KRALENDIJK —

Tin kos ta pasa ku bo no sa ta kiko òf kon ekspresá bo mes. Dia 26 di febrüari a yega Boneiru riba buelo KL304 prosedente di Hulanda, Andreina Barrios i su yu muhé, Carlene Barrios Camargo, di 13 aña. Carlene ta un mucha ku síndrome.

Riba e buelo aki Carlene a tuma un foto den bachi di un di e stewardessnan i tabata un di e pasaheronan mas stimá na bordo. Nan regreso tabata 16 mart via Kòrsou i mester a sali riba buelo WM804 mitar di nuebe di mainta pa Kòrsou i sigui te anochi 8‘or ku KL734 pa Hulanda.

Tabata último dianan hopi turbulento i pániko mirando e situashon di e vírùs ku a drenta Kòrsou i Aruba, notisia ku ta kanselá buelo, etc. Nan ta bibando ya pa 4 aña na Hulanda kaminda e mama a bai pa buska un mihó futuro pa e yu ku ta un mucha ku síndrome.

Nan mester a sinta for di mainta te anochi na aeropuerto di Kòrsou, pero no a keha sabiendo ku tur kos ta bou di kontròl. Durante buelo nan a haña un tremendo servisio i na yegada na Schiphol, segun e mama a konta, kapitan di buelo i su kopiloto a para warda mama i yu i nan por a hasi un bishita den cockpit i tuma foto.

Tripulashon di KLM a hasi algun regalito na Carlene kende a keda hopi kontentu i na nòmber di su mama nan ke yama KLM masha danki pa tur kos ku nan por a regresá nan segundo kas, esta Hulanda sano i salvo. Schiphol tabata ketu bandoná kompará ku na febrüari ora nan a sali pa Boneiru.