Notes de la versión AOO 4.0 (Asturianu)

Translations available for: Asturianu (ast) | Bulgarian (bg) | Deutsch (de) | Ελληνικά (el) | Español (es) | Galego (gl) | Italiano (it) | Nederlands (nl) | Русский (ru) | 简体中文 (zh-CN) | 正體中文 (zh-TW)

Cuestiones xenerales

Apache OpenOffice 4.0 yá ta disponible pa descargar dende la páxina oficial de descarga.  Basándose nel gran éxitu de la versión OpenOffice 3.4, que tuvo más de 57 millones de descargues, esti anovamientu principal vien con prestoses carauterístiques nueves, ameyoramientos ya igües d'errores.    OpenOffice 4.0 presenta una innovadora interfaz d'usuariu nueva como la Barra llateral,  más encontu de llingua pa 22 idiomes (incluyendo 3 nueves llingües), 500 correiciones de fallos, meyor interoperabilidá en Microsoft Office, meyores nos dibuxos/gráficos, un meyor rindimientu, etc.  Pue lleer sobre esto con más detalle más alantre nestes Notes de la versión.

Otra cosa más que verá de mou immediatu, nesta páxina, na nuesa web y n'otros llugares, ye'l nuevu logotipu.  El nuevu logo ye'l resultáu de munchos ciclos de diseñu, la collaboración ente diseñadores con talentu y un concursu nel que se calificaron 40 logos por más de 50,000 usuarios.

Queremos dar un "hola" especial a los usuarios qu'anueven.  Esperamos que-yos gusten les nueves carauterístiques, especialmente la interfaz de Barra llateral.  Esta función ta basada en códigu apurríu por IBM, del so productu Lotus Symphony.  Adaptamos esi códigu, y basandonos en delles rondes de comentarios d'usuarios como vusté, ameyorámoslu ya integrámoslu n'OpenOffice.

Y los nuevos usuarios, ¡bienllegaos a la comunidá!  Esperamos qu'esfruten usando Apache OpenOffice, el paquete líder d'aplicaciones de productividá d'oficina llibre y abiertu.

Como de vezu, prestanos que faiga comentarios:

• Les entrugues d'encontu ye meyor empobinales a los nuesos foros de sofitu comunitariu.
• Los informes d'errores (non les entrugues de sofitu) han dir al nuesu sistema de siguimientu de problemes Bugzilla.
• Les cuestiones xenerales puen unviase tamién a la llista de corréu d'usuarios pública.

Tamién pue alcontranos en Twitter, Facebook y Google+.

Códigu abiertu de la comunidá

N'Apache trabayamos de mou tresparente como una comunidá abierta de voluntarios.  Desendolcamos software de códigu abiertu pa beneficiu públicu.  Nun vamos pidi-y contribuciones económiques.   Pero si tien interés en xunise a nós, p'ayudanos a facer la siguiente gran versión d'OpenOffice, queremos saber de vusté.  Nun somos sólo programadores, sinón una comunidá de probadores, diseñadores de la interfaz, diseñadores web, escritores téunicos, espertos n'accesibilidá, traductores, espertos en medios sociales, etc.    Son bienveníos los voluntarios en toles árees.   Pue alcontrar más información na páxina Get Involved.

Nueves carauterístiques y ameyoramientos

Nueva Barra llateral

La Barra llateral ye una nueva carauterística principal de la interfaz d'usuariu en toles aplicaciones d'OpenOffice.
aplicaciones
La Barra llateral fai meyor usu de les pantalles anches actuales que les barres de ferramientes tradicionales. El panel 'Propiedaes' ye sensible al contestu y amuesa paneles coles propiedaes del documentu que s'usen con más frecuencia na xera d'edición en cursu.

Calque nes imaxes pa una vista con más detalle:

Captures de pantalla de Writer con contestos pa testu, mapa de bits, y formes (d'izquierda a drecha). El nuevu logo d'OpenOffice apegóse como mapa de bits (centru) y como contornos editables (drecha).

Si descubre que de vezu nun usa un determináu panel, faiga click nel títulu y se colapsará a sólo una llinia de testu. Un pequeñu + o - a la izquierda del títulu del panel indica si'l panel ta colapsáu o espandíu.

Diferentes paneles espandíos o colapsaos

• Once paneles de propiedaes migraronse dende IBM Lotus Symphony: Alliniación, Área, Aspeutu de caxella, Gráficu, Llinia, Formatu de númberu, Páxina, Párrafu, Posición y tamañu, Testu y Axuste.
• Siete paneles vienen del antiguu panel de ferramientes d'Impress: Disponible pa usar, Animación personalizada, Diseños, Usaos recientemente, Transición de diapositiva, Diseñu de tabla, Usao nesta presentación.
• Cuatro son diálogos non-modales (que nun bloquien): Funciones, Galería, Navegador, Estilos y Formatu.
• Unu ye nuevu: Inxertar.

Paneles de Symphony, l'antiguu panel de xeres d'Impress, diálogos d'OpenOffice (d'izquierda a drecha).

L'anchu de la Barra llateral pue axustase. Los controles adauten el so tamañu acordies. Si necesita más espaciu pue sacase del panel — y posiblemente movese a un segundu monitor — o pue reducise a una barra de llingüetes delgada. Con un simple click nun iconu volverá la barra llateral.

Distintos anchos de la barra llateral: anchu máximu, anchu predetermináu, demasiao estrechu pa ver el conteníu, colapsáu como barra de llingüetes (d'izquierda a drecha).

Barra llateral flotante, pue movese a una segunda pantalla

Por supuestu, nun puen representase toles funciones d'OpenOffice con controles na Barra llateral. Si necesita una función avanzada sólo faiga click nel botón "más opciones" de la barra del títulu d'un panel p'abrir un diálogu con munches más opciones y propiedaes.

Faiga click en 'más opciones' pa ver, eso, más opciones.

Pue alcontrar más información na wiki d'OpenOffice.

Ameyoramientos na interoperabilidá

L'ameyoramientu de la fidelidá ya interoperabilidá ye un oxetivu continuu pa Apache OpenOffice. Y hai munchos ameyoramientos incluíos na nueva versión. Esti ye un resume d'algunos de los principales ameyoramientos na fidelidá dende'l llanzamientu d'Apache OpenOffice 3.4.1, incluyendo carauterístiques, ameyoramientos y correiciones d'errores.

Documentos de testu

Documentos de presentación

Documentos de fueya de cálculu

OOXML xeneral

Enantamientos en DrawObject

Nueva Paleta de color

La Paleta de color ta ameyorada y enantada con una esbilla de más colores útiles, dispuestos d'una nueva manera pa facer más fácil alcontrar colores.

La nueva Paleta ye un entemez de la Paleta de Lotus Symphony combinada colos colores orixinales más útiles.

Nuevos dilíos

Los Dilíos tan ameyoraos y enantaos con otros nuevos, más útiles, tomaos principalmente de Lotus Symphony. Los antiguos conservense, pero treslladaos al final de la llista (nun tan na imaxe). Estos dilíos crean rellenos muncho más guapos pa usos como fondos de diapositives.

Nuevos temes y ameyoramientos de la Galería

Temes de la Galería amestaos dende Symphony.

• Fleches
• Viñetes (estendíes)
• Ordenadores
• Diagrames
• Entornu
• Finances
• Xente
• Escuela y Universidá
• Símbolos
• Formes de testu
• Tresporte

Ameyoramientos na Galería esistente

• Los temes antiguos caltienense y dacuando enantense
• La Galería agora pue guardar y usar gráficos SVG
• Munchos gráficos nuevos agora tan en formatu SVG, lo qu'aforra espaciu nel ordenador y da al usuariu el formatu vectorial de la mayor calidá
• Capacidá p'amestar gráficos en formatu SVG y Metaficheru
• Agora pue orientase n'horizontal o vertical adautando'l diseñu automáticamente
• Agora ta disponible en cualquier momentu na nueva Barra llateral

Refinada la interfaz d'usuariu de los tiradores de seleición

• Los tiradores de seleición rediseñaronse pa ser más distinguibles.
• Amestóse tresparencia pa dar un pequeñu 'gabitu' cuando los tiradores cubren daqué, pero sólo pal rellenu del tirador (non los contornos) pa nun facelos difíciles de ver cuando se necesiten.
• El diseñu redondióse llixeramente.
• Los colores camudaron una migaya pa una meyor identificación (principalmente cuando tan seleicionaos los tiradores).
• Al movese col tecláu pelos tiradores (CTRL-TAB) los tiradores mariellos que s'usen pa les formes personalizaes agora son intermitentes como los otros tiradores pa ver correutamente'l tirador activu.

Visualización refinada de la seleición

• En munches ocasiones la seleición d'oxetos o d'oxetos múltiples ameyoróse usando'l color de seleición del sistema.
• L'usu y captura d'esi color de seleición del sistema unificóse pa garantizalu pa toles seleiciones en tolos sistemes.
• Amestóse una pequeña intermitencia pa identificar los oxetos onde pue amestase testu principiando a escribir o calcando retornu.

Esto usase'n varios llugares como; Oxetos nel mou d'edición de testu, resaltáu d'oxetos como destín p'Abasnar y asitiar o tresformación d'oxetos (enantes usabense llinies de rayes blanques y prietes).

Meyor vista previa d'impresión

La vista previa d'impresión del diálogu Imprentar agora ta completamente antiescalonada. La versión anterior nun yera asina, y les llinies podíen desapaecer o tener partes perdíes.

Conversión enantada a gráficos de mapa de bits

La conversión a gráficos de mapa de bits ameyoró enforma pa toles clases d'oxetos de dibuxu, incluyendo gráfiques OLE y otros. Esto nun namái ye util pa convertir internamente oxetos en mapes de bits, sinón que tamién s'usa nes esportaciones que necesiten bitmaps, y nel cartafueyu del sistema. Funciona con oxetos simples igual que con seleiciones múltiples. Les tresparencies del oxetu y l'antiescalonáu nos bordes agora son perfectos.

Tipu de rellenu 'Bitmap' ameyoráu

Tolos oxetos de dibuxu que puen tener un rellenu de mapa de bits agora puen aprovechase del nuevu y mui enantáu tipu de rellenu de mapa de bits:

• El nuevu tipu de rellenu de mapa de bits caltién la tresparencia, la versión antigua nun podía facelo y amestaba siempres un fondu blancu.
• Permite usar gráficos vectoriales que siguen siendo gráficos vectoriales cuando se procesen (especialmente útil en p.ex. impresión, PDF y otres esportaciones).
• Tien sofitu pa SVG y Metaficheru como datos de rellenu, yá nun ta llendáu a datos de mapa de bits.
• Les preferencies de Mosaicu, Axuste automáticu, Tamañu, Posición y Desplazamientu tienen sofitu completu (nel diálogu Área).
• Agora permitense los GIF's animaos como tipos de rellenu.

Exemplos d'esto incluyen:

1. Crear automáticamente un rellenu independiente de la escala dibuxando cualquier cosa en cualquier momentu usando oxetos de dibuxu
   1. convertilu a Metaficheru
   2. crear un estilu de rellenu basáu nél
2. Usar un SVG o importar un formatu vectorial (WMF) pa definir un nuevu estilu de rellenu.

Piense nes posibilidaes pa rellenar los fondos de les páxines, barres de diagrames y otros elementos. Esto s'usará como datos vectoriales al imprentar o al esportar a PDF.

Copiar/Apegar enantáu

Toles aplicaciones agora sofiten versiones tresparentes y anti-escalonáes de, por exemplu, oxetos de dibuxu de la seleición pa intercambiar con aplicaciones esternes. Esti ye'l resultáu de la conversión enantada a mapa de bits y d'amestar el formatu de gráficos PNG a los formatos sofitaos nel cartafueyu.

Los oxetos non gráficos conviertense baxo demanda, y los oxetos gráficos copiense con tresparencia completa y sofitu pal anti-escalonáu.

Agora ye posible Copiar/Apegar cualquier oxetu a una aplicación esterna de PixelGraphic, camudalu como faiga falta, y volver a copialu a cualquier aplicación d'OpenOffice ensin perda de calidá. Esto permite una edición fácil y completa d'imaxes fuera d'Office cola ferramienta que prefiera y les capacidaes que necesite.

Abasnar y asitiar enantáu

Abasnar y asitiar ameyoróse con un mou 'internu'. Agora ye posible abasnar y asitiar cualquier cosa 'dientro' d'un oxetu de dibuxu esistente pa camudar el so estilu gráficu o de rellenu cuando se calca CTRL+MAYÚS (Ctrl+Cmd en Mac) al abasnar y asitiar.

Como control visual, l'oxetu destín pa abasnar y asitiar representase usando la nueva Visualización de seleición y un únicu punteru del mur.

• Abasnar y asitiar d'una aplicación esterna: camuda l'estilu de rellenu a mapa de bits (incluyendo tresparencia), use p.ex. SVG o metaficheru
• Abasnar y asitiar internu (calque nel oxetu(os), espere un segundu a que camude'l punteru del mur, principie l'abasnáu, calque CTRL+MAYÚS)

• cuando l'orixe ye un oxetu de dibuxu: Los estilos copiense (estilu de llinia, de rellenu, etc.)
• cuando l'orixe ye un oxetu gráficu: L'estilu de rellenu adaptase al conteníu xeométricu del orixe

Esti ye un exemplu:

(a) Dibuxe un oxetu, p.ex. un rectángulu redondiáu con un borde, dibuxe un oxetu de flecha, escueya un estilu de rellenu y llinia pa el.
(b) Si abasna y asitia nel oxetu destín, copia l'estilu de rellenu y de llinia.
(c) Si convierte la flecha a metaficheru (p.ex. usando'l menú de contestu), al abasnar y asitiar nel oxetu destín, rellenase colos datos vectoriales de la flecha.

Esto ye mui afayadizo si necesita definir rápidamente los estilos de rellenu d'un oxetu o quier copiar los estilos gráficos d'un oxetu a otros.

Tamién ye mui útil:

• Pue usar la Galería como espaciu intermediu pa los oxetos de dibuxu o gráficos qu'use con esi envís.
• Pue abasnar y asitiar direutamente d'allí a los oxetos de dibuxu.
• Pue abasnar y asitiar de fontes esternes a los oxetos de dibuxu.

Adaptar el Principiu/Fin de llinia al anchu de llinia

Ye práutico que cuando camude l'anchu de llinia d'un oxetu con puntes de flecha definíes al principiu/fin, les puntes de flecha usaes s'adapten al cambiu d'anchu de llinia; sinón tendría d'adaptales manualmente. Esto yá asocedía en Draw ya Impress. Agora ta unificao y centralizao y funciona en toles aplicaciones d'OpenOffice.

Ameyoramientos na esportación a SVG

Amestaronse dellos ameyoramientos a la esportación SVG pa torgar ciertes perdes de calidá.  Tan planiaes más meyores nesti área pa futures versiones.

Ameyoramientos na división de SVG/Metaficheros

Si s'edita un SVG/metaficheru importáu, ye necesario dividilu n'oxetos de dibuxu.   Esti códigu enantóse nesta versión.  Tan planiaes más meyores nesti área pa futures versiones.

Ameyoramientos na importación de SVG

Ficieronse ameyoramientos y arreglaronse errores nel códigu d'importación de SVG. Gracies a tolos usuarios qu'informaron de problemes y apurrieron documentos de prueba pa SVG.  Si tien un ficheru SVG que se ve distintu de como debería, nun dulde n'axuntalu a un informe de problema nel Bugzilla d'Apache OpenOffice.

El mou de recorte d'imaxe ufre vista previa

Al trabayar nun oxetu gráficu permitese definir una rexón de recorte pal mesmu.  Al usar el mou interactivu pa facelo, la nueva versión amuesa la parte que nun ye visible del gráficu (la parte recortada) como tresparente y la rodea con un borde finu.  D'esta manera yá nun tien qu'aldovinar onde ta la parte recortada o cómo ye de grande.

Esti exemplu amuesa un recorte nun gráficu SVG:

Vista unificada de los diálogos de Paleta de color

Tolos llugares onde apaez un diálogu de Paleta de color (el formulariu onde s'organicen los colores nuna cuadrícula) rediseñaronse pa qu'usen los mesmos tamaños y anchos.  L'anchu (12 columnes) adaptóse a la Paleta de color diseñada de nueves. Pa una imaxe vea 'Nueva Paleta de color'

Sofitu de tresparencia pa los formatos de pixel (PNG)

Al esportar los oxetos de dibuxu seleicionaos a formatos con encontu pa tresparencia, p.ex., PNG, OpenOffice agora usa un fondu tresparente de mou predetermináu. Esto permite un mayor usu de gráficos creaos con otres aplicaciones o usar estes pa más procesáu.

Los conectores sofiten el xiru

Los conectores yá nun desactiven les ferramientes de xiru o deformación cuando tan seleicionaos. Mentanto qu'esto ye un pequeñu beneficiu con conectores únicos, ye mui útil cuando se seleiciona un númberu d'oxetos gráficos y se quier xiralos. Esto pidióse nel Foru de la comunidá d'OpenOffice, porque un usuariu quería xirar 90 graos un dibuxu formáu por oxetos de dibuxu y munchos conectores. Agora esto ye posible ensin l'inconveniente de de-seleicionar tolos conectores.

Vista correuta del estilu de Patrón de rellenu

Al ampliar y amenorgar vistes pequeñes (p.ex. vistes previes de páxina) los oxetos o páxines qu'usen un estilu de patrón de rellenu víense mal porque apaecíen demasiaes llinies nun área pequeña. L'estilu de Patrón de rellenu agora usa una distancia mínima ente llinies pa que se vea bien nes visualizaciones nes Vistes d'edición. Esto tamién asocedía nes versiones antigües d'office, pero perióse nel rediseñu de la visualización.

Meyor encontu de dilíos nos metaficheros

Los dilíos de los metaficheros xirense y deformense (inclinación) xunto col metaficheru y d'esta manera comportense de mou asemeyáu a los gráficos de mapa de bits. Los colores de principiu y fin agora incluyense nesos dilíos. Esti ameyoramientu faise visible si usa un pequeñu númberu de pasos de dilíu. Tolos dilíos agora agora apaecen nel mou de presentación igual que s'amuesen nel mou d'edición.

Ameyoramientos en Calc y Chart

Sofitu p'altura relativa en gráfiques de tarta:

Nes gráfiques de tarta importaes d'otros formatos, l'atributu altura nun tenía sofitu. Esti amestóse agora y fai que les gráfiques de tarta se paezan más al orixinal.

Nuees funciones

Calc agora tien sofitu pa les funciones de fueya de cálculu:  AVERAGEIFS, COUNTIFS, y SUMIFS.  Estes funciones permiten-y combinar varies condiciones.

Calc agora tien sofitu pa la función XOR. La función completa'l conxuntu yá disponible de funciones Booleanes.

Calc agora tien sofitu pa les funciones LEFTB, RIGHTB, LENB, y MIDB. Estes funciones son versiones especiales pa los llinguaxes DBCS (double byte character set).

La función de Calc RAND reimplementóse pa usar l'algoritmu Mersenne-Twister.

Ameyoramientos nes estensiones

Nueva xestión de la barra de ferramientes

Les estensiones agora usen una nueva xestión de la barra de ferramientes, vea https://issues.apache.org/ooo/show_bug.cgi?id=121577 ; de momentu, les estensiones pa la versión 3.x qu'usen el mecanismu anticuáu tendrán d'anovase pa funcionar con OpenOffice 4.0. Munches estensiones populares, incluyendo los diccionarios, nun tan afeutaes por esti cambiu.

API de menú unificada

La API de menú unificóse, faciendola más clara y amistosa pal usuariu. Les siguientes interfaces quedaron anticuaes y reemplazaronse: css.awt.XMenuExtended, css.awt.XMenuExtended2, css.awt.XMenuBarExtended, css.awt.XPopupMenuExtended. Vea https://issues.apache.org/ooo/show_bug.cgi?id=121542#c2 for details.

Nota: animamos a que los autores d'estensiones que necesiten más información tocante a los cambios anteriores faigan les sos entrugues na nuesa llista de corréu de la API.

Ameyoramientos nel rindimientu

Iguaronse munches perdes de recursos.

Iguaronse munches perdes de recursos, amenorgando los requisitos de memoria y ameyorando la estabilidá de la aplicación.

Aceleración de la representación gráfica

Usense más aceleraciones gráfiques (nos sistemes que les permiten, dependiente del sistema)

• Los mapes de bits con tresparencia pintense direutamente
• Los mapes de bits que se tresformen (xiraos/deformaos/espeyaos) pintense direutamente
• Les llinies con anchu de llinia y/o tresparencia pintense direutamente
• Los datos de xeometría y pixel guardense'n buffer en formatos dependientes del sistema

Por exemplu, esto permite usar mesmo GIFs animaos como estilu de rellenu d'oxetu pa cualquier oxetu y tresformalos en tiempu real (cuando'l sistema lo permite).   Tamién ameyora enforma la xeometría de la visualización demientres la edición (nes vistes d'edición) cuando hai encontu.

Sofitu pa más llingües

Les traducciones nueves disponibles n'Apache OpenOffice 4.0 incluyen:

• Griegu
• Portugués
• Tamil

Les traducciones anovaes incluyen:

• Asturianu
• Checu
• Alemán
• Inglés británicu
• Español
• Finés
• Francés
• Gaélicu escocés
• Gallegu
• Húngaru
• Italianu
• Xaponés
• Coreanu
• Neerlandés
• Portugués brasileñu
• Rusu
• Eslovacu
• Eslovenu
• Chinu simplificáu

Pa la llista completa de llingües y paquetes d'idioma disponibles vea esta páxina de descarga detallada.

Nota: Hai delles traducciones de llingües más en cursu que se lliberarán cuando tean disponibles.  Si'l so idioma nun ta na llista d'arriba, y quier ayudar a traducir la interfaz d'usuariu, son bienveníos toa clase de voluntarios. 

Ferramientes de xestión de calidá enantaes

Nueva infraestructura de pruebes automatizaes

Apache OpenOffice 4.0 tien una nueva infraestructura de pruebes automatizaes basada en JUNIT que fai pruebes nes árees

• BVT (Basic Verification Tests)
• FVT (Functional Verification Tests)
• PVT (Performance Verification Tests)
• SVT (System Verifcation Tests)

Cambios con impactu na compatibilidá con versiones anteriores

Desaniciáu el módulu binfilter

Yá nun se lleerán o escribirán los antiguos ficheros en formatos de StarOffice (ficheros con estensiones .sdw, .sdc, .sdd, etc.).  El desaniciu d'esti códigu fai mas cenciellu de mentener el códigu base d'OpenOffice.  Los formatos antiguos nunca fueron el formatu predetermináu en nenguna versión d'OpenOffice.  S'aconseya que los usuarios que tengan documentos de StarOffice vuelvan a guardalos en formatu ODF (.odt, *.ods, *.odp, etc.) *enantes d'anovar a Apache OpenOffice 4.0. Esto pue facese usando Ficheru - Asistentes - Convertir documentu en OpenOffice 3.x  Los ficheros d'OpenOffice 1.x (*.sxw, *.sxc, *.sxi) inda tienen sofitu.

Anováu el sofitu de Python

PyUNO agora ye compatible col últimu C-Python 3.x pero p'amenorgar l'impactu nes aplicaciones esistentes, caltiénse l'encontu de C-Python 2.x que sigue siendo predetermináu. El Python internu, qu'usen de mou predetermináu nes versiones pa Windows y MacOS-X, anovóse agora cola version 2.7.5 qu'arregla cientos de fallos y tien importantes meyores de rindimientu pero inda ye compatible coles versiones anteriores. Los scripts esistentes puen necesitar axustes menores, pero normalmente siguirán funcionando igual qu'antes.

Encontu pal C++ STL del sistema

La biblioteca de plantíes stlport4 quedó anticuada col informe TR1 del estándar C++ y quedó anticuada y ensin mantenimientu. Apache OpenOffice 4 cambia a la biblioteca de plantíes estándar nativa del sistema, de mou que les estensiones escrites en C++ necesiten recompilase col SDK d'Apache OpenOffice 4.

Igües d'errores

A 17 de xunetu de 2013 había 498 problemes comprobaos que taben resueltos.

Esta llista pue alcontrase equí: VERIFIED or CLOSED

(Una cuenta en OpenOffice Bugzilla permitirá-y guetar los fallos que puedan interesa-y.)

Ficieronse importantes arreglos d'errores nestes árees:

Restauróse'l sofitu pa Java 7, y Java Access Bridge v2.0.3 implementáu en JRE 1.7u6 y posterior. Los usuarios del SO Windows que necesiten sofitu d'accesibilidá pa ferramientes de Teunoloxíes d'asistencia agora puen usar les versiones d'Oracle actuales de Java SE 7 Runtime Environment y la API Java Accessibility en Windows.

L'equipu de Control de calidá ta siguiendo tamién más arreglos. Vea los informes completos en:

http://wiki.services.openoffice.org/wiki/QA/Report/WeeklyReport

Problemes conocíos

• Apache OpenOffice 4.0.0 tará marcáu pol nuevu serviciu Gatekeeper en Mac OS X Mountain Lion. Esta ye una nueva carauterística qu'ayuda a protexese escontra software maliciosu nos sistemes Mac. Hai un procedimientu esplicáu nel enllaz siguiente pa permitir executar aplicaciones nun instalaes dende la Mac App store. Vea l'artículu en Mac support en http://support.apple.com/kb/HT5290.

• Apache OpenOffice 4.0.0 tien sofitu pa Java 7, que ye la configuración recomendada; pero (especialmente na versión de 64-bit de Windows) pue recibir avisos de que la versión de Java ye defeutuosa. Nesi casu, descargue ya instale Microsoft Visual C++ 2010 Redistributable Package. Si inda tien problemes, instale la versión más actual de JRE 6. Asegurese de descargar el ficheru "Windows x86 Offline (32-bit)". Darréu configure OpenOffice pa usalu en "Ferramientes - Opciones - OpenOffice - Java". Vea esti filu del foru pa más información.

• Apache OpenOffice 4.0.0. tien una nueva paleta de color. Si migró los "datos personales" dende una versión anterior, tamién se migró la paleta de color antigua: nun verá la nueva paleta y (si ta usando una versión que nun ta n'inglés) dalgunos nomes de color apaecerán namái n'inglés. Pa tener la nueva paleta, zarre Apache OpenOffice ya'l so aniciu rápidu, busque'l ficheru “standard.soc” na so carpeta d'usuariu d'Apache OpenOffice y cambie'l nome del ficheru, a “standard_AOO341.soc” por exemplu. Nel siguiente aniciu d'Apache OpenOffice la nueva paleta de color tresfierse a la so carpeta d'usuariu y tará disponible.

Anovamientu/Instalación

Al instalar Apache OpenOffice 4.0.0 nun ordenador que yá tien OpenOffice 3.4.1 o 3.4.0 instaláu, preguntará al usuariu si quier migrar los "datos personales" de la versión anterior a la versión nueva.  Esto incluye información como pallabres personalizaes del correutor ortográficu, diccionarios, estensiones, etc. Esta migración ta activada de mou predetermináu, pero l'usuariu pue desactivala cola caxella de comprobación.

En dellos casos, cuando l'usuariu anicia por vez primera Apache OpenOffice 4.0 dempués d'un anovamientu qu'incluyó la migración de datos personales, l'usuariu verá un diálogu como esti:
Ye seguro facer click n'Aceutar nesti diálogu.

Tres completar un anovamientu, inda pue quedar dalgún ficheru rellacionáu cola versión antigua d'OpenOffice nel ordenador.  Ye seguro desaniciar estos:

• El direutoriu baleru:  C:\Archivos de Programa\OpenOffice.org 3\share\uno_packages\cache\uno_packages
• Direutorios de ficheros d'instalación de versiones anteriores, de vezu nel Escritoriu, con nomes como:
  • OpenOffice.org 3.4.1 (en-US) Installation Files
  • OpenOffice.org 3.4 (en-US) Installation Files
  • OpenOffice.org 3.3 (en-US) Installation Files

Pa más información tocante al anovamientu/instalación, por favor, vea la Guía d'instalación.

Siguir informáu sobro Apache OpenOffice

Encamentamos-y que se suscriba a la llista de corréu d'anuncios d'Apache OpenOffice pa recibir avisos importantes, como anovamientos del productu y parches de seguridá.  Pa suscribise pue unviar un corréu a:  announce-subscribe@openoffice.apache.org.

Tamién pue siguir el proyeutu en Twitter, Facebook y Google+.