1. CNSJF un biaha mas éksito rotundo
Tabata 3 anochi kargá ku bon músika, ambiente. Artistanan grandi manera Gregory Porter, Wyclef Jean, John Legend i Oscar de Leon a sòru di deleitá e públiko grandi ku tabata presente. Nos tin di remarká ku tur e trese anochinan a bai sin ningun insidente.
‘Ahora la cosa viene’. Nos a bin komprondé ku hopi ta esnan di edat avansá ku a kritiká por ehèmpel e show di Usher i otro artistanan hóben. Nan a argumentá ku e tipo di músika ei no ta kuadra ku e festival. A ni e pida bachata ku Usher a kanta no por a pone nan kambia di opinion.
Si bo kompará CNSJF ku por ehèmpel NSJF na Ulanda bo ta ripará e diferensia grandi mesora. Kaminda na Ulanda ta hasi hopi esfuerso pa bini ku artistanan nobo i di tur gremio di músika, aki na Kòrsou nos ta hasi lo máksimo pa rebibá e tempunan di Roxy. Ku tur rèspèt pa esnan ku a keda pega de añanan 70 i 80:
Ta basta awor ku artistanan manera Oscar de Leon. Nan tempu a pasa i mester duna chèns na otro artistanan. E aña aki a bini ku Gregory Porter i esei ya ta duna un speransa ku pa otro aña e eskoho di artista lo ta muchu mas mihó.
Despues di jazz semper kompanianan di fiansa manera Shon Fia i Island Finance ta eksperensia un subida eksplosivo di petishon pa fiansa. Partidónan di bòn di luna mester a pidi asistensia di polis pa dominá e multitut ku a rondoná nan ku e speransa di tuma un òf mas bòn pa por kumpra kuminda. Tambe nos a konstatá hopi outo bandoná kantu di kaminda pa motibu ku gasolin a kaba i no a sobra plaka pa tènk.
Pa otro aña nos ke urgi tur ku kier ta presente na e festival pa kuminsá spar e plaka di entrada for di awor evitando miseria i bèrgwensa e siman despues.
2. Gerrit Schotte, Deya Mensche i Wyclef Jean
Gerrit Schotte i Deya Mensche (di The Velvet Rope) ta dos seru ku normalmente lo no “topa”. E motibu ku e biaha aki si esaki a sosodé ta e gran artista Wyclef Jean. Tur kos a kuminsá na momentu ku tantu Gerrit Schotte i Deya Mensche a claim riba medionan sosial di ta esun ku a sòru pa e artista pasa un dia ameno riba nos isla.
Segun Deya Mensche:
“A lot of people are claiming credit for realizing this event, however we never put this together to increase our selfie game or let people know how well connected we are.
This initiative came from a conversation with Wyclef ten years ago, where I told him about my island and its lovely people…. And as you could see, Wyclef is all about the people. A lot of folks unfortunately couldn’t afford to attend the CNSJ festival, so we brought the party to them. Oranjestraat WIFI’ing Park was in full bloom and it touched my heart to see how Wyclef responded to the people. There was so much love and he touched our spirits with his kindness.”
For di e website di Gerrit Schotte nos ta sita ku:
“Wyclef Jean den un kòmbersashon privá ku su persona a indiká su interes pa durante su estadia korto e por relashoná su mes un tiki mas di serka ku nos kultura i nos hendenan. I esaki durante su bishita korto durante djabièrnè i djsabara e la hasi tambe.
Promé e tabata tin mester urgentemente un pelá i esaki sr. Willo Maduro di Willo barbershop a sòru pa e haña. Seguidamente presidente di Wild Hogs sr. Dudley Tokaay a enkargá su mes pa agrupá un grupo chikí di Harley Davidson bikers pa asina Wyclef Jean por a konosé sierto paisahe nan di nos dushi isla Kòrsou. I finalmente djasabra undercover sin niun seguridad e la “hit the road”. Wyclef Jean ta un di e artistanan/kantante konosí pa diferente presentashon nan grandi ku artistanan manera Carlos Santana, Shakira, Akon etc etc. Su organisashon Yéle Haiti tambe ta uno di aktividatnan karitativo pa yuda su pais natal Haiti for di aña 2005 bin .”
Awor tur hende ke sa ta ken ta papia bèrdat i ta ken ta tiradó di bagon. En todo kaso Wyclef Jean a pasa un dia ameno den kompania di tantu Gerrit Schotte, Deya Mensche i hopi otro miembronan di nos komunidat. Remarkabel ta ku no tabatin ni un goldigger òf gatiero presente. Nos ta kere ku e echo ku Wyclef Jean ta di desendensia Haitiano a pone ku a balot’é.
Eske ou vle danse?
3. Aña parlamentario nobo ta habri ku palu di áwaseru
Djamars último aña parlamentario 2015/2016 a keda inougurá den presensia di tantu miembronan di gobièrnu i parlamento, gobernador i otro invitadonan. Den e programa Mòru bon Dia presidente di parlamento señor Mike Franco a splika ku por kompará un aña parlamentario komo un aña eskolar. Inkonsientemente Mike a dal no un martin pero mukel di Thor riba kabes di e klabu.
‘Corecto el bingo Mike’. Parlamento i gobièrnu ta duna e pueblo aki e sentimentu ku ta un set di mucha malkriá tin e pais aki den su gara. Tur miembro ta hasi loke nan kier poniendo e pueblo aki sigui warda riba e alivio ku tur elekshon di nobo ta keda primintí. Machi i pachi nan ku trayektoria largu den polítika na komienso a primintí shelu i tera na hóbennan awor 25 aña despues ta e penshonado nan ke yuda.
Un minister presidente ku ta wòrdu bahá for di su puesto sin ningun klase di aklarashon te awe. Diferente parlamentario sospechoso di aktonan kontra di lei. Esei ta Kòrsou na 2015. Káos i mas Káos. Na 2016 tin elekshon. Ken ku bo puntra pa ken nan lo vota ta hisa su skouder i grita yora. Nos pais ta un rakèt ku ta wòrdu operá pa un grupo di makaku. E úniko motibu pa kua e makakunan tei ainda ta paso tin bakoba. Dia bakoba kaba tur makaku lo disparsé i e rakèt lo pèrdè kontrol bai den krili su wela.
Nos mester di un lider. Un hende hóben, íntegro, di bon karakter ku determinashon i sin masha debe pa paga.
4. Kòrsou ta pèrdè kontra di El Salvador i ta kai afó pa Rusia 2018
Huntu nos ta diesdos pero e baka lamentablemente a hoga na pos. Durante un soño bunita un bos duru a zona h*de nos. Nos a gana unu, dos, tres i kere yen kos. Asta Morgan Isenia a kuminsá siña e idioma Rusiano anhelando e dia yega pe por splika dos kos.
Jean Fransisca i Patrick Kluivert tur dos a traha kara feros paso ta kon bini nos a hunga bon pero keda sin hinka ni unu ni dos. Patrick su kasa a bisa: “Niki pa boso, ami ta yena mi maleta di Louis Vuitton ros i laga boso atras den pos”.
Ala fin ala fan e kuenta a kaba. Nos a lucha duru pero na final ta El Salvador ta sigui i nos ku tabata diesdos a subi Facebook zundra i tira falta riba otro na mahos.
5. Den Yves Cooper su inbox: Pastor konofló
Den bida nos tur ta pasa den tempunan difísil. Alkohòl, droga i kumpramentu di karchi VIP pa tur fiesta ta algun adikshon ku bo por haña bo konfrontá kuné. Brasami ta un di e instansianan ku por yuda bo kura di esaki hasiendo uzo di profeshonalnan tantu lokal komo internashonal.
Loyd Morsen ta un pastor ku ta bini for di Sürnam pa duna lès na e instituto. Pero aparentemente e tipo aki tin mas talento skondí. Via di Yves su inbox un persona a splika lo siguiente:
“Yves bon noch
Yves na brasa mi, yves nan ta bini ku poko hende di surnam di misa pa duna les na brasami,e hende aki anochi bo ta hanja nan ta kore parande trankil di nan,
Pakiko nos gobernante nan ta gasta sen ku e bandido nan ei, aki na korsow mes nos tin jen di misa, ora nos reklama nan ta tuma represja kontra bo, ta lupe reyes ta bin ku e hende nan korsow anto mester paga nan jen di sen,
Mi ke pa bo konfronta lupe ku e kos aki, paso ta un abuso, mi tbt den un cafe, mi a mira kon un di e pastor aki tbt ku muhe den e cafe,un ku ta papia papiamentu, e ta bia e muhe: ku e geniet di interne liefde, e ke hinka su tong bove de knie,
Magina un pastor surnam,
Bo por subi riba facebook wak su profil,e jama; loyd morsen
yves wak ko bo ta plublika e kos aki na bo manera ja nos pueblo ta sa kiko ta pasa ku nos sen,ta hopi plaka nan ta kobra pa bini, korda konfronta lupe reyes ku e kos aki paso ta e bini ku nan
Pasa un anochi,no laga e kos aki drumi
danki.”
‘Chanfles’… E pastor aki mester a studia pa dòkter un tempu. E sa presis kon mester hinka su “tong bove de knie” okashonando “interne liefde”. Hopi bon Loyd, bo ta un genio. Nos no sa si Lupe Reyes ta na altura di Don Pastor su bagamunderianan pero lo ta bon pa e check e kos aki promé ku Brasami kompletu haña su mes konfrontá ku “tong bove de knie”.
De Frente a “Lengua ariba de la Rodilla” ku Lupe Reyes
Un biaha mas nos a logra sobrebibí un siman duru di trabou. Riba dje ta mei mei di luna i kos ta fututu. E dia nan aki kuerpo polisial ta por la goma ku bastante detenshon relashoná ku kasonan di atrako, poseshon ilegal di arma etc. Esaki a pone ku segun korant Vigilante básikamente tur sèl na wardanan di polis ta yen.
Dios laga ku kriminalnan no ta lesa korant paso esaki sigur lo duna nan mas ánimo pa sigui hecha baina. En fin. Awe ta djabièrnè i paso ta mei mei di luna nos ta kambi’é hasié DjaMièrdè. Ora boso sali trabou atardi, pasa kumpra un bleki di Tang òf un bòter di Sun Quick. Herebé mitar kaha di galiña, traha salada ku un parti i hasa sobra i sinta wak strea kai.
Ku e konseho ku nos a kaba di duna nos ke finalisá bisando ku maske:
Ivar Asjes a disparsé estilo pastor Simon, si tur sèl ta yen por hasi uzo di kouchinan na Parke Tropikal i Aubrey Janga hasiendo un reportahe ta aparesé for di tras di algun rama di sumpiña i bisa ku:
“Nos no tabata skondí. Nos tabata den un roi.”
T’aki mi ta BEBA
Konsiderando ku kos ta hodidu e dianan aki, ata un reseta fásil i ménos kostoso pa prepará.
Pan Será
Ingredientenan :
70 gram ies 7½ kg. ariña di pan 125 gram salu 1250 gram res 140 gram suku
Preparashon :
Nos ta sefta e ariña di pan ku un koladó grandi den un kòmchi grandi. Agregá e salu, suku i tambe ies den e ariña pan i drei nan bon den otro. Pone e res den e meskla dje ingredientenan seku i mansa tur huntu pa mas o ménos 20 minüt. Kòrta pida dje mansa i pis’é wak si e ta 200 gram. Si ta asina ta sigui kòrta i pisa. Awor ta bòl nan tur i tapa nan ku un sèrbètè di kushina laga nan para 10 minüt pa nan por reis. Ora ta asina leu ta plat nan i pone nan riba un plancha huntá ku un poko res i ariña di pan di stroi riba dje. E fòrnu mester ta na 250 grado i nos ta pone e plancha den e fòrnu kayente. Despues di trinta minüt nos ta prek e pannan ku p.e. un satestokje pa wak si e pannan ta kla. Nan ta kla ora ku e satestokje sali seku. E reseta aki ta saka 60 pa 70 pida pan di 200 gram.