地盤佬日誌—地盤安全裝備

Jobsdb content team – updated on 05 March, 2020

老實講，係香港咁多行業裏面地盤佬算係受傷率好高嘅行業之一，所以地盤佬由頭到腳都有好多對應不同嘅危險狀況而產生嘅安全裝備。等我簡單介紹下啦﹗

基本個人防護三寶（頭盔反光衣安全鞋）

頭盔—我自己覺得係最重要，因為地盤不時都有無意嘅高空擲物，所以一頂合格嘅安全帽隨時保你一命，近年香港再加入咗強制性Y型帽繩，令到佢更加安全（不過都更加帶得唔舒服）。

反光衣—本身反光衣嘅防護能力係接近零嘅，不過佢最主要功用係比其他人輕易咁見到你，令到其他機器或者車輛移動或者轉彎嗰陣時冇咁易撞到你。

安全鞋—地盤地面凹凸不平又多釘頭鐵枝玻璃碎，一對安全鞋真係不可缺少，加上多數安全鞋都係防水嘅（不過着舊咗就通常防唔到水）。

▪ 搬屋師傅見盡劏房、豪宅及共居生態：「搬屋多因加租或就返工。」

▪ 人工10年前後對比：IT、會計、Marketing入門級職位升幅最少係佢？

其他防護裝備

安全帶—地盤其中一樣死亡率最高嘅意外就係空中飛人，所以近年對安全帶嘅要求愈嚟來愈高，又要褲浪式安全帶（其實着起上嚟幾辛苦）又要雙安全繩（好鬼重），不過安全第一命長久，我都係建議大家帶足晒佢啦。

眼罩口罩手套—唔係每個人必須嘅裝備，但係喺某啲工序不可或缺的裝備，例如打炮時眼罩口罩必不可少，不過因應情況都會有唔同環境級數嘅口罩等等，如普通口罩（普通過濾）、N95口罩（過濾效率達到95%）、防毒面具口罩等。另外手套都有分好多種如普通勞工手套、防滑手套、鋼絲手套同隔熱手套等。都會因應工種同埋現場環境佩戴不同嘅合適裝備。

重有一啲唔太常用的裝備就唔一一介紹啦。

雖然好多安全裝備着起上嚟係好唔舒服，如果戴得多安全裝備真係又熱又跼又阻礙活動，實用同舒適從來都係魚與熊掌，不過總之條命就係自己，合適嘅安全裝備，必不可少。