Kóvape Jaipy’ara’ãta Chupekuéra

Hetave mokõi dékada añehenói mboyve Tupao servicio de tiempo completo-pe, amba’apova’ekue mbo’ehára ha mohendahára ramo peteĩ universidápe. Che rembiaporã tuichavéva mbo’ehára ramo ha’ékuri aipytyvõ umi estudiante-pe toikuaa mba’éicha ikatu ohupyty kuaapy ijehegui. Ha peteĩ mba’epururã imba’eguasúva che rembiapópe ha’ékuri ajapo, akalifika ha ambohovái mba’éicha umi estudiante osẽra’e i’prueba-pe. Peikuaaháicha pene rembiasakue rupi, umi prueba ndaha’éi párte pe proceso de aprendizaje estudiante-kuéra ohayhuvéva!

Ha katu sapy’apy’agua prueba tekotevẽ oñe’aprende hag̃ua. Prueba oseporãva ñanepytyvõ ñakompara hag̃ua pe tekotevẽva jaikuaa pe jaikuaámava voi rehe peteĩ temagui; ome’ẽ avei peteĩ estándar ikatuháre jahecha kuaapy ha ñeakãrapu’ã jehupytýva hina.

Péicha avei, umi prueba vida terrenal escuela-pegua, ha’e peteĩ imba’eguasuetéva mba’epururã ñande progreso eterno-pe. Ñamomba’e, upevére, pe ñe’ẽ prueba ndojejuhuiha ni peteĩ véce umi libro canónico en inglés texto-pe. Uvei katu, ojeiporu umi ñe’ẽ jeipy’ara’ã, jatypeka, ha ñehesa’ỹijo oñemohesakã hag̃ua hetáichagua modélo, jahechauka hag̃ua hekopete ñande kuaapy espiritual, ñane ñeikũmby ha ñane devosiõ ñande Ru Yvagagua plan vy’apavẽ ijapyra’ỹvare, ha katupyry jarekóva jaheka hag̃ua Salvador Expiasiõ jehovasakuéra.

Pe plan de salvación apohare omohesakã ñande probación terrenal propósito tee, oiporúvo umi ñe’ẽ jeipy’ara’ã, jetypeka, ha ñehesa’ỹijo escritura-kuéra ymaguare ha ko’ag̃aguápe. “Ha kóvape jaipy’ara’ãta chupekuéra, jahecha hag̃ua ojapópa hikuái opa mba’e Ñandejára Itupã he’íva chupekuéra”.¹

Pehechami salmista David jerure’asy he’íva:

“Ejatypeka che rekove, O Jehová, ha cheipy’ara’ã; ehesa’ỹijo che akãngeta ha che korasõ.

“Nde poriahuvereko oĩ rupi che resa renondépe: ha ne añeteguápe aguatava’ekue”. ²

Ha Ñandejára omomaranduva’ekue 1833-pe, “Upévare, ani pekyhyje umi pende rayhu’ỹvagui, che ha’émagui che korasõme, he’i Ñandejára, poipy’ara’ãtaha opa mba’épe, ahecha hag̃ua pepytápa che konvéniope, ñemano peve jepe, peime hag̃ua tekomarangatúpe”. ³

Ary 2020 oñemarkákuri, en parte, peteĩ pandemia global, ñandepy’ara’ã, ñandepyguara, ha ñaneresa’ỹijova’ekue heta hendáicha. Ajerure ñande, tekove ha familia háicha, tajaikuaa hína umi lección valiosa, experiencia hasýva añoite ikatúva ñanembo’e. Aha’arõ avei opa ñandekuéra tajaikuaa porãve pe “Tupã tuichakue” ha pe añetegua he’íva “ha’e okonsagrataha [ñande] jeiko’asykuéra [ñane] ñeimeporãrã”.⁴

Oĩ mokõi principio básico ikatúva ñanesãmbyhy ha ñanemombarete ñambohovakévo umi mba’e ñandepy’ara’ã ha ohesa’ỹijóva ñande rekove, taha’e ha’e umíva: (1) pe principio ñañembosako’i hag̃ua ha (2) pe principio jaha hag̃ua tenonde gotyo Cristo-pe.

Salvador discípulo ramo, oñemanda ñandéve “pembosako’i opa mba’e tekotevẽva; ha pemoĩ peteĩ óga, heẽ, peteĩ óga ñembo’erã, peteĩ óga ojunorã, peteĩ óga oĩháme jerovia, peteĩ óga ñehekombo’erã, peteĩ óga gloriarã, peteĩ óga oĩháme orden, peteĩ Tupã róga”.⁵

Oñepromete avei ñandéve, “peiméramo ñembosako’ípe ndapekyhyjemo’ãi.

“Ha pekañy hag̃ua oporohayhu’ỹva pu’akágui, ha peñembyaty hag̃ua chendive, peteĩ tavaygua hekojoja, imara’ỹ ha ipy’apotĩva”.⁶

Ko’ã escritura ome’ẽ tekoha porãmba, ñamohenda ha ñambosako’i hag̃ua ñande rekove ha ñande rogapy, temporal ha espiritualmente. Ñeha’ã jajapóva ñañembosako’i hag̃ua vida terrenal prueba jahasátavape g̃uarã, osegiva’erã Salvador ehémplo, mbegue mbeguépe “okakuaa ha iñaranduva’ekue, grásiape, Tupã ha yvyporakuéra ndive”⁷—peteĩ preparación intelectual, física, espiritual ha social joaju porãmbápe.

Peteĩ ka’aru, nda’aréi, Susan ha che rojapo peteĩ inventario ore almacenamiento de alimento ha ore suministro de emergencia-pe. Upérõ, Covid-19 pya’e oñemorasambiva’ekue, ha heta yvyryrýi omongu’e ore róga Utah-pe. Romba’apova’ekue ára romenda ñepyrũmi guive, rosegi hag̃ua consejo profético mba’éicha ñañembosako’iva’erã mba’evai ojeikuaa’ỹvape g̃uarã, ha upévare pe “rojatypeka” rohecha hag̃ua mba’éichapa roime hína pe virus ha umi yvyryrýi pa’ũme, ha’etévaicha peteĩ mba’e porã ha hi’árava. Ore roikuaase mboýpa roguenohẽ ko’ã prueba oñemomaradu’ỹvape.

Heta mba’e roikuaákuri. Heta hendápe, ore rembiapo ñembosako’irã oĩporãtékuri. Upevére, ambue mba’épe tekotevẽkuri rojapo porãve, ndorohechakuaái ha noroñangarekói rupi ambue temikotevẽre hi’árape.

Ha avei heta ropuka. Ore rojuhúkuri, péicha, heta mba’e peteĩ armário ruguápe, oĩva’ekue ore rembi’u roñongatuhápe hetairei dékadama. Añetehápe, rokyhyjékuri roipe’a ha rovichea hag̃ua umi mba’yru, rokyhyjégui romoñepyrũvo g̃uarã ambue pandemia mundial! Ha katu pevy’áta peikuaávo hekopete romombohague umi material ipeligrósova, ha noĩveimaha en peligro pe múndo resãi.

Oĩ Tupao miembro he’íva umi plan ha suministro de emergencia, pe almacenamiento de alimentos ha umi equipo de 72 horas, ndaha’eveimava’erãha mba’eguasu, umi Hermano-kuéra noñe’ẽpy’ỹi ha noñe’ẽguasuveima rupi ko’ã mba’e ha ambue mba’e ko’ãva reheguáre conferencia general-pe. Ha katu, umi Tupao líder omomaranduva’ekue atõi jeyjey, heta dékada pukukue, ñañembosako’i hag̃ua. Pe consejo profético je’e jeyjey ára ohasávo, ojapo peteĩ konsierto pu’akapa hesakãva, ha peteĩ momarandu ryapu hatãitevéva pe solista actuación ikatúvagui ojapo.

Umi ára hasýva ohechaukaháicha insuficiencia oĩva preparación temporal-pe, péicha avei, umi jeipy’ara’ã hasýva aja, mba’asykuéra indiferencia ha complacencia espiritual rehegua, ojapo iperhuísio ivaivéva. Ñande jaikuaa, por ehémplo, parábola de las diez vírgenes-gui, ñembosako’i ñembotapykue ogueruha prueba osẽvaíva. Penemandu’a mba’éicha umi virgen iñarandu’ỹva noñembosako’i porãihague pe exámen oñeme’ẽva’ekue chupekuéra ára Menarã ñeg̃uahẽme.

“Umi iñarandu’ỹva, ojapyhývo ilamparakuéra, ndoguerahái hendive ñandy:

“Ha katu umi iñarandúva ogueraha ñandy ilamparakuérape. …

“Ha pyhare mbytépe oñehendu peteĩ sapukái, Péina ápe, oúma pe menarã; pesẽ pehuvaitĩ ichupe.

“Upévo opu’ãjoaite umi virgen, ha omoĩporã ilamparakuéra.

“Ha umi iñarandu’ỹva he’i iñarandúvape, Peme’ẽ oréve pene ñandýgui; ore lamparakuéra ningo ogue.

“Ha katu umi iñarandúva ombohovái, he’ívo, Ndaupéichai; ndohupytýi ningo oréve ha peẽme g̃uarã: ha katu tapeho umi ovendévape, ha pejogua pendejupe g̃uarã.

“Ha oho aja hikuái ojoguávo, ou pe menarã; ha umi oñembosako’iva’ekue oike hendive pe mendahápe: ha oñemboty pe okẽ.

“Ha upéi ou avei ambue vírgen-kuéra, he’ívo, Ñandejára, Ñandejára, eipe’ána oréve”.⁸

“Ha katu ha’e ombohovái ha he’i: “Añetehápe che ha’e peẽme, peẽ ndacheikuaái.”⁹

Al méno ko exámen-pe, umi cinco vírgen iñarandu’ỹva ohechauka ohendunteha hikuái ha ndojapói upe ñe’ẽ.¹⁰

Areko peteĩ anguirũ ha’eva’ekue estudiante ijesarekóva faculta de derecho-pe. Peteĩ semestre aja, Sam omoĩkuri tiempo, ára ha ára, orrevisa, omombyky ha oikuaa hag̃ua inotakuéra opa umi curso oñe’inscribi haguépe. Ha péicha ojapókuri opa umi i’clase-kuérape, opa semana ha més paha. Ha péicha ojapógui, ikatúkuri oikuaa pe léi ha ndaha’éi omemorisánteva umi detalle. Ha og̃uahẽmbotávo umi exámen paha, Sam oĩkuri ñembosako’ípe. Ha péicha, ha’e ojuhu pe exámen final ára, ha’eha peteĩ párte menove hi’estresanteva iformasiõ hurídikape. Ñembosako’i porã ha hi’árape, ou prueba osẽporãva mboyve.

Jesareko Sam omoĩva’ekue iñehekombo’e jurídico-pe, ohechauka peteĩ Ñandejára moha’anga imba’eguasuvéva, ñeñakãrapu’ã ha jekakuaápe g̃uarã. “Ha péicha heʼi Tupã Ñandejára: Ameʼẽta yvypóra raʼykuérape saʼi saʼi, mboʼepy mboʼepy ári, michĩmi ápe ha michĩmi amo; ha ojehovasapyre umi ohendúva che mboʼepy, ha ojapysakáva che ñemoñeʼẽre, oñehekomboʼétagui arandúpe; pe omog̃uahẽvape che ameʼẽvétagui”.¹¹

Che ainvita opavave ñandekuéra “ñama’ẽmi hag̃ua [ñande] rapekuérare”¹² ha “jajejatypeka [ñande jupe], jahecha hag̃ua [ña]imépa hina jeroviápe; [ha] jajeipy’ara’ã hag̃ua [ñande] jupe”.¹³ Mba’épa jaikuaa ko’ã més ohasaramóva, pe estilo de vida ñekambia ha jejoko rehegua? Mba’épa tekotevẽ ñamehora ñande rekove espiritual, físico, social, emocional ha intectual-pe? Ko’ág̃a ha’e ára ñañembosako’i ha jahechauka hag̃ua ñande jupe jajapose ha ikatuha jajapo opa mba’e Ñandejára ñane Tupã omandáva ñandéve.

Peteĩ ára ahava’ekue misionero imitãva funeral-pe, omanova’ekue accidente-pe. Pe misionero ru oñe’ẽ upévo guare ha omombe’u mba’erasy ha’éva separasiõ terrenal ñeha’arõ’ỹ ta’ýra ojehayhuetévagui. Ha’e he’i mbaretékuri, ha’e ijehegui nontendeiha mba’érepa ni pe ára ko mba’e oikohague. Ha katu akóinte che mandu’áta ko kuimba’e rekoporã he’ihague avei, ha’e oikuaa Tupã oikuaaha mba’érepa ha pe ára ta’ýra omanohague—ha péva iporãntemaha chupe g̃uarã. He’i pe atýpe ha’e ha hogayguakuéra, ndovy’áiramo jepe, oĩporãtaha; itestimoniokuéra opyta atã ha noñemovãmo’ãiha. Ombopa iñe’ẽ kóva ko ñemomarandúpe: “Aipota peikuaa, pe Jesucristo evanhélio reheguápe, ore familia oĩmbaite hendive. Ñeĩmbaite”.

Ijetu’u ha hasyetéramo jepe tapicha ohayhúva ñehundi, ko familiagua ipy’aguasúva, oĩkuri ñembosako’ípe espiritualmente, ohechauka hag̃ua ha’ekuéra ikatuha ojekombo’e umi lección de eterna importancia, umi mba’e ahasa’asyva’ekue rupive.¹⁴

Jeroviareko ndaha’éi vyrorei ni fanatismo. Uvei katu, he’ise jajerovia ha ñamoĩ ñande jerovia Jesucristo-re, ñande Salvador ramo, Hérare ha Ipromesakuérare. Ha “ñañemotenondévo ñemova’ỹme Cristo-pe, jaguerekóvo peteĩ ñeha’arõporã mimbi, ha mborayhu Tupãre ha mayma yvypórare,”¹⁵ jajehovasa peteĩ jehecha ha visiõ eterna reheve, ojeipysóva ñande katupyry mortal sãmbyky mboypýri. Ikatúta “ñañembyaty, ha ñaime tenda marangatúpe”¹⁶ ha “ndajajeipe’mo’ãi, ou peve Ñandejára ára”.¹⁷

Che aservi aja presidente ramo Universidad Brigham Young –Idaho-pe, Elder Jeffrey R. Holland oúkuri upépe Diciembre 1998-pe, oñe’ẽ hag̃ua peteĩ umi ore devosional semanal-pe. Susan ha che ro’invita peteĩ temimbo’e aty oikuaa ha oñe’ẽ hag̃ua Elder Holland ndive, ha’e ome’ẽ mboyve imensáhe. Ore tiempo oñondivekuéra oguahẽmbotávo hu’ãme, aporandu élder Holland-pe, “Ikatúramo rembo’e ko’ã temimbo’épe peteĩ mba’e añónte, mba’éta upéva?”

Ha’e ombohovái:

“Jahecha hína peteĩ movimiento tuicha tuichavéva pe polarida gotyo. Umi opción de terreno intermedio ñandéve g̃uarã, Santokuéra Ára Pahapegua, ojeipe’áta. Ojeipe’áta pe tape mbyte.

“Pehónteramo peteĩ ysyry rapére, pehóta oimerãe hendápe. Pe ysyry rape pendererahaha gotyonte. Ojesegi pe ysyry rape, ojesegi pe marea, ojeho pe yvysyry rapére ñaisãmbyhy’ỹre, ndovalemo’ãi.

“Ojejapova’erã jeiporavo. Ndojejapói peteĩ jeiporavo ha’e peteĩ jeiporavo. Peikuaáke ko’ág̃a peiporavo hag̃ua”.

Elder Holland he’iva’ekue umi polarización tuichavetaha, ojehecháva ha’eha profético, umi tendencia ha evento social rupi, 22 ary ha’e ombohovái rire che ñeporandu. O’predesívo pe pa’ũ tuicha tuichave oĩva Ñandejára rape ha mundo rape apytépe, élder Holland oporo’atõikuri, umi ára jaguerehokaha peteĩ ñande py Tupao rrestaurádape ha peteĩ ñande py múndope, pya’e opamaha ohóvo. Ko Ñandejára rembiguái omokyre’ỹva’ekue umi huventu oiporavo hag̃ua, oñembosako’i ha oiko hag̃ua chuguikuéra Salvador devoto discípulo. Ha’e oipytyvõkuri chupekuéra oñembosako’i ha oñemotenonde hag̃ua umi hekovepegua experiencia rupive, oipy’ara’ã, ojatypeka ha ohesa’ỹijótava chupekuéra.

Proceso ñande jupe jaje’proba hag̃ua ha’e parte imba’eguasuetéva Túva Yvagagua plan guasu vy’apavẽ reheguápe. Apromete ñañembosako’i ha ñañemotenondéramo, Salvador-re jerovia reheve, opavave ikatúta jahupyty peteĩchagua kalifikasiõ vida terrenal exámen pahápe: “Iporãite, tembiguái rekoporã ha ijeroviarekóva: sa’ive reheve rejerovia haguére, hetave che amoĩta ndepoguýpe: eike nde jára vy’ápe”.¹⁸

Atestifika Tupã pe Túva Ijapyra’ỹva ha’eha ñande Ru. Jesucristo ha’e Ita’ýra Unihénito ha oikovéva, ñande Salvador ha Rredentor. Torýpe atestifika ko’ã añeteguágui, Ñandejára Jesucristo réra marangatúpe. Amén.