Ur stal beloioù nevez zo bet digoret e miz Eost en Alre. Ar brezhoneg, ar velo hag an endro : setu gerioù-stur ar berc’henned !
D’ar 26 a viz Gwengolo e oa kêr an Alre leun gant veloioù e pep lec’h. Petra ‘oa kaoz ? Da geñver sizhunvezh european an diorren padus e oa bet aozet ur valeadenn 5 km da bourmen e kêr. E-touez ar beloioù war an hent, darn anezho a oa o tont eus ur stal nevez digoret en Alre : Velo Breizh. Un nebeud devezhioù a-raok, ur gerig war pajenn Facebook ar stal a ginnige d’an neb a gare : « Posibl a vo d’oh kémer é prest ur vélo ér stal Vélo Breizh ! » Gant un hanter-kant belo bennak er voutik, Kristell Béauto ha Kevin Blackwell, ur c’houblad o chom e bro an Alre, leun a startijenn enno, o deus digoret o stal e miz Eost tremenet. « Ni ‘oe sañset krogiñ e miz Meurzh, met n’eus ket bet moaian a-gaoz d’ar virus. Ur bochad beloioù, tredan pe klasel, zo bet feurmet ‘pad a hañv ! Tud a zeue hag a c’houlenne : chom a ra beloioù ? Pas ! Ha… geo, geo, unan a chom ! » a gont Kristell. A-benn nebeut e vo kinniget ivez produioù ar vro er voutik.
Divizet en doa ar c’houblad digeriñ ar stal-mañ goude un avañtur -war varc’h-houarn- e bro Dreger. « Se a grog gant un istor vakañsoù, a gont Kristell. Ar pal kentañ ‘oe monet da gerc’hat ur blakenn ‘’Kalon’’, hini skipailh ‘’En Avant de Guingamp’’, aveit hor mab, anvet Kalon ivez. » En em gavet e bro Dreger e kejont ouzh David, krouer ar stal ‘’Breizh velo’’ e Gwengamp, o feurmiñ, gwerzhañ ha kempenn beloioù a bep seurt. « E fin ar vakañsoù-se ‘omp distro amañ, hag hon eus pellgomzet. Ar voutik ‘oe dijabl ». Stalioù gevelet int deuet da vezañ. « Tapet hon eus aktionnoù pep hini e stal egile. Ni zo c’hoarezed, èl ur melezour », a zispleg Kristell. Ur cheñchamant buhez evit an daou, tad ha mamm daou vugel. Kristel a oa klañvdiourez a-raok ha Kevin a oa o labourat e skol Diwan Gwened.
Goude un hañvezh birvidik, ne seblant ket an daou berc’henn bezañ kollet o « begon ». Met labourat evit an douristed, n’eo ket ar pezh a fell dezho ober hepken : c’hoant o deus Kristell ha Kevin da ginnig o beloioù da dud ar vro, a-hed ar bloaz. « Moaien zo feurmiñ beloioù e-pad ar blead, evit monet da labourat », a zispleg Kevin. Mousc’hoarzhin a ra Kristell : « un den zo deuet da feurmiñ ur velo e-pad 6 miz evit heuliañ stummadur e Stumdi ! » Kemer a reont perzh ez e troiadoù war velo e brezhoneg, da geñver ‘’Bro Alré Gouil Bamdé’’, asambles gant Sten Kidna ha Ti ar roñsed-dir, ur gevredigezh nevez savet evit diorren ar velo er vro. « Ur stourm ekologel eo. Ul labour lec’hel ivez : pouezus-tre eo evidamp-ni », eme Kevin. Ur « Velorusion » vras a vo aozet zoken d’ar 17 a viz Here etre An Alre hag An Drinded. Kenaozet eo gant Velo Breizh ha kevredigezhioù ar vro evit lakaat ar gaoz diwar-benn plas ar velo er vuhez pemdeziek.
Roñsed dir : cheveaux d’acier
An diorren padus : le développement durable
Ur bochad : beaucoup
Dijabl : libre
Begon : énergie
La pratique assidue du vélo leur a donné des mollets d’acier et une volonté à toute épreuve. Kristell Béauto et Kevin Blackwell ont ouvert cet été à Auray, une boutique de location et de vente de vélos électriques ou classiques. Sur la vitrine, tout est écrit en breton !
Le succès a été au rendez-vous. Hors saison touristique, le couple entend aussi jouer la carte de la proximité : ici, on peut même louer un deux-roues pour se rendre au travail ! Velo Breizh participe également avec Sten Kidna et Ti ar Roñsed-dir, à des sorties vélos tous les dimanches durant le festival « Bro Alré Gouil Bamdé ». Qui à lieu jusqu’au 15 novembre.
Vous aimez la Bretagne ? Vous allez adorer l'application du Télégramme. Profitez d'une expérience de lecture personnalisée et d'un accès rapide à l'actualité de votre commune.
