ຂປລ
ຂປລ. ໃນວັນທີ 7 ທັນວາ 20 16 ນີ້ ທີ່ສໍານັກງານໃຫຍ່ ຂອງ ຂ່າວສານຫວຽດນາມ, ນະຄອນ ຫລວງຮ່າໂນ້ຍ ສສ.ຫວຽດນາມ, ທ່ານ ສູນທອນ ຄັນທະວົງ ອໍານວຍ ການໃຫຍ່ ສໍານັກຂ່າວສານປະເທດ ລາວ
ຂປລ. ໃນວັນທີ 7 ທັນວາ 2016 ນີ້ ທີ່ສໍານັກງານໃຫຍ່ ຂອງຂ່າວສານຫວຽດນາມ, ນະຄອນຫລວງຮ່າໂນ້ຍ ສສ.ຫວຽດນາມ, ທ່ານ ສູນທອນ ຄັນທະວົງ ອໍານວຍການໃຫຍ່ ສໍານັກຂ່າວສານປະເທດລາວ ໄດ້ນໍາພາຄະນະຢ້ຽມຢາມ ແລະ ເຮັດວຽກຢູ່ ສສ.ຫວຽດນາມລະຫວ່າງວັນທີ 6-11 ທັນວາ 2016 ໂດຍໄດ້ຮັບການຕ້ອນຮັບຢ່າງອົບອຸ່ນຈາກ ທ່ານ ຫງວຽນ ດຶກ ເລີ້ຍ ຜູ້ອໍານວຍການໃຫຍ່ ສໍານັກຂ່າວສານຫວຽດນາມພ້ອມຄະນະ.
ໃນໂອກາດພົບປະສອງຝ່າຍ ລະຫວ່າງ ສໍານັກຂ່າວສານປະເທດລາວ-ຫວຽດນາມກໍມີການ ແລກປ່ຽນຄວາມຄິດຄວາມເຫັນ, ຕີລາຄາ ແລະ ທົບທວນຄືນໝາກຜົນຂອງການຈັດຕັ້ງປະຕິບັດ ໃນຂອບການຮ່ວມມືທີ່ໄດ້ມີການຕົກລົງກັນ ໃນປີ 2016-2020 ພ້ອມເຫັນດີເປັນເອກະພາບ ຈະສືບຕໍ່ຜັນຂະຫຍາຍວຽກງານບາງດ້ານ, ປຶກສາຫາລືມາດຕະຖານ ໃນການເສີມສ້າງຄວາມເຂັ້ມແຂງ ດ້ານເຕັກນິກ-ວິຊາການພາຍໃນປີ 2017, ຈະຊ່ວຍຕິດຕັ້ງເຄືອຂ່າຍອິນເຕີເນັດ, ປັບປຸງວຽກງານເວບໄຊ, ສ້າງບຸກຄະລາກອນ ແລະ ອື່ນໆ.
ທ່ານ ສູນທອນ ຄັນທະວົງ ອໍານວຍການໃຫຍ່ ສໍານັກຂ່າວສານປະເທດລາວ ໄດ້ສະແດງຄວາມຊົມເຊີຍ ແລະ ຂອບໃຈ ຕໍ່ ທ່ານ ຫງວຽນ ດຶກ ເລີ້ຍ ຜູ້ອໍານວຍການໃຫຍ່ ສໍານັກຂ່າວສານຫວຽດນາມ ທີ່ໄດ້ໃຫ້ກຽດຕ້ອນຮັບຢ່າງອົບອຸ່ນ ແລະ ເອື້ອອໍານວຍຄວາມສະດວກຕ່າງໆ ໃນການເດີນທາງຢ້ຽມຢາມຄັ້ງນີ້ ເຊິ່ງ ທ່ານໄດ້ກ່າວວ່າ ເລີ່ມຈາກສາຍພົວພັນ ມິດຕະພາບອັນເປັນມູນເຊື້ອ, ຄວາມສາມັກຄີພິເສດ ແລະ ການຮ່ວມມື ຮອບດ້ານ ລະຫວ່າງ ສອງພັກ – ສອງລັດຖະບານ ແລະ ປະຊາຊົນສອງຊາດ ລາວ-ຫວຽດນາມໃຫ້ແໜ້ນແຟ້ນຍິ່ງໆຂຶ້ນ ໂດຍສະເພາະການເສີມຂະຫຍາຍ ສາຍພົວພັນການຮ່ວມມື ລະຫວ່າງ ສຳນັກຂ່າວສານປະເທດລາວ ແລະ ສຳນັກຂ່າວສານຫວຽດນາມ ທ່າມກາງສະພາບການໃໝ່ ແຫ່ງການຮ່ວມມື ຂອງສອງສຳນັກຂ່າວສານ ແລະ ການຂະຫຍາຍຕົວ ຂອງລະບົບສື່ສານມວນຊົນ ທ່ີມີຫລາຍຮູບຫລາຍສີ. ບົນພື້ນຖານ ການສະຫລຸບ ແລະ ຕີລາຄາຄືນ ການຈັດຕັ້ງປະຕິບັດ ອະນຸສັນຍາການຮ່ວມມື ດ້ານວິຊາການ ແລະ ແລກປ່ຽນຂໍ້ມູນຂ່າວສານ ລະຫວ່າງ ສຳນັກຂ່າວສານປະເທດລາວ ແລະ ສໍານັກຂ່າວສານຫວຽດນາມ ໃນຊຸມປີຜ່ານມາທ່ີໄດ້ລົງນາມ ຢູ່ນະຄອນຫລວງຮ່າໂນ້ຍ ແລະ ອີງໃສ່ຜົນຂອງການຮ່ວມມື ດ້ານວິຊາການ ແລະ ຄວາມອາດສາມາດ ທັງສອງຝ່າຍ ໄດ້ເຫັນດີສືບຕໍ່ເພີ່ມທະວີການຮ່ວມມື ແລະ ຊ່ວຍເຫລືອ ເຊິ່ງກັນ ແລະ ກັນ ຢ່າງຮອບດ້ານເຖິງປັດຈຸບັນນີ້ ເພື່ອຍົກສູງຄຸນນະພາບຂອງວຽກງານ ໂດຍສະເພາະຄຸນນະພາບຂ່າວ, ຮູບພາບ, ສະໜອງຜະລິດຕະພັນ, ແລກປ່ຽນບົດຮຽນດ້ານການກໍ່ສ້າງ-ບຳລຸງພະນັກງານ, ສ້າງພື້ນຖານວັດຖຸເຕັກນິກ, ຊ່ວຍເຫລືອນັກຂ່າວເຊິ່ງກັນ ແລະ ກັນໃນການເຄື່ອນໄຫວ ວິຊາການ, ແລກປ່ຽນຄະນະຜູ້ແທນຂັ້ນສູງ ແລະ ນັກຂ່າວ ເພື່ອຈຸດປະສົງຊຸກຍູ້ການຮ່ວມມື ລະຫວ່າງ ສອງສຳນັກ ໄປຄຽງຄູ່ກັບເພີ່ມທະວີ ຍົກສູງພາລະບົດບາດ ແລະ ໜ້າທ່ີ ຂອງສໍານັກຂ່າວສານໃຫ້ດີຂຶ້ນເປັນກ້າວໆ ໃນປັດຈຸບັນ ແລະ ອະນາຄົດ.
ໃນໂອກາດດັ່ງກ່າວນີ້ ທ່ານ ຫງວຽນ ດຶກ ເລີ້ຍ ຜູ້ອໍານວຍການໃຫຍ່ ສໍານັກຂ່າວສານຫວຽດນາມ ຢືນຢັນ ພ້ອມຈະສືບຕໍ່ ໃຫ້ການຊ່ວຍເຫລືອປັບປຸງເວບໄຊ, ຝຶກອົບຮົມພະນັກງານ ແລະ ບັນຫາອື່ນໆທີ່ກ່ຽວຂ້ອງ.
KPL
