純粹港嘢：關於承諾，比起結果更令人在乎的是態度

承諾，大概是戀人之間最甜蜜的情話。雖然呢一刻我做唔到，但為左令你安心或者開心，我願意許下諾言，應承將來為你完成一件事。

願意給予一個人諾言，本來係一件好浪漫同窩心嘅事。但正正因為有過希望，最終如果兌現唔到曾經許下嘅諾言，反而會令得到過承諾嘅人倍感失落。

「你應承過我架！點解做唔到啊？」是情侶間最常見的質問。

或者對方原本應承過你會做嘅事唔係生命裡嘅必需品，例如每個禮拜抽時間陪你做運動、12點前返唔到屋企講聲先、今年陪你去異地過一個白色聖誕等等。但因為對方答應過為你的生活錦上添花，願望落空時就難免會覺得失望。

而最令人難過嘅，未必係個件事完成唔到，或者對方應承買俾你個樣嘢無買到，而係對方面對個份承諾嘅態度。

一個人有冇認真對待、有冇真係嘗試去完成佢許下過嘅諾言，其實係感受到的。當兩個人真心相愛時，只要見到對方有為守諾而努力，即使最後結果不如人意，都會令人感動。

就好似近期內地熱播劇《歡樂頌2》裡面其中一對情侶，上海白領樊勝美因為家庭負擔，一直好想係上海建立一個屬於自己嘅小家庭，男友王柏川希望俾到一個家同一份安心感勝美，承諾年底前會買樓。然而最後關頭，佢係生意上受騙破產無力買樓，雖然勝美好想有一個家，但對佢而言呢個家必須要有王柏川先可以稱之為家。

所以即使王柏川最終無力實現諾言，甚至唔能夠話俾勝美知，佢幾時有能力做到，但勝美見證過佢為左呢份諾言有幾努力，佢嘅態度證明左佢有幾用心，呢點已經比結果重要得多。

好多時當一個人質問對方「你應承過我架！點解做唔到？」時，嬲嘅未必係個件事佢做唔到，而係由始至終都無見到對方有將個諾言放係心，有認真為做到佢自己應承過嘅嘢而努力。

因為唔上心，佢可能連自己應承左你D咩都唔記得。然而你記住左，你記得佢有一個、甚至好多個未完成，並且完全遺忘自己答應過的承諾。或者你未必會將呢份失望宣之於口，但累積沉澱落嚟嘅失望最終會一步步地蝕食對對方嘅愛同信任。

所以如果你真正在乎一個人，係應承對方一件事時，請用心記住。那怕只是一件微不足道的小事，只要個份承諾給予過對方希望和快樂，當對方發現你原來只係隨口一說，根本無在意過時，所帶嚟嘅失望比起你從來無應承左佢任何嘢更甚。

只要回憶裡有一份未完成又被遺忘的諾言，下一次，當你又再次無意識地應承一件事時，可能你口中認為係一份甜蜜嘅情話，但放係對方耳中只會剩底諷刺，只會即時諗起你上次講過但完全無諗過要完成的諾言。

成熟到一定程度會發現，面對一份為左令對方安心而許下的諾言，請盡力完成，即使力有不遞，至少令對方睇到你有努力過。如果你係為左令對方開心而應承一件事，咁一開始就無需多言，真正想為對方做一件事，其實直接去做就夠。

飄浮於言語之間的只能叫做情話，只有落實完成的方能稱得上為諾言。

純粹思考題：如果唔提，對方就完全唔記得應承過你的事件，提嚟仲有冇意義？

TEXT / Diana CHIU