Durante e periodo di 6 i 7 di sèptèmber último, sra. Pauletta, miembro di Parlamento a bishitá reunionnan di Parlatino, pa duna un bos na e interes nan di Kòrsou den parlamentonan di Latino Amérika i Karibe.
Durante e reunionnan aki a sali diferente punto di atenshon, ku señora Pauletta a resumí den un relato kòrtiku dirigí pa presidente di Parlamento.
E reunionnan a enfoká riba e foro di G20, ku tin pais Argentina komo presidente. I tambe e nesesidat di protehá siudadanonan su privasidat i seguridat riba retnan sosial. Algun punto di atenshon ku señora Pauletta lo traha riba dje den e próksimo temporada a base di su bishita na Parlatino:
- Evaluá e pensamentu di un presupuesto partispativo enkonhunto ku parlamento.
- Keda pendiente di e kumbre di G20, fechá 30 di novèmber pa 1 desèmber 2018. Trese esaki komo posibel punto di atenshon den komishon Interparlamentario, Relashon den Reino i Asuntunan di Eksterior (IPKO).
- Invitá Minister di Finansas na Parlamento pa un splikashon mas profundo di e kumplimentu ku e akuerdonan di OECD i G20, a base di e ‘deadline’ nan.
- Inkorporá ‘gender equality’ den proyektonan di lei aktual i den futuro.
- Trata e tema di protekshon i seguridat di siudadano nan den retnan sosial, den un reunion konhunto di komishonnan fiho.
- Sigui fortifiká SDG’s den Parlamento.
- Evaluá e partisipashon di Kòrsou den e diferente foro nan internashonal.
Señora Pauletta ta di opinion ku mester salvaguardá e kontinuidat di e trabounan di Parlamento di Kòrsou na Parlamento di Latinoamerikano i Karibense, i ta spera ku e relatonan komo representante di Kòrsou, por ta di balor agregá pa futuro parlamentario nan, ademas di esun nan aktual.
