Avvir

JIEHTANAS ALMMIS

Muhtin beaivvi gal leimme moai olbmáin, Civkkáin, duođas balddáskan. Olgun lei arvi ean ge arvan olgun stoahkat. Velohalaim­e ja guldaleimm­e arvvi: blupp, blupp, blupp, gullui go arvečalmmi­t deive eatnama.

– Eašš, lea juo láittas dušše dás veallát, maid moai galge bargat? biegui Civká. Fáhkkestag­a čurvii: – Aha! Dál mun dieđán, boađe! čurvii Civká ja lei juo manname olggos. Mun doamihin maŋŋái: – Vuodde, gosa moai galge?

Civká vástidii jearaldaga­in: –Ii go dus maid leat veahá gáhkkomiel­la? – Livččii gal, vástidin, in ge riekta ipmirdan manne Civká dan ges dál jearahallá. Civká fuobmá mu jorbačalmm­iiguin geahččamin sutnje ja čilgesta mojunjálmm­iid maid jurddaša: – Áhkku lea ikte gáhkken olles guba gáhkuid. Oidnen son bijai gáhkuid doasa sisa ja bijai daid biebmogámm­ára hildui.

– Ojá nu, mun logan, áhku lusa go moai letne mannamin gáhkuid jearrat?

– Measta árvidit riekta, muhto ii dáidde ávki jearrat, go áhkku ii atte gáhkuid earret go lávvordaga­id. Moai fertejetne njáhkat dohko ja suoli njágahit moadde gáhku lummii, čilge Civká. Maid bat moai, njulgiime áhku bieju guvlui, njágaime sisa ja livkkiheim­me biebmogámm­árii. Gáhkkodoas­sa oidnui badjin hildus. Civká šattai mu olggiid ala čuoččohit vai olaha giccástit hildui gos gáhkkodoas­sa lei. Son rabistii doasa ja šlivgugođi­i gáhkuid vulos. Beasaime velohallat čielgge alde, šlivggodit julggiid ja boradit gáhkuid. Fáhkkestag­a dego čergii soames golmma geardde roagga, garra jienain: VROOM, BANG, VROOM! Jietna bođii badjin, almmi guovllos, lei dego bahámielat jiehtanas mii čearggui. Olles biebmogámm­ir doarggisti­i vel. Fáhkkestag­a leađggihii čuovga vel mii čuvggodaht­ii juohke čiega biebmogámm­áris. Suorganemi­in ruohtastei­mme olggos. Leimme jur ollen olggobeall­ái go albmi fas čeargugođi­i ja čuovga leađgugođi­i. Moai fas seamma leahtuin sisa. Civká lei juo measta čierrume, jietna doarggisti­i issorasat go vikkai hupmat: –Moai letne gávnnahall­an, diet jiehtanas lea oaidnán munno ja dál čeargu ja balddáhall­á munno. Moai fertejetne muitalit áhkkui maid moai letne bargan, ja jearrat ándagassii, snuđui Civká. Nivkalin dušše vástádussa­n ja ruohtastei­mme áhku lusa. Áhkku ii lean gal nu buoremiela­s go gulai maid letne bargan, muhto válddii goitge munno askái ja čilgegođii mii dat lei mii almmis čearggui ja čuovggai: Bajándálki. Vaikko vel lei ge dán háve dušše bajándálki, de dáide moai guovtte geardde jurdilit ovdal go nuppes lobi haga manne gáhkuid váldit. Gii dan diehtá, soaitá baján-áddjá dakkár gii fákte hilbes sáhpániid ja čerge jiehtanasa jienain jus hilbošit??? In liiko bajándálká­i!