Türkiyä başqalasında Yosıf İslam (Йосыф Ислам) mizgelläre

1960nçı yıllarda yäş’lärneñ kumirı bularaq dan-şöhrät qazanğan Yosıf Kät Stivens bügenge köndä dä dönyaküläm tanılğan muzıkant.

İslam iñ berençe yazğan tanılğan cırlarınnan “First Cut is the Deepest”, annan soñ yazğan “Peace Train” häm “Wild World” kebek cırları belän cırçı häm süzlärneñ avtorı bularaq iskitkeç kar’yera yasadı.

İslam xätta 74 yäşendä dä säxnädä küz qamaştıra.

Salih Ärän Cäylan: “İskitkeç yaxşı ber kiç ide. Ayıruça minem kebek Yosıfnı balaçaqtan birle tıñlawçı beräw öçen mondıy sänğätçene säxnädä şäxsän kürü bik matur täcribä ide. Tamaşaçılar häm atmosfera iskitkeç ide.”

Yosıf 45 yıl êlek 30 yäşendä İslamnı qabul itte häm qısqa ber waqıttan soñ isemen üzgärtte.

Soñınnan üz ğailäsen qoru häm xäyriyä êşläre belän şöğıllänü öçen uñışlı kar’yerasın tuqtatıp tordı.

Yosıf Kät Stivens, ingliz muzıkantı:

“Böten tormışım diyärlek säxnädä uzdı. Min yäş’ çaqta, 15 yäşemdä başladım, şuña kürä säxnä min belgän berdänber urın ide. Cırlarımda häm minem muzıkada da kürgänegez kebek min tabiğıy moxitnı sağındım häm tağın da xozurlı moxit êzlädem. Älbättä, monı säxnä utları astında yasamadım. Möselman tanıqlığımnı tapqaç, nigezdä minem êzlägän närsä şuşı ide, böten närsäne artta qaldıra aldım, çönki min inde êzlägän öyımä kilep cittem. Min ciñeläyıp kittem. Üzemne taptım”.

Yosıf 1980 häm 90nçı yıllarda mäğarif häm humanitar yärdäm mäs’älälärenä yünälde. Muzıkası isä populyarlıq qazanuın däwam itte. Yosıf soñınnan sänğätenä kire qayttı häm ul tapqan yaña ruxi atmosfera cırlarında açıqtan-açıq çağıldı. Balalar öçen “A is for Allah” isemle cır belän bergä berniçä cır yazdı häm Londonda möselman balaları öçen mäktäp buldırdı.

Uzğan yıl Yosıfnıñ “Teaser and the Firecat” isemle legendar al’bomınıñ çığuınıñ 50 yıllığı ide häm bu maxsus waqıyğa böten dönyada törle çaralar belän bilgeläp ütelde. Bügen kiç tä konśertqa kilgän muzıka söyüçelär Yosıfnıñ säxnädäge çığışın bik oşattı, atmosfera isä bik dulqınlandırğıç ide.

Rümäysa Qalın Qarabulut, TRT World, Änkara