¡Qué guapo ye Nava! Un guapu percorríu pasando pel Oroxu y Cuervos

La Era (Piloñeta) - La Fuente (Piloñeta) - Molín de Pra - P.R.AS-198. "RUTA DE LA RIBERA DEL RIO PEÑA" - Les Mesties - La Cipresta - La Cabañuca - Ponte'l Bayu - Camín a Grátila - Esvíu izquierda a Pista Grátila/Campanal - Ponte La Cardosa - Camin/senderu per viesca Les Milanes (castañéu y robléu) a Traveséu - Traveséu - Capiella Santu Tomás -Enllace col camín que vien de La Pontona - LLaméu - Casa La LLinariega (L'Artosa) - Xerrina Oroxu (Sierra Vieya) - Picu Oroxu - Colláu La Campa, Oroxu o Melendreros - Mayáu LLames LLagar - Les Praeres - Picu Cuervos - Pista Les Praeres/Pra - Molín de Pra - La H.uente (Piloñeta) - La Era (Piloñeta).

Una prestosa escursión pelos alredores de Peñamayor subiendo a dos piquinos nun mui visitaos pero que, sobre too ún d'ellos l'Oroxu, ponen delantre los nuesos güeyos una amplia y guapa panorámica. Son namás que 935 m d'altura pero les vistes del Aramo, Les Ubiñes, montes d'Ayer y LLaviana, la vecina Peñamayor, montes de Piloña, Ponga, Picos,... pueblos de Nava y dende esti municipiu a Uviéu tol valle central d'Asturies: Sieru, Sariegu, Noreña,...
Per otru llau ye un placer palos que mos gusta'l monte recorrer esta xerrina d'oeste a este culminando cola fácil ascensión a esti picu qu'en Nava casi tola xente llama Caseta'l guardia.
Al picu Cuervos, pese a que ta al llau de Les Praeres y pasare milenta veces a la so vera, yera la segunda vez que subía y los cinco minutos que se pue tardar en llegar a la so cume tamién paga la pena ascender. Nun ye tan vistosu como l'anterior pero déxanos una visión distinta de Les Praeres, La Varallonga, Peñamayor, l'Oroxu,...
El percorrríu nun tien dificultá. Si a casu hai unos cincuenta metros nel km 9, aniciu de la xerrina del Oroxu, nos que pola cantidá de maleza cuesta un poco caminar y ye fácil perder el senderu buenu. ¡Hai que poner procuru nesti llugar!

Esti track y les informaciones son consideraciones propies.
Debe tenese en cuenta que les siendes y caminos, col pasu del tiempo, cambien y xeneralmente empeoren pol aumentu de broza y maleza. La perda y zarru de caminos ye dalgo que tolos qu’andamos pel monte conocemos bien.
Pensamos que la mejor manera de hacer una ruta que desconocemos ye estudiar varios track y elexir los más recientes. Si puede ser más de uno y que se asemeyen.
Les condiciones meteorolóxiques, la borrina por exemplu, siempre deben tenese en cuenta.
Tamién ye perimportante la preparación física y téunica de la xente que realice el percorríu.
La nuesa intención ye ayudar a facer una ruta que a nós mos prestó. Nun garantizamos que’l camín que suxerimos seya la meyor opción. Por todo ello nun mos facemos responsables de fechos que puedan ocasionar dalgún accidente o trestornu

(Anque toes son de la ruta, munches de les semeyes nun se correspuenden colos llugares de los waypoints).