Sa festa de su tziculate artigianale imbatet a Aristanis pro sa de bator editziones.
Sa manifestatzione est organizada dae Chocomoments paris cun sa Pro Loco e cun su patrotzìniu de su Comune de Aristanis.
“Ocannu puru ant a èssere tres dies pro mannos e piticos, chi ant a batire gente meda – narat su sìndigu Massimiliano Sanna -. Dae chenàbura 25 a domìniga 27 de santandria sa Fàbrica de su Tziculate at a èssere in pratza de Citadi (piazza Eleonora) cun sos nuscos e sos sabores suos, s’animatzione pro sos pitzinnos e tantas ideas licantzas pro sos mannos”.
“Chocomoments torrat a Aristanis cun una proposta apretziada meda dae sa gente – agiunghet s’assessore a sas Atividades Produtivas Rossana Fozzi -. Sa manifestatzione, promòvida dae Chocomoments, chi nche leat s’arte durche de sos mastros de su tziculate a onni logu de Itàlia, biet su Comune de Aristanis e sa Pro Loco impignados a dare s’agiudu pro sa bona resurtada de s’initziativa. In programma b’at propostas meda: sa Fàbrica de su Tziculate, sa Mustra-mercadu e sa realizatzione de su tziculate a taulita de Guinness. In prus onni die bi sunt sos “Choco baby” pro sos pitzinnos, su “Cooking show” cun creatziones fatas in su momentu e sas letziones de tziculate”.
Su puntu tzentrale de sa manifestatzione at a èssere sa Mustra-mercadu de su tziculate artigianale cun sos mastros de su tziculate operativos in padilliones abertos chenàbura e sàbadu in oràriu 10,00-23,30 e domìniga in oràriu 10,00-20,00.
A intro de su padillione de sa Fàbrica de su Tziculate b’at a àere eventos dedicados a sa connoschèntzia e a su traballu cun su tziculate artigianale, e in manera particulare su laboratòriu pro sos prus piticos, su “Choco Baby”, abertu onni die in oràriu 15,30-17,30. Sos pitzinnos s’ant a pòdere improntare a preparare sos tziculateddos, bestidos in farda e capeddu e impreende sos trastos de traballu. Su laboratòriu est de 15-20 minutos, finidu e torradu a comintzare. Si pagat 7 èuros e non bi cheret prenotatzione.
Pro connòschere sos segretos de sa coghina s’ant a fàghere sos “Cooking show” a cura de sos mastros de su tziculate, in programma dae chenàbura a sas 6 de sero (h 18,00) cun unu momentu dedicadu a connòschere s’òpera mastra de sa durcheria viennesa, in ue su mastru nos imparat a fàghere sa turta Sacher.
Sàbadu a sas 6 de sero (h 18,00) b’at a àere un’ispetàculu in ue si preparat unu tziculate a taulita de 15 metros e, a sa fine, totus l’ant a pòdere assagiare gratis.
Domìniga a sa matessi ora s’at a fàghere sa “Pralina de Aristanis”, unu tziculateddu in editzione ispetziale e ùnica, fatu cun un’ingrediente tìpicu de su logu e dedicadu a sa tzitade.
Sàbadu e domìniga dae sas 10 a mesudie (h 10,00-12,00) sunt dedicados a sos mannos chi ant a imparare a fàghere sos tziculateddos partetzipende a mini-cursos de pralineria a cura de sos mastros de su tziculate Chocomoments (si pagat 30 èuros peròmine e bi cheret sa prenotatzione a s’indiritzu de posta eletrònica giancarlo.maestrone@gmail.com).
(GF.P.)
