Le bilanz dl'ultima sajun da d'invern toma fora positif pro i maestri de schi dl Trentin che á tigní süa radunanza anuala da d'aisciöda. Dötadöm él gnü porté dant dac che porta pro a na gran sodesfaziun.
Te val'raiun dai schi él gnü documenté n aumënt di sciori che é gnüs da fora dla Talia adalerch, alüsc ési ince rová al 50% á alzé fora le presidënt Mario Panizza.
Problematiches da afronté
L'ultima sentënza dl TAR
Nia mancé n'á val'crüze - insciö por ejëmpl l'ultima sentënza dl TAR de Trënt. Le tribunal aministratif regional á defat reconesciü le dërt temporan de podëi insigné tl Trentin a cater zitadins che á fat l'ejam d'abilitaziun tla Croazia y tla Slovenia, ince zënza zertificaziuns preodüdes a livel europeich, plü avisa l'Eurotest y l'Euorsecurité.
Deplü segurëza
Atra chestiun alzada fora é la segurëza sön les pistes, olache le presidënt dla categoria, Mario Panizza, damana na maiú verda y atenziun da pert dles forzes dl'ordin, insciö dla polizia y di carabiniers.
Mancianza de personal
Le cialzá drüca ince pro le personal. Tres demanco é i maestri de schi, dantadöt tles periodes de sajun alta. Debojëgn de maestri nüs y maestres nöies él inc epor chestiuns d'eté, ciodiche en proporziun él püc jogn che vëgn docá.
Tl Trentin él söporjö 40 scores de schi y assoziaziuns, cun passa 2.700 maestres y maestri spezialisá tl insegnamënt de schi alpin, paslunch y brëia.