partekatu
Azkoitiko PSE-EEk Etxebizitzaren Euskal Legea aplikatzea proposatu du eta abstenitu egin da EAJren ordenantza fiskalen proposamenaren aurrean
Sozialistak ez datoz bat Gobernu taldeak etxebizitza hutsei ezarritako errekarguarekin
Azkoitiko PSE-EE abstenitu egin da udalerri honetako EAJren gobernuak atzo onartu zituen tasak eta zergak igotzeko proposamenaren inguruan. Janire Igoa sozialisten bozeramaileak honakoa esan du: "nahiago genuen Etxebizitzaren Euskal Legea aplikatzea alokairuaren merkatua mugiarazteko eta bertako diru-sarrerak udalerrian bertan etxebizitza-politiketara bideratzeko".
Lege horretan ezarritako kanona 10 eurokoa da metro karratuko, eta % 10 handituko litzateke hutsik egondako urte bakoitzeko.
Igoak honako hau gogorarazi du: "Legeak alokairuaren merkatua mobilizatu nahi du, eta bide horretatik sortutako diru-sarrerak udalerri honetako etxebizitza- politiketara bideratzea bilatzen du. PSE-EE buru duen izaera aurrerakoi nabarmeneko legea da".
Sozialisten ustez, gainera, eguzki-plakak edo kargagailu elektrikoak jartzeagatik, OHZren hobarian etxebizitza edo industriarako 5 urtetan finkatutako 1.000 euroko gehieneko kopurua eskasa izan daiteke kasu batzuetan.
Azkoitiko PSE-EEk taxien tasak % 2,3 igotzearen alde bozkatu du; hori taxilariek urtero eskatzen duten ehunekoa da.
Sozialistek bozketan abstenitzea erabaki dute; izan ere, nahiz eta bat etorri tasak eta zergak igotzeko proposamen orokorra % 2koa izatearekin —KPIaren azpitik—, uste dute gobernu taldeak anbizio handiagoa izan beharko lukeela esparru sozialean.
