Kinnig a ra Emglev bro Douarnenez ur staj e miz Ebrel evit deskiñ krouiñ en hor yezh. Anaëlle Le Pann, kenurzhierez, a zispleg deomp e peseurt mod e vo aozet ar staj-mañ.
Anaëlle Le Pann : Un ide a-gozh eo ! Pell zo e prederiomp diwar-benn ar mennozh-se. E 2019, pa oa bet aozet « An diaoul a gan » e Douarnenez, e oa bet pedet Kristian Duro, ur soner treujenn-gaol hag a zo kaner war un dro. Skrivet en deus kalz a destennoù. Soñjet hon eus ne vez ket lakaet a-walc’h war-wel an dud a skriv e brezhoneg. E-pad ur veaj e Korsika ez eus bet lakaet ar gaoz war an dra-se ivez. Divizet hon eus neuze aozañ un stummadur evit kinnig d’an dud en em stummañ hag eskemm diwar-benn an dra-se. Dalc’het e vo ar staj etre an 13 hag ar 15 a viz Ebrel.
Pedet hon eus daou arzour breton, Nolwenn Korbell ha Krismenn, hag a skriv o zestennoù e brezhoneg pell zo dija. Divizet hon eus ivez pediñ ur arzour all, Laurent Cavalié, ur c’haner ha skrivagner eus Okitania. Skrivañ a ra pozioù evit ar strollad « La mal coiffée » pe « De Bartàs ». Pep arzour a raio war-dro un devezh, met ar re all a vo war ar plas bemdez evit kemer perzh ivez. Komzet ‘vo diwar-benn al liamm gant ar skritur : petra skrivañ, penaos, peseurt liamm gant ar yezh. Evit Nolwenn Korbell eo ar brezhoneg he yezh-vamm. Ar pezh n’eo ket gwir evit Krismenn, hag en deus desket diwezhatoc’h. Evit Laurent Cavalié avat, eo an okitaneg yezh e vamm-gozh. Komzet ‘vo diwar-benn sonerezh ar yezh, al liamm etre ar muzik hengounel hag an hini a-vremañ.
Digor eo d’an holl, n’eo ket dav bezañ arzour pe arzourez. Da gentañ e oa bet aozet ar staj evit kanerien, kentoc’h : kavet e vez anezho e-leizh e Breizh met n’int ket ken niverus o krouiñ pozioù o-unan. Pe, da nebeutañ, n’eo ket un dra ‘kreiz ar jeu. Setu hon oa c’hoant da ginnig un dra bennak a glotfe, rak ur mank a zo war an dachenn-se. ‘Benn ar fin, eo kalz ledanoc’h. Bezañ zo tud o tont eus bed ar c’hoariva met ivez konterien pe kelennerien. C’hoant o deus da gaout binvioù nevez evit krouiñ barzhonegoù, testennoù, kanaouennoù.
Ur c’hoant bras zo, me ‘gav din. Ouzhpenn Emglev bro Douarnenez ez eus emglevioù all o labourat war an dachenn-se. Aozet ez eus bet ur staj e ti ar vro Kawan, gant Louis-Jacques Suignard, kaner e brezhoneg, ha Sylvain Girault, kaner e galleg, en diskar-amzer tremenet. Preder zo war an dra-se ! Evit ar re zo intereset gant hor stummadur, ret eo hastañ buan evit lakaat e anv. 12 plas zo d’ar muiañ tout. Kenaozañ a reomp ar stummadur-se gant Culture Lab 29, ajañs sevenadurel departamant Penn ar Bed. Moaien zo da arc’hantaouiñ ar stummadur dre aozadurioù micherel, war an amzer-labour.
Kenurzhierez : coordinatrice
Okitaneg : occitan
Binvioù : outils
Arc’hantaouiñ : financer
Aozadurioù : organismes.
Vous aimez la Bretagne ? Vous allez adorer l'application du Télégramme. Profitez d'une expérience de lecture personnalisée et d'un accès rapide à l'actualité de votre commune.
