Faia o le Eseta o se Taimi e Manatua ai le Faaola

Aperila 2023

“Faia o le Eseta o se Taimi e Manatua ai le Faaola,” Liahona, Ape. 2023.

Faia o le Eseta o se Taimi e Manatua ai le Faaola

Saunia e Eric D. Huntsman ma Trevan G. Hatch

Fuaiala, Iunivesite a Polika Iaga

O nisi nei o faigalotu i aso taitasi—mau fautuaina, faatufugaga, ma musika—e fesoasoani ia te oe e saunia ai faaleagaga mo le Eseta.

Ata

o le Keriso toetu ma le au soo

Keriso le Faamafanafana, saunia e Carl Bloch

Mo le toatele o i tatou, o le faamanatuina o le soifua mai o Iesu i le Kerisimasi e sili atu ona masani nai lo le faamanatuina o Lona puapuagatia, maliu, ma le Toetu i le Eseta. O tu masani ma fiafia o le Kerisimasi e amata i le amataga o Tesema. Ae e tatau ona tatou manatua le mea na aoao mai e Peresitene Gordon B. Hinckley (1910–2008): “Semanu e leai se Kerisimasi pe ana leai se Eseta. O le pepe o Iesu o Peteleema o le a pei o se isi lava pepe e aunoa ma le Keriso togiola o Ketesemane ma Kalevaria, ma le manumalo moni o le Toetu.”¹

Talu ai nei lava, i le Aso Sa o le Laupama i le 2021, na valaaulia ai i tatou e Peresitene Russell M. Nelson e fai le vaiaso a o lumanai le Eseta ia sili atu ona paia:

“I le mavae o mea uma na faia e Iesu Keriso mo outou, ou te valaaulia outou e faia se mea i lenei vaiaso e mulimuli ai i Ana aoaoga. …

“O lenei Eseta, ou te uuna’ia outou ia taulai atu i le Faaola.”²

O nisi nei o fautuaga e fesoasoani ia te oe e taulai atu ai i le Faaola i le āluga o le vaiaso a o lumanai le Eseta. E ui ina iloa e le au atamamai i totonu ma fafo atu o le Ekalesia e lē mafai ona tatou mautinoa i taimi uma po o fea tonu aso na tutupu ai nei mea, ae o le mea ua tatou saunia o se faasologa o faigalotu i aso taitasi.³ E tuuina atu ai i tagata taitoatasi ma aiga se mea e suesue ma manatua mo aso taitasi o le vaiaso e tau atu i le Eseta.

Ua matou faaaogaina nei manatu i o matou lava aiga mo ni nai tausaga ma ua iloa ai e aogā. E lē o se polokalama aloa’ia lenei a le Ekalesia, ae matou te lagona o le saunia ma le loto i ai mo le Eseta e mafai ona fesoasoani ia i tatou e faamalosia ai lo tatou faatuatua ma tumau le faatotonugalemuina o Keriso i le aso malolo. O le tuufaatasia o se suesuega o tusitusiga paia i aso taitasi e uiga i le vaiaso mulimuli o le soifuaga o le Faaola ma le mafaufau loloto, tatalo, musika, faatufugaga, ma tu masani anoa e mafai ona avea ma se tu masani musuia faaletagata lava ia pe faaleaiga.

Ata

O Keriso o loo tietie i se asini i Ierusalema a o patipatia e soo

O Le Malaga Faatupu a Keriso i Ierusalema, saunia e Harry Anderson

Aso Sa o le Laupama

O le Aso Sa a o lumanai le Eseta e tatalaina ai le vaiaso mulimuli o le soifuaga o le Faaola e ala i le faamanatuina o le ulufale atu o Iesu i Ierusalema a o talotalo e Ona soo lālā o pama ma tautino atu o Ia o le Tupu.

E pei ona ta’ua e Elder Dieter F. Uchtdorf o le Korama a Aposetolo e Toasefululua, “E fetaui lelei i le aluga o le vaiaso mai le Aso Sa o le Laupama i le taeao o le Eseta le liliu atu ai o o tatou manatu ia Iesu Keriso, o le puna o le malamalama, ola, ma le alofa.”⁴ E ala i le manatuaina o le taimi e tasi i Lana galuega lea na iloa ai e le toatele o Iesu o le Tupu moni lava o Ia, e mafai ai ona tatou tulimatai atu i Lona Afio Mai Faalua mamalu, pe a afio mai o Ia e pule ma nofotupu i le lalolagi atoa.⁵

Tusitusiga Paia

Malaga Faatupu: Mareko 11:1–10; po o le Mataio 21:1–11; Luka 19:28–40; Ioane 12:12–19
O le uluai auega a Iesu i Ierusalema: Luka 19:41–44
Iesu ma le malumalu: Mataio 21:12–17; po o le Luka 19:45–48

Autu mo Talanoaga e Ono I Ai

O le a faapefea ona tatou faaaogaina lenei vaiaso e saunia ai mo le Eseta?

Faatufugaga

Minerva Teichert, O Keriso o Loo Ulufale Atu i Ierusalema
Walter Rane, Malaga Faatupu

Musika

“Mamalu ma le Viiga Atoa” (Viiga, nu. 42)
“Hosanna” (Children’s Songbook, 66–67)

Ata

O Iesu o loo savali i tafatafa o le mati

O Le Laau o le Mati ua Fetuuina, saunia e James Tissot

Aso Gafua

O leMareko 11 o loo tusia ai le fetuuina e Iesu o le laau o le mati e leai se fua. O le faafesootaiina o lenei vavega i le faamamaina o le malumalu, atonu o loo fautuaina mai e Mareko le teenaina o i latou o e fai mai o le nuu o le Atua ae le fua mai i o latou lava olaga. O le manatunatu i faatinoga ma aoaoga a Iesu i mau nei e saunia ai i tatou e faamanatu Lona manumalo i le agasala ma le oti ma faasino atu o tatou mafaufau i Lona toe afio mai ma le mamalu ma le nofotupu i le lumanai.

Na saunoa mai Elder Neil L. Andersen o le Korama a Aposetolo e Toasefululua: “Tatou te olioli faatasi ma Kerisiano i le lalolagi atoa i Lona Toetu mamalu ma i lo tatou lava toetu folafolaina. Tau ina ia tatou saunia mo Lona afio mai e ala i le faataitaia pea lava pea o nei mea mamalu i o tatou lava mafaufau ma i latou tatou te alolofa i ai. … Ou te molimau atu o loo soifua o Ia. ‘Le Tupu o tupu, Afio Mai’ [Viiga, nu. 25].”⁶

Tusitusiga Paia

Fetuuina o le laau o le mati: Mareko 11:12–14, 20–26; po o le Mataio 21:18–22
Faamamāina o le malumalu: Mareko 11:15–19
Aoao atu i le malumalu: Luka 19:47–48
Teenaina o Isaraelu e lē talitonu: Mareko 11:27–12:12; po o le Mataio 21:23–22:15; Luka 20:1–19
Iesu ma le itula o le a oo mai: Ioane 12:20–36

Autu mo Talanoaga e Ono I Ai

O a ni auala tatou te vaaia ai o tatou olaga o fua mai i fua lelei?
E mafai faapefea ona tatou uuina i luga Iesu Keriso o se malamalama i le lalolagi?
O le a se mea ua aoao mai e le faamamāina o le malumalu ia i tatou e uiga i le tāua o le malumalu?

Faatufugaga

James Tissot, Ua Maliu Atu Iesu i Petania i le Afiafi
James Tissot, Ua Fesiligia e le Au Faresaio ia Iesu

Musika

“Le Tupu o tupu, Afio Mai,” (Viiga, nu. 25)
“Beautiful Savior” (Children’s Songbook, 62‒63)
“We Love Thy House, O God” (Hymns, nu. 247)
“Ou Te Fia Vaai i le Malumalu” (Tusipese a Tamaiti, 99)

Ata

O Iesu o loo silasila atu i le aai o Ierusalema

Ierusalema e, saunia e Greg K. Olsen

Aso Lua

Sa fesiligia e taitai faalelotu ma faaupufai i Ierusalema ia Iesu, ma taumafai e saili masei ia te Ia. I le taimi foi lenā, na iloilo ai e ositaulaga i le malumalu ni tamai mamoe mo ni pona a o le’i oo mai le tausamiga o le Paseka. Sa ave foi e Iesu nisi o Ona soo e sili ona latalata i le Mauga o Olive, lea na Ia valoia ai le faatafunaga o le a oo mai o Ierusalema ma le faatafunaga mulimuli o e amioleaga i le iuga o le lalolagi.

E tusa ai ma le faamasinoga i lena aso, na aoao mai ai Peresitene Dallin H. Oaks, Fesoasoani Muamua i le Au Peresitene Sili: “Afai sa tatou iloa o taeao le aso tatou te faafetaia’i ai i le Alii … o le a sa tatou mea e fai i le asō? … Ou te molimau atu o le a afio mai o Ia, e pei ona Ia folafola mai. Ma ou te tatalo o le a tatou saunia e fetaia’i ma Ia.”⁷

Tusitusiga Paia

Taumafaiga e pu’e Iesu i Ana fetalaiga: Mareko 12:13–37; po o le Mataio 22:15–46; Luka 20:20–47
O lapataiga faaperofeta e fitu: Mataio 23:13‒36
O le taulaga a le fafine ua oti lana tane: Mareko 12:41–44; po o le Luka 21:1–4
O le auega lona lua a Iesu i Ierusalema: Mataio 23:37‒39
Mauga o Olive: Mareko 13:1–37; po o le Mataio 24–25; Luka 21:5–38
Aotelega o aoaoga a Iesu: Luka 21:37–38; Ioane 12:37–50

Autu mo Talanoaga e Ono I Ai

O a mea ua aoao mai ia i tatou e faataoto i taupou e toasefulu ma mamoe ma ‘oti e uiga i mea e tatau ona tatou faia e saunia ai mo le Afio Mai Faalua?
E mafai faapefea ona tatou tuuina atu a tatou mea uma i le Alii pe a tatou alolofa ma auauna atu i isi?

Faatufugaga

Liz Lemon Swindle, O Le Tupe Iti a le Fafine ua Oti Lana Tane

Musika

“Ieova, le Pule o Mea Uma,” (Viiga, nu. 144)
“Pe A Ia Toe Afio Mai” (Tusipese a Tamaiti, 46–47)

Ata

tamaitai o loo vaai a’eia Iesu

Auā ua Alofa Tele Mai o Ia, saunia e Jeffrey Hein

Aso Lulu

O leMareko 14 o loo tusia ai le taupulepulega a taitai o Ierusalema e faasaga i le maliliega a Iesu ma Iuta le Sekara e faalataina le Faaola. Peitai, i le va o nei tala e lua, o loo i ai le vaaiga matagofie lea e ulu atu ai se fafine i se tausamaaga i Petania ma mulumulu Iesu. E lē gata ina sa ia saunia Iesu mo Lona tanuga o le a oo mai, ae sa foliga mai foi na i ai sana molimau o Ia o le Tupu faauuina ma le Faaola o le lalolagi.

E tusa ai ma le faatinoga o le auaunaga a lenei tamaitai, na saunoa ai Peresitene Linda K. Burton, o lē sa avea muamua ma Peresitene Aoao o le Aualofa: “Tau ina ia tatou … aapa atu i le lotogatasi e fesoaosani ia i latou o loo mafatia pe a tatou malolosi ma musuia e faia lena mea. Masalo e faapea se tasi e uiga ia i tatou, e pei ona fetalai le Faaola e uiga i se tuafafine alofa na auauna atu ia te Ia: “O le mea lelei ua faia e ia. … Ua fai e ia le mea ua ia mafai ai’ [Mareko 14:6, 8].”⁸

Tusitusiga Paia

O le taupulepulega e fasioti Iesu: Mareko 14:1–2; po o le Mataio 26:1–5; Luka 22:1–2
Ua mulumulu e se fafine e le’i ta’ua lona igoa ia Iesu: Mareko 14:3–9; po o le Mataio 26:6–13
Ua ioe Iuta e faalata Iesu: Mareko 14:10–11; po o le Mataio 26:14–16; Luka 22:3–6

Autu mo Talanoaga e Ono I Ai

E mafai faapefea ona tatou tumau faamaoni i le Faaola e ui lava i le tetee mai o le lalolagi?
O le a se mea e mafai ona tatou faia e auauna atu ai i isi i ni auala laiti ma anoa?

Musika

“Le Alofa o le Alo” (Viiga, nu. 166). O lenei viiga e aofia ai laina matagofie, “Le alofa e mau ai aiga, / Ua pele ai oe ia te au, / Le alofa e tumau e faavavau— / To mai ‘ou tumu ai.” O lenei viiga e faasino i le alofa “e liliuina ai le oona i le suamalie” ma suia le “fili i se uo” e ese mai ia Iuta, o lē na liliuese mai lana uo i lena po.

Faatufugaga

James Tissot, Taupulepulega a Iutaia
James Tissot, O Le Talisuaga i le Fale o le Faresaio

Ata

O Iesu o loo tatalo i Ketesemane

Keriso i Ketesemane, saunia e Dan Burr

Aso Tofi

O le afiafi a o le’i faasatauroina o Ia, sa talisua faatasi Iesu i le Tausamaaga Mulimuli ma Ona soo. I lenei talisuaga, sa Ia faatuina ai le faamanatuga, mulumulu vae o Ana uo, ma tuuina atu Ana aoaoga faaiu. Ona Ia tatalo faatauanau lea i le Tama i le Faatoaga o Ketesemane, ma gaua’i atu i Lona finagalo ma tauave i Ona lava luga a tatou agasala, vaivaiga, lototigā, tigā, ma faanoanoaga. Ina ua uma ona faalataina e Iuta le Sekara ma tuulafoaiina e Ana uo, sa pu’e faapagotaina Iesu ma avatu i le faitaulaga sili ma isi taitai Iutaia, lea sa fesiligia ma sauāina ai o Ia.

Sa ta’ua e Elder Jeffrey R. Holland o le Korama a Aposetolo e Toasefululua lenei mea “o le malaga aupito tuuatoatasi na faia”⁹ ma ta’ua ai e faapea “o itula ua vave oo mai … na sui ai le uiga o le talafaasolopito atoa o tagata soifua. … Ua oo mai le taimi o le taulaga togiola. O le Alo lava o le Atua, o lona Alo e Toatasi na Fanaua i la le tino, o le a avea ma Faaola o le lalolagi.”¹⁰

Tusitusiga Paia

O Le Talisuaga Mulimuli: Mareko 14:12–31; po o le Mataio 26:17–35; Luka 22:7–38; Ioane 13:1–30; faatusatusa i le 1 Korinito 11:23‒26
O lauga faamavae: Ioane 13:31–17:26
O Iesu i Ketesemane: Mareko 14:32–42; po o le Mataio 26:36–47; Luka 22:39–46; Ioane 18:1
Faalataina ma le pue faapagotaina o Iesu: Mareko 14:43–52; po o le Mataio 26:47–56; Luka 22:47–53; Ioane 18:2–11
O Iesu i luma o taitai Iutaia: Mareko 14:43–65; po o le Mataio 26:57–68; Luka 22:54–71; Ioane 18:12–28

Autu mo Talanoaga e Ono I Ai

O a faamanuiaga tatou te maua e ala i le aai ma feinu i le faamanatuga i vaiaso taitasi? O le a le mea o faatusa i ai le areto ma le vai i aso nei?
Faasoa atu a outou molimau i le Togiola a Keriso i le tasi ma le isi (e mafai foi ona e faitauina le Alema 7:11–13 po o le Mataupu Faavae ma Feagaiga 19:15–20).

Faatufugaga

Carl Bloch, O Le Faafitiga a Peteru
Walter Rane, Tou te Faia Le Mea Nei e Fai ma Faamanatuga ia te Au

Musika

O se viiga faamanatuga e fiafia i ai (tagai Hymns, nu. 169–96)
Movements 9‒38 of Bach’s St. Matthew Passion
Beethoven’s Christ on the Mount of Olives

Ata

Iesu i luga o le satauro

Keriso i luga o le Satauro, saunia e Carl Bloch

Aso Faraile

I lena aso mulimuli o le soifuaga faaletino o Iesu, sa fesiligia ai o Ia, suesueina, tauemuina, sauāina, ma faasalaina i le faasatauroga. I luga o le satauro, sa faamaea ai e Iesu Lana taulaga togiola, ma tuuina mai ai Lona soifua mo i tatou uma. Mulimuli ane, sa falelauasi o Ia i se tuugamau na saunia e Iosefa le Arimataia.

I nei mea na tutupu, na aoao mai ai Peresitene M. Russell Ballard, le Sui Peresitene o le Korama a Aposetolo e Toasefululua: “E leai se tasi na i ai le mana e aveeseina ai le soifua o le Faaola mai ia te Ia. … Sa Ia tuuina atu o Ia lava e sasaina, faalumaina, puapuaga, ma mulimuli ane faasatauroina ona o Lona alofa tele i le fanauga a tagata (tagai 1 Nifae 19:9–10).”¹¹

Tusitusiga Paia

Iesu i lima o tagata Roma: Mareko 15:1–20; po o le Mataio 27:1–31; Luka 23:1–25; Ioane 18:29–19:16
Ua faasatauroina Iesu: Mareko 15:21–32; po o le Mataio 27:32–44; Luka 23:26‒43; Ioane 19:17‒24
O toe taimi ma upu a Iesu i le olaga nei: Mareko 15:33–36; po o le Mataio 27:45–49; Luka 23:44; Ioane 19:25‒29
Maliu ma le falelauasiga o Iesu: Mareko 15:37–47; po o le Mataio 27:50–66; Luka 23:45–56; Ioane 19:30‒42

Autu mo Talanoaga e Ono I Ai

E tele mea e mamanu ai o tatou aafiaga i le Eseta e ala i auala tatou te manatua ai le Faasatauroga o le Faaola. E tele mea e mafai ona fai e seti ai le leo e ala i ata o loo faaalia ma musika o loo tāina i totonu o tatou aiga i lenei aso. E ui e lē masani ona faaalia e le Au Paia o Aso e Gata Ai ni ata se tele o puapuaga po o le Faasatauroga o Keriso, o se aso lea e ono talafeagai ai le faaalia o ia faatufugaga. Tatou te lē tumau ai i le maliu o le Faaola po o le uiga sauā na Ia maliu ai. Nai lo lena, tatou te faamanatuina Lona manumalo i le oti.

Faatufugaga

Antonio Ciseri, Ecce Homo
Soo se vaaiga na faaalia mamana e James Tissot
Faauigaga o le Faasatauroga e pei ona faia e Carl Bloch, Harry Anderson, po o J. Kirk Richards

Musika

Movements 39‒68 of Bach’s St. Matthew Passion or all of his St. John Passion
Vaega 2 o le Mesiaa Handel
Movements from The Redeemer saunia e le fatupese o le Au Paia o Aso e Gata Ai o Robert Cundick
“O Savior, Thou Who Wearest a Crown” (Hymns, no. 197)
“Sa Faasatauro le Alii,” (Viiga,, nu. 96)
“E! Ua Maliu le Faaola,” (Viiga, nu. 99)
“E I Ai se Mauga Lanu Vao,” (Viiga, nu. 108)

Vitio

Asiasi i le BibleVideos.org e matamata ai i ata o le aso mulimuli o le soifuaga o Iesu, e aofia ai Lona faamasinoga ma le Faasatauroga.

Ata

O loo talai atu Iesu i le lalolagi o agaga

O Keriso o Loo Tala’i Atu i le Lalolagi o Agaga, saunia e Robert T. Barrett

Aso Toonai

A o taoto le tino o Iesu i le tuugamau, sa afio atu Lona agaga i le parataiso. O iina na Ia faatulagaina ai agaga o e amiotonu e faia le galuega faafaifeautalai i e ua maliliu. Faatasi ai ma galuega o le malumalu, ua maua ai le faaolataga mo i latou o e sa le’i maua se avanoa e talia ai le talalelei i lenei olaga (tagai Mataupu Faavae ma Feagaiga 138).

A tatou faia galuega o talafaasolopito o aiga ma le malumalu, tatou te auai faatasi ma Keriso i Lana galuega faaola. Sa aoao mai Peresitene Hinckley: “O mea e faia i le maota o le Alii … e latalata atu i le agaga o le taulaga a le Alii nai lo se isi lava gaoioiga ua ou iloa. Aisea? Ona e faia e i latou o e foai fua atu le taimi ma mea, e aunoa ma se faamoemoe mo se faafetai po o se taui, e faia mo isi mea e lē mafai ona latou faia mo i latou lava.”¹²

Tusitusiga Paia

Ua tuuina se leoleo i le tuugamau: Mataio 27:62–66
O faatusa o le faatafunaga ma le pogisa lea na ufitia ai le Lalolagi Fou i le maliu o Iesu: 3 Nifae 8–10
Ua molimau mai Iesu i Lona maliu ma le Toetu: 3 Nifae 9:14‒22
Ua afio atu Iesu i le lalolagi o agaga ma faatulaga Lana galuega iina: 1 Peteru 3:18–19; 4:6; Mataupu Faavae ma Feagaiga 138

Autu mo Talanoaga e Ono I Ai

Na faapefea ona faasaoina i tatou e le maliu ma le Toetu o Iesu Keriso mai se pogisa faafaatusa e talitutusa ma le pogisa na oo i ai tagata i le Lalolagi Fou?
O le a le mea na faia e le Faaola i le lalolagi o agaga a o i ai Lona tino i le tuugamau?
O a ni fuafuaga e mafai ona tatou faia e faia ai galuega o talafaasolopito o aiga ma auai i le malumalu?

Faatufugaga

James Tissot, O Le Leoleo i luga o le Tuugamau

Musika

Movements from The Redeemer saunia e le fatupese o le Au Paia o Aso e Gata Ai o Robert Cundick
Requiem saunia e le fatupese o le Au Paia o Aso e Gata Ai o Mack Wilberg

Ata

O Maria ma Iesu toetu

O Le Toetu, saunia e Harry Anderson

Aso Sa o le Eseta

O le suesueina o tala o le Toetu mai Evagelia, usuina o viiga o le Eseta i le lotu, ma le olioli i a tatou tu masani eseese o le Eseta o ni auala faapelepele ia o le faamanatuina o le manumalo o Iesu i le oti ma le vavega o le tuugamau avanoa.

Na molimau mai Peresitene Howard W. Hunter (1907–95): “I lenei faaiuga o le vaiaso matagofie ma le paia o le Eseta, e mautinoa lava e leai se aoaoga faavae o le a avea ma autu o le tele o lauga po o se faamoemoega e sili atu ona viia nai lo le taulaga togiola ma le toetu moni o le Alii, o Iesu Keriso. Ma e tatau foi ona i ai i le Eseta ma i isi vaitau uma o le tausaga, auā e leai se aoaoga faavae i le olaga Kerisiano e sili atu ona tāua i tagata uma nai lo le aoaoga faavae o le toetu o le Alo o le Atua. E ala mai ia te ia na oo mai ai le toetutu o tane, fafine, ma tamaiti uma na fananau mai—pe o le a fananau mai pea—i le lalolagi.”¹³

Tusitusiga Paia

O fafine ma le tuugamau avanoa: Mareko 16:1–8; po o le Mataio 28:1–10; Luka 24:1–11
Maria le Makatala, Peteru, ma le soo pele i le tuugamau: Luka 24:12; Ioane 20:1–10
Maria le Makatala ma le Alii toetu: Mareko 16:9–11; po o le Ioane 20:11–18
O soo e toalua i le ala i Emau: Luka 24:13–35; po o le Mareko 16:12–13
Uluai faaali atu i soo i Ierusalema: Luka 24:36–48; po o le Mareko 16:14; Ioane 20:20–25
Faaali atu ia Toma: Ioane 20:26–29
O le faamoemoega o le talalelei: Ioane 20:30–31

Gaoioiga

Faapotopoto faatasi ma ē pele mo se faigalotu faaleaiga ma se taumafataga faapitoa o aso malolo.
Ofo atu se tatalo faaleaiga ma faasoa atu molimau e uiga i le Toetu.
Alu i le lotu ma ai ma inu i le faamanatuga.

Faatufugaga

Minerva Teichert, Aua Le Pa’i Mai ia te A’u
Harry Anderson, Faauta i O’u Lima ma O’u Vae

Musika

“Ua Toe Tu Mai le Alii,” (Viiga, nu. 112)
“Ua Toe Tu mai o Ia!” (Viiga, nu. 111)
Vaega 3 o le Mesiaa Handel

Matou te faamoemoe o nei manatu o le a fesoasoani ia te oe e faaaoga ai le vaiaso a o lumanai le Eseta e faamanatu ai le soifuaga, maliu, ma le Toetu o Iesu. E pei lava o le faaaogaina o tusitusiga paia, faatufugaga, ma musika e tau atu i le Kerisimasi e mafai ona fesoasoani e faatumauina le faatotonugalemuina o Keriso i lena aso malolo, o le faia o lena mea i le Eseta e mafai ona fesoasoani tatou te manatua ai o Ia ma faamalosia ai lo tatou faatuatua ia te Ia.