Meeqqat nakorsaat: 15-inik ukiulinnut malittarisassaq allanngussaaq
Meeqqanut napparsimasunut angajoqqaanik ingiaqateqartitsisarnermut tunngatillugu nunat tamat malittarisassaannut Kalaallit Nunaat eqqortitsinngilaq, Dronnning Ingridip napparsimmavissuani meeqqanut nakorsaq KNR-imut oqarpoq.
Kalaallit Nunaanni meeqqat 15-ileereersimagaangata angajoqqaatik ilaginagit kisimiitillugit aallartinneqartarput. Tassa taamak ukioqaleraangata angajoqqaat ingiaqataasinnaanerannut namminersornerusut karsi matusarpaat.
Dronning Ingridip Napparsimmavissuani meeqqat nakorsaat Britta Olsen isumaqarpoq, meeqqat 15-inik uliullit angajoqqaatik ilaginagit napparsimmavimmiinnissartik artoraat.
- Meeqqat 15-inik ukiullit amerlanersaat suli inersimasunngorsimaneq ajorput. Nuuliassagaangamik imaluunniit Danmarkiliassagaangamik immikkut ilisimasalimmit piginnaasaqartumik pisariaqartitsisumik nappaateqarnerat peqqutaasarpoq - taamalu nappaat ilungersunartuulluni, nassuiaanerpassuit atortariaqarlunik aammalu misissortinnissanik arlalissuarnik annerumik minnerusumilluunniit iluaalliuutaasinnaasunik aqqusaarinnittussaallutik.
Meeqqat ilarpassui Danmarkimut aallartinneqartartut qallunaatut oqalussinnaaneq ajorput, nassuiaavoq.
- Napparsimmavissuarmut Rigshospitalimut ittumut pissalluni assut ajornakusoortuuvoq, aammalu paareqqissaarniaraluarlugit ilimagaara 15-inik ukiullit amerlanersaat toqqissisimaneq ajortut.
Norgemiut peqatigiiffiat Nobab meeqqanut napparsimasunut tamanut atuuttussanik arlalinnik suliaqarsimavoq, taakkulu FN-ip meeqqat pillugit isumaqatigiissutaannut naapertuutsillugit isumaqatigiissutigineqarsimapput.
Nobab naapertorlugu meeqqat napparsimanerminnut atatillugu uninnganertik tamaat angajoqqaaminnik qanigisaminnilluunniit ilaqartussaatitaapput. Aamma unitsinneqanermut atatillugu angajoqqaat immikkut aningaasartuuteqarnatillu akissarsiamikkut annaasaqartussaanngillat, Taamalu Britta Olsen naapertorlugu Kalaallit Nunaata malittarisassat taakku eqqortissimkanngilai.
Naalakkersuisunut ilaasortap Aqqalu Abelsenip pingasunngormat Qanoruumi neriorsuutigaa inuusuttunnguanut napparsimasunut pissutsit paasiniaaviginiarlugit, aaqqissuussaq angajoqqaanit arlalinnit isornartorsiorneqareersorlu.