Wasɔre a Ayaresa wɔ Ne Ntaban ase:

Yɛn nyinaa ani gye afirim afi abasɛm ho. Yɛte ayɛsɛm fa ahwehwɛfoɔ akokoɔdurufoɔ a wɔn nhyɛma butuo, ne nnipa nkaeɛ a ɛmfa ho ne akwansideɛ ne gyidie a ɛnni hɔ nyinaa akyi wɔtumi gyina ho, na yɛbisa yɛn ho sɛ, “Anka mɛtumi ayɛ saa anaa?”

Deɛ ɛba m’adwene mu ntɛm so ne Enyiresi adehwehwɛfoɔ-kwantuni Ernest Shackleton ne ne suhyɛn HMS mu adwumayɛfoɔ Boasetɔ, nhyɛmabutuo wɔ Antaateke nsukyeneeɛ mu na wɔkɔkaa supɔ bi a hwee nni so so bɛyɛ mfeɛ mmienu. Tebea katee mu mpo, Shackleton nnamyɛ gyinaeɛsie akwankyerɛ gyee ne dɔm no nkwa.

Afei medwene Apollo 13 a ɛnenam wiem sɛ ɛbɛkɔ akɔsi bosome so! Nanso atoyerɛnkyɛm siiɛ berɛ a dadeɛ-toa bi a mframa pa a nnipa home na ɛwɔ mu paaeɛ, na wɔn akwantuo no gye guuiɛ. Wɔn mframa so teeɛ no, adwumayɛfoɔ ne akwantuo hwɛsofoɔ no nam nyansakwan so de wiem akwantufoɔ baasa no nyinaa sane bɛsii asase so a obiara ho anka.

Medwene kwan nwanwasoɔ a ankorankoro ne mmusua a ɔko adi wɔn nya, wɔde wɔn gu nsraban mu anaa wɔbɛdane adwanefoɔ, a wɔde akokoɔduro bɔ mmɔden boa ma wɔn mfɛfoɔ amanehunufoɔ kɔ so nya anidasoɔ, wɔkyerɛ papayɛ mpo berɛ a wɔhyia atirimuɔdensɛm, ne wɔn a kwan bi so wɔhwɛ boa afoforɔ ma wɔgyina da koro ka ho, tumi gyina a, na ɛyɛ me nwanwa.

Me ne wo bɛtumi agyina tebea a ɛtra so yi mu baako mpo ano anaa?

Ebia mo mu binom hwɛ wɔn a wɔtumi gyina ayɛsɛm no, na mo akra de yea team sɛ mogu so gyina bi mu seesei ara sɛ ɛyɛ ateetee mu amanehunu, totwene, nhyɛsoɔ, efie abɔnefosɛm, anaa amanehunu biara a ɛte sei. Worepere yɛ deɛ wobɛtumi biara de agyina tebea bi a ɛte sɛ nhyɛma-butuo amanehunu ano anaa botaeɛ bi a na anidasoɔ wom na agye agu mpofirim. Wɔbɛtumi agye wo afiri mu; wo ara wobɛtumi afiri mu afi?

Mmuaeɛ no yɛ aane. Wobɛtumi agyina. Nokwasɛm ne sɛ wɔagye wo dada; wɔagye wo nkwa dada—deɛ Wafa ateetee korɔ no a worefa mu na wagyina yea korɔ no a wonam mu bi no agye wo.¹ Yesu adi wiase yi ateetee so nkonim² a ɛbɛma wo tumi a ɛnyɛ sɛ wode bɛgyina nko ara, na mmom da bi, ɛnam Ne so, wobɛdi nkonim na mpo woadi so—na yea no, awerɛhoɔ no, ahoyera no renhyɛ wo so bio, na wobɛhunu sɛ asomdwoeɛ na abɛhyɛ ananmu.

Ɔsomafoɔ Paulo bisa sɛ:

“Hwan na ɔbɛtete yɛne Kristo dɔ mu? ahohia anaa ahometeɛ anaa ɔtaa anaa ɛkɔm anaa adagya anaa amanenya anaa nkrantɛ?

“Daabi, yeinom nyinaa mu yɛyɛ nkonimdifoɔ boro so ɛnam deɛ ɔdɔɔ yɛn no nti.”³

Wobɛkae berɛ a Titenani Russell M. Nelson maa ɔfrɛ a ɛdidi soɔ yi wɔ amansan nhyiamu ase. Ɔkaa sɛ: “Berɛ a wosua wo twerɛnsɛm no, mehyɛ wo nkuran sɛ twerɛ deɛ Awurade ahyɛ bɔ sɛ Ɔbɛyɛ ama Israel a wɔwɔ apam no nyinaa to hɔ. Menim sɛ ɛbɛyɛ wo nwanwa!”⁴

Yeinom yɛ bɔhyɛ a tumi wɔ mu na ɛma awerɛkyekyerɛ a yɛn abusua hunuiɛ no mu kakrabi. Susu sɛ Awurade reka saa nsɛm yi kyerɛ wo—kyerɛ mo a mote ase—ɛfiri sɛ ɛyɛ mo dea:

Nsuro.⁵

Menim mo awerɛhoɔ, na maba sɛ merebɛgye mo.⁶

Merennya mo.

Me din wɔ mo so, na m’abɔfoɔ hwɛ mo so.⁸

Mɛyɛ anwanwadeɛ wɔ mo ntam.⁹

Mo ne me nnante; sua me; mɛma mo ahome.¹⁰

Mewɔ mo ntam.¹¹

Mo yɛ me dea.¹²

Saa awerɛhyem a ɛwɔ yɛn adwene mu no nti, mepɛ sɛ mekasa kyerɛ wɔn a ɛyɛ wɔn adwene sɛ ɛkwan biara nni hɔ sɛ wɔn ankasa bɛtumi agyina, ɛsiane afoforɔ abɔnefosɛm nti . Sɛ yei na mogyina mu a, yɛsu ma mo. Yɛhia mo yie sɛ mobɛdi anisotan, fɛreɛ, ne suro no so, na yɛpɛ pa ara sɛ, ɛnam Yesu Kristo so, mobɛdi nkonim.

Sɛ woakɔ amanehunu, ɔhaw, atirimuɔdensɛm anaa nhyɛsoɔ bi mu pɛn a, ebia wobɛnya adwene bi sɛ kwan bi so no na ɛyɛ wo mfomsoɔ enti wofata sɛ wosoa saa animguaseɛ ne afɔbuo a wote nka no. Wobɛtumi anya adwene bi te sɛ:

• Na anka mɛtumi asi yei kwan.

• Onyankopɔn nnɔ me bio.

• Obiara rennɔ me bio da.

• Masɛe aboro so.

• Agyenkwa no Mpata no wɔ hɔ ma afoforɔ na ɛnyɛ me.

Saa adwennwene bebrebe ne atenka yi bɛtumi ayɛ akwansideɛ sɛ mobɛhwehwɛ mmoa afiri abusua, ayɔnkofoɔ, akannifoɔ, anaa animdefoɔ hɔ, enti mo nko ara na moako. Sɛ anka moahwehwɛ mmoa afiri wɔn a mogye wɔn die hɔ a, ebia anka mobɛkɔ so adwennwene animguaseɛ ho na moatane mo ara mo ho mpo. Nkɛntɛnsoɔ a saa nneɛma yi wɔ bɛtumi aka hɔ mfeɛ bebree. Wowɔ anidasoɔ sɛ da koro bi ɛbɛyɛ yie, nanso kwan bi so saa da no nnya mmaeɛ

Na amanehunu no nnyɛ, seesei ɛnyɛ, na ɛrenyɛ wo mfomsoɔ da, ɛmfa ho ne nea otirimuɔdenfoɔ no anaa obi aka a ɛne no bɔ abira. Sɛ woahunu amane wɔ atirimuɔdensɛm, mogyafra anaa bɔne foforɔ bi mu a, ɛnyɛ wo na wohia sɛ wosakyera; ɛnyɛ w’asodie.

Wontɔ sini sɛ wo sombo anaa mfasoɔ anaa wɔdɔ wo mu sɛ onipa, anaa sɛ Onyankopɔn babaa anaa babarima, ɛnam nea obi foforɔ de ayɛ wo nti.

Onyankopɔn nhunu seesei, na Ɔnhunuu wo da sɛ obi a ɛwɔ sɛ wɔtane no. Deɛ ato wo biara, wo ho ɛnyɛ No aniwu ɛna Ɔnni wo ho yea. Ɔdɔ wo wɔ kwan a wonnya nhunuuiɛ so. Na wo bɛ hunu wɔ berɛ a wowɔ gyidie wɔ Ne bɔhyɛ mu na wosua sɛ wogye No di berɛ a Ɔka sɛ wo “sombo wɔ [N’ani] so.”¹³

Ɛnyɛ nneɛma bɔne a wɔde ayɛ wo no na wɔde hyɛ wo nso. Deɛ wɔde hyɛ wo nso, nokorɛ mu kann, ne wo ɛnni awieɛ su a ɛwɔ hɔ sɛ Onyankopɔn babarima anaa babaa, ne wo Bɔfoɔ no dɔ a ɛwie pɛyɛ, ɛnni ano ne ɔfrɛ a ɛkɔ ayaresa a ɛdi mu mu.

Ɛwom sɛ ɛbɛyɛ te sɛ deɛ ɛrentumi ɛnyɛ hɔ, wobɛte nka sɛ ɛrentumi ɛnyɛ hɔ, ayaresa bɛtumi aba ɛnam ɔgyeɛ tumi nwanwasoɔ a ɛfiri Agyenkwa no Mpata no, ɔno a wasɔre “na ayaresa wɔ ne ntaban ase.”¹⁴

Yɛn Agyenkwa mmɔborɔhunufoɔ a wadi nkonim wɔ esum ne ahohwibra so no, wɔ tumi sɛ ɔsiesie deɛ asɛe nyinaa nokorɛ a ɛma wɔn a afoforɔ afom wɔn ahoɔden. ¹⁵

Mesrɛ hunu sɛ Agyenkwa no aba fam afa nneɛma nyinaa mu, mpo deɛ ato wo no. Ne saa nti, Ɔnim sɛdeɛ ahudeɛ ne animguaseɛ teɛ ankasa ne sɛdeɛ ɛteɛ sɛ wɔbɛpo wo na w’aba mu abu.¹⁶ Agyenkwa no firi Ne mpata amanehunu bunu no mu ma wo anidasoɔ a na wodwene sɛ ayera afebɔɔ, ahoɔden a wogye di sɛ anka worentumi nnya da, ne ayaresa a woansusu sɛ ɛbɛtumi ayɛyie.

Akwanya biara nni hɔ ma nhyɛsoɔ—honam, ɔbaa ne ɔbarima nna, atenka anaa kasa mu—wɔ efie biara, ɔman biara anaa amammerɛ biara mu. Biribiara nni hɔ a ɔyere, ɔba anaa okunu bɛyɛ anaa bɛka a ɛma “ɛfata” sɛ wɔhwe wɔn. Obiara nni ɔman anaa amammerɛ biara mu, a “ɔrehwehwɛ” sɛ obi a ɔwɔ tumidie anaa obi a ɔso anaa ne ho yɛ den kyɛn no bɛhunahuna no anaa bɛhyɛ ne so.

Wɔn a wɔyɛ nhyɛsoɔ na wɔhwehwɛ sɛ wɔde wɔn bɔne akɛseɛ hunta no bɛnya wɔn ti adidi mu berɛ tiawa bi mu. Nanso Awurade a ɔhunu biribiara no nim nnwuma ne adwene ne nsusuiɛ a ɛwɔ akoma mu.¹⁷ Ɔyɛ atɛntenenee Nyankopɔn, na N’atemmuo kronkron bɛyɛ adwuma.¹⁸

Anwanwasɛm ne sɛ, Awurade sane yɛ Onyankopɔn a ɔwɔ ahummɔborɔ ma nokorɛ ahonufoɔ. Nhyɛsoɔfoɔ—wɔn a berɛ bi obi nso hyɛɛ wɔn so ka ho—a wɔpae mu ka, po wɔn bɔne, na wɔyɛ biribiara a wɔbɛtumi de yɛ akatua ne nhyɛananmu, wɔ bɔnefakyɛ ho kwan ɛnam Yesu Mpata nwanwasoɔ no nti.

Na deɛ wɔtwa atorɔ to ne so no, saa kwaadubɔ yi ho abotesɛm a ɛmu yɛ duru de ɛno ara tebea bɔne ba. Na wɔahyira wɔn nso ɛnam Agyenkwa no nnyinahɔma amanehunu ma wɔn ne nimdeɛ sɛ awieɛ no nokorɛ bɛda adi.

Nanso nhyɛsoɔfoɔ a wɔnnya ahonu bɛgyina Awurade anim abu wɔn atirimuɔden amumuyɛ ho akonta.

Awurade ankasa ama ɛmu ada hɔ fann wɔ N’afɔbuo wɔ nhyɛsoɔ biara ho: “Na obiara a ɔbɛto saa nkumaa a wɔgye me die yi mu baako suntidua no, ɛyɛ ma no sɛ wɔde awiyammoɔ sɛne ne kɔn mu, na wɔkɔdɔ no asukɔ wɔ ɛpo bunu mu.”¹⁹

Ayɔnkofoɔ adɔfoɔ a wɔapira mo pii—ne obiara a wakɔ asisie mu wɔ abrabɔ mu—mobɛtumi anya ahoɔden foforɔ ne nhyɛaseɛ foforɔ. Wɔ Getsemane ne Nitireso no, Yesu “faa ahoyera ne amanehunu nyinaa a me ne wo afa mu pɛn too Ne ho so,”²⁰ na Wadi ne nyinaa so nkonim! Agyenkwa no atrɛ N’abasa mu rema wo ayaresa akyɛdeɛ. Sɛ wode w’ani si Ne so wɔ akokoɔduro, aboterɛ ne nokorɛdie mu a, ɛrenkyɛre biara wobɛtumi agye saa akyɛdeɛ yi nyinaa. Wobɛtumi agyae wo yea no mu ato Ne nan ase.

W’Agyenkwa ɔyamyɛfoɔ no paee mu kaa sɛ, “Owifoɔ mma, gye sɛ ɔrebɛwia na wakum, na wasɛe; me deɛ maba sɛ [wo] bɛnya nkwa, na [wo] anya no mmoroso.”²¹ Wote ase, wobɛtumi anya ayaresa, na wobɛtumi anya awerɛhyem sɛ ɛnam Yesu Kristo tumi ne adom no nti, wobɛdi so na woayɛ nkonimdifoɔ.

Yesu aben wɔ deɛ ayɛ sɛ ɛrentumi ɛnyɛ yie mu. Ɔbaa ha bɛmaa deɛ na ɛrentumi ɛnyɛ yie no yɛɛ yie, gyee deɛ na wɔgye no a ɛnnyɛ yie, saa deɛ na wɔsa no yadeɛ a ɛnnyɛ yie yadeɛ, siesiee deɛ na wɔsiesie no a ɛnnyɛ yie, hyɛɛ deɛ na wɔhyɛ no bɔ a ɛnnyɛ yie bɔ.²² Na Waben wɔ mu yie. Nokorɛ, Ɔwie pɛyɛ wɔ mu. Wɔ Yesu Kristo, yɛn Yaresafoɔ no din mu, amen.

Sɛ wopɛ nsɛm ne akadeɛ bebree a, hwɛ “Ateetee” a ɛwɔ Abrabɔ Mmoa fa wɔ ChurchofJesusChrist.org ɛne Asɛmpa Nwoma Akoraeɛ afidie mu.