ILIGAN CITY (Aug. 23) — Pinaagi sa kalihukan ni Cong. Frederick W. Siao, adunay 7 kabuok nga ambulansya ang madawat sa Iligan City gikan sa Department of Health (DOH) nga nagkantidad ug 2.5 million pesos kada usa.
“Nalipay kaayo kita nga muabot na gyud atong gi-request nga mga ambulansya. Niadtong 17th Congress pa kini nato gi-request. Dako kaayo kining tabang sa atong dakbayan hilabi na karong naa ta’y public health crisis,” ingon ni Siao.
Ipanghatag kini sa 7 ka barangay: Rogongon, Pala-o, Hinaplanon, Buru-un, Saray, Sta. Filomena, ug Kabacsanan.
Gikan kini sa Health Facilities Enhancement Program (HFEP) sa DOH.
Unom (6) ka units ang naka-allocate sa Iligan City gikan DOH. Ang usa (1) nga naka-allocate sa Aangat Tayo Party List, gihatag ni Rep. Neil Abayon sa Iligan pinaagi sa paghangyo ni Cong. Siao.
Gipili ang 7 ka barangay base sa ilang geographical location. Ang Rogongon ug Buru-un ang duha sa pinakalagyong mga barangay gikan sa sentro sa syudad. Ang Kabacsanan, aduna nakaplastar sa kabukiran, ug ang ubang barangay sakto ug lokasyon para maabot ang daghang lugar sa syudad.
“Limitado ra atong makuha nga units tungod limitado pud ang budget. Mao ning namili kita’g mga barangay nga strategic locations para butngan ug mga ambulansya. Gusto nato ipakalat ang mga ambulansya para maka-cover sila ug daghang mga areas sa syudad, para dali maka-responde sa lain-laing lugar kung adunay emergency,” ingon ni Siao.
Ipahigayon ang turnover ceremony ugma Lunes, Agosto 24, sa Iligan City National High School grounds, alas 3:00 sa hapon.
Tumong sa programang HFEP na himuon pang mas maayo ang basic, essential, ug health services sa mga pampublikong hospital ug uban pang medikal na mga pasilidad. Usa ang congressional initiatives sa mga gahatag ug pondo niining programa.
Ang Aangat Tayo Party List, usa ka multi-sectoral party list nga adunay adbokasiya sa health, edukasyon, agrikultura, ug uban pa. Misyon nila nga iangat ang kinabuhi sa Pilipino pinaagi sa paghimo ug balaod ug mga programa. ###