Qu’es en baish d’aquesta còsta que començava la comuna de Sent-Esprit, quan l’arriu Desboc e passa devath la R. N. 10 tà, en seguint, se n’anar davant l’aubèrga de cap a l’isla Sent-Bernat, uei situida au Bocau, e restacada au navèth pòrt de Baiona. Aqueth arriu que marca adara la termièra entre lo departament de las Lanas e lo deus Pirenèus-Atlantics, entre Tarnòs e Baiona. Mes, dinc a 1857, que serviva a destermiar las duas comunas landesas de Tarnòs e de Sent-Esprit, la capduelh deu Senhans.
Qu’es d’aqui que partín entà bisa, de cap a 1850, dotze landés de Sent-Esprit, en cercas de qué minjar, en temps de magrèra. Qu’es au mens çò que’ns condè, malurosament en francés, en 1951, lo praube Renat Cuzacq, un professor deu Licèu Cassin, dens lo son Panorama de la literatura gascona de Baiona.
