નવગુજરાત સમય, અમદાવાદ
બેન્કિંગ જાયન્ટ યુબીએસ દ્વારા ક્રેડિટ સુઇસને 3.25 અમેરિકન ડોલરમાં હસ્તાંતરણ કરવાની જાહેરાતને પગલે શેરનો ભાવ એક તબક્કે 63 ટકા તૂટ્યા બાદ પાછળથી 60 ટકા તૂટીને રેકોર્ડ 0.75 સ્વિસ ફ્રાંન્કના સ્તરે ગબડ્યો હતો. ક્રેડિટ સુઇસને યુબીએસ હસ્તગત કરશેના અહેવાલની યુબીએસના શેર પર પણ નકારાત્મક અસર રહેતાં 10 ટકા તૂટ્યા બાદ આ લખાય છે ત્યારે 4 ટકા તૂટીને 16.42 સ્વિસ ફ્રાંન્ક ટ્રેડ થતો હતો. ક્રેડિટ સુઇસને સ્વિસ નેશનલ બેન્ક દ્વારા 54 અબજ ડોલરની બોરોઇંગ સુવીધા આપવામાં આવતા શેરનો ભાવ તૂટતો અટક્યો હતો તેમાં નવેસરથી અનિશ્ચિતતાના વાદળો ઘેરાતા નરમાઈ ફરી વળી હતી. આ સોદો ચાલુ કેલેન્ડર વર્ષના અંત સુધીમાં પૂર્ણ કરાશે.
ક્રેડિટ સુઇસની અનિશ્ચિતતા પાછળ એશિયન શેરબજારમાં વેચવાલી ફરી વળતા સેન્સેક્સ એક તબક્કે 905 પોઇન્ટ તૂટ્યા બાદ પાછળથી 361 પોઇન્ટ ઘટીને 57,629ની સપાટીએ બંધ રહ્યો હતો. નિફ્ટી પણ 17,000ની નીચે 111.65 પોઇન્ટ ઘટીને 16,988.40 બંધ રહી હતી. મેટલ આંક સૌથી વધુ નરમ હતો તો આઇટી શેરો વધુ તૂટ્યા હતા.
બેન્કિંગ ઉદ્યોગની ક્રાઇસિસને કારણે આઇટી સેક્ટરની આવકને નકારાત્મક અસર થઈ શકે તેવી ભીતિ વ્યકત કરાતી હતી. જેને કારણે છેલ્લા એક મહિનામાં ઇન્ફોસિસ, ટીસીએસ અને વિપ્રો જેવી ટોચની કંપનીઓના શેરોના ભાવમાં 10-12 ટકાનો ઘટાડો નોંધાયો હતો. એફપીઆઇની ~2,546 કરોડની વેચવાલી રહી હોવાના એક્સચેન્જના ડેટા પ્રાપ્ત થતાં હતા. ગત્ સપ્તાહને અંતે બે દિવસની રિકવરી છતાં છેલ્લા આઠ દિવસમાં રોકાણકારોએ ~11 લાખ કરોડ ખોયા છે અને માર્કેટ કેપિટલાઇઝેશન ~255.43 લાખ કરોડ રહ્યું હતું.
ક્રૂડ ઘટતા રૂપિયો તૂટતો અટક્યો
ડોલર સામે રૂપિયાને ક્રૂડના નીચા ભાવનો ટેકો મળ્યો હતો. વૈશ્વિક સ્તરે બેન્ક શેરોમાં ગાબડાં પડતા અને આર્થિક કટોકટીના સંકેતો વચ્ચે પણ ડોલર સામે રૂપિયો 82.50-83ની રેન્જમાં અથડાઈ ગયો છે. બ્રેન્ટ ક્રૂડના ભાવ 15 મહિનાની નીચલી સપાટી 72 ડોલરે ગબડતાં કરંટ એકાઉન્ટ ડેફિસિટ અંકુશમાં રહેવાની ધારણા વચ્ચે રૂપિયો તૂટતો અટક્યો હતો. ડોલર સામે રૂપિયો 4 પૈસા ઘટીને 62.62ના સ્તરે રહ્યો હતો.
વૈશ્વિક સોનું વર્ષની ટોચે
વૈશ્વિક સોનાનો ભાવ 8 માર્ચ 2021 પછી પ્રથમવાર 2,000 ડોલરની સપાટી કુદાવીને ઊંચામાં 2,011 ડોલર થઈને 1987 ડોલર ક્વોટ થતો હતો. વૈશ્વિક સોનામાં ઊછાળા પાછળ વાયદામાં સોનું પ્રથમવાર ~60,000ને કુદાવી ગયું હતું તો સ્થાનિકમાં પણ ~61,300ની કેરોર્ડ સપાટીને સ્પર્શીને ~61,000ના સ્તરે રહ્યું હતું.
