin na Washington
Un biaha el a bin vakantie na Aruba pa pasa fin di aña y diripiente Secretario di Estado di Hulanda a bin Aruba. Mesora el a converti henter su vakantie den un dienst reis. Pues el a traha dos dia so pero a haci comosifuera el a traha tur e dianan cu e tabata na Aruba. A haya su vergoeding, pero toch a uza e pinpas pa come y pa yena gasolin, pues ta consider’e dubbel vergoeding, Pa colmo, durante pleno vakantie el a swipe na Ling & Sons y na Super Food siendo el a haya daggeld vergoeding caba, dus no ta cuadra!
Minister gust’un comemento
Lunch & dinner kosten entre 2015 – 2021: E tabata rond di 12 cu 13 mil euro pa aña, pero desde 2017 el a subi te na 22, 26 y 27 mil euro. A compara e ultimo dos GevMin (AVP): Nan si tabatin prueba cu ken a lunch, etc. Reaccion Besaril: Tin cu proteha e hendenan cu el a lunch cu nan. CAD a bisa Besaril: Ora ta uza placa di pueblo, mester duna cuenta!
Gobierno ta paga telefon na Aruba
SETAR: GevMin ta bin Aruba mas o menos dos biaha pa aña, pero tur luna tin rekening di SETAR di yamadanan haci na telefon di Aruba. Postpaid telefon, cable y WIFI. No solamente aki na Aruba, sino na Hulanda tambe e ex-mandatario a dicidi di cumpra cantidad di telefon na aña 2018 (8650 euro) y a bolbe cumpra na 2021 (11 telefon pa 10750 Euro). Aruba Huis tin solamente 23 trahado. Ningun trahado a entrega e telefonnan cumpra na 2018 ora cu a ricibi telefon nobo y caro na 2021. A constata cu GevMin tin tres celular p’e so!
E ta trata su casa HOPI bon
E investigacion a conduci na descubri cu ex-Minister Besaril tabata huur auto durante cu e ta cu vakantie na Aruba. Comosifuera poco, e ta upgrade su pasashi pa “Business Class” p’e mes y pa su casa. Ora a gar’e, el a paga esun di e casa bek. Pero pa duna su señora un trato “Real”, e ta pasa cu ne via e VIP Room na Schiphol. Pues e GevMin, su casa y su famia ta uz’e, siendo cu e ta un costo separa cu Gobierno di Aruba mester paga pa casa uzo. Ora GevMin bin vakantie Aruba tambe ta uz’e! Reaccion GevMin: Den pasado otronan tambe tabata uza VIP room ora di vakantie.
Total Cleaning ta haci su cas limpi p’e na Aruba
Entre e gastonan cu a bin descubri na Aruba Huis ta cu e compania priva Total Cleaning Aruba ta haci limpiesa na su cas. Ningun minister, ni na Aruba, tin e previlegio aki.
Aruba Huis a cumpra cama di baby
A bin descubri cu for di placa di pueblo, via Aruba Huis, tabata cumpra muebels pa su cas. Pa cuminsa, e mes a scoge su cas pa huur sin pasa e ruta legal. No tabtin mas opcion, el a bay na un cas den un bario caro y prestigioso y cla. Y colmo di tur colmos, aña pasa ora nan baby a nace, Aruba Huis a cumpra tur muebles pa e baby. Tambe a constata cu Gobierno di Aruba tabata paga tur ziektenkosten pa e casa di GevMin.
Biba bon riba custia di pueblo
GevMin no a haya e cas cu Gobierno di Aruba tin na Hulanda adecua p’e biba aden. Ta a penas na 2012 a renoba e cas pa casi 200 mil euro. E GevMin prome (AVP) si a biba aden. Segun GevMin: “DOW a conseha mi pa bende e woning”. GevMin kier un cas mas grandi. Segun DOW: Ningun rato a conseha GevMin pa bende e cas. DOW a conseha: Si no ta uza e cas pa biba aden, bende e cas y uza e placa como start capital pa renoba Aruba Huis. (GevMin a gaña)
Ironia ta cu GevMin mes a busca e cas y e mes a firm’e. Niun hende a revisa e contract, ni hurista ni e director. El a laga instala camara di siguridad sin pidi oferta. Pa colmo e compania cu a instala camara na cas, ta e mesun unda cu a cumpra telefon na 2018 pa Aruba Huis. Y aunke el a drenta e cas na 2018, ya na 2020, memey di pandemia ora cu tur hende mester a hala faha mara, el a renoba e cas cu e ta huur pa 21 mil euro. Pero segun contract, ta e huurdo mester a renoba y no placa di Gobierno di Aruba. A uza placa pa haci landscaping na e cas cu nos ta huur, siendo cu ta doño di cas lo mester a core cu e gasto ey. Awo GevMin a lanta bin Aruba bay laga tur e placa di mata, yerba cu flor pa otro gosa di dje!
Mal maneho den Aruba Huis
E departamentonan cu a conduci e investigacion den Aruba Huis a constata cu tin masha mal maneho eyden. Ambiente di trabou toxico, no tin training pa e personal, no tin coaching, mientras ch trahadonan ta yega ki ora cu nan kier trabou, ningun hende ta controla. Y pio ainda, a permiti diferente eilandjes politiek eyden cu ningun hende por bisa nan nada pasobra nan ta yama minister direct.
Cinco aña Minister Plenipotenciario
Diamars dia 21 di september 2021, Conseho di Minister a ratifica nombracion di dia 20 di november 2017 di Guilfred Besaril como Minister Plenipotenciario, staciona na Den Haag, Hulanda. El a reemplasa Juan David Yrausquin, cu a tuma e funcion over despues cu Alfonso Boekhoudt a tuma retiro pa bira Gobernador di Aruba. Besaril a sinta henter e prome gabinete, te ora cu el a cay seis luna prome cu tempo.
A start gabinete Wever-Croes II forma e biaha aki entre MEP y Raiz cu apenas 11 asiento y atrobe Besaril a acepta dicho funcion na Hulanda. Pero, ata algun luna despues di a sigui den funcion, e mes a sali anuncia su retiro pa motibo personal.
Besaril a retira pa motibo di placa pa yiu
Guilfred Besaril a sigura den pasado cu e no tin problema cu Partido MEP ni cu Gabinete Wever-Croes II, sino simplemente un discusion cu DRH relaciona cu placa pa yiu, ta haci un diferencia grandi den su entrada. Esey banda di un realidad cu a subestima e trabou cu un baby ta trece cu ne. Ora combina e rol di tata di un baby cu e funcion di minister plenipotenciario, ta pone cu e peso ta inmanehabel. Cu e realidad ey riba mesa, el a opta pa tuma su retiro y busca direccion bek pa Aruba.
Tocante Guillfred Besaril
Guillfred Besaril, cu originalmente ta un polis, a drenta sindicalismo y desde aña 2013 ta milita riba lista di MEP pa cual el a drenta Parlamento. Den su prome eleccion el a logra 833 voto, den eleccion 2017, su votonan a baha na 508 (-39%) y den eleccion na juni 2021 a logra solamente 203 (-60%) voto individual. Cu si e tin intencion di sigui den politica, no ta conoci. Pero cu e resultado aki riba mesa, ta nota cu desde su lansamento na 2013, ta atras so el a keda bay den cada eleccion.
