uMthunywa
YiNtatheli kaMthunywa
ISIQWABALANDA somdlalo we-boxing uThamsanqa “Thamzoyah” Dube kubikwa engaphenduka esitikini ezodinga ukuthatha isicoco sakhe sokuba yintshantshu yalumdlalo e-Africa.
Abafakazi abaqotho abaseduzane loDube babike ngokugcweleyo ukuthi intshantshu yenqindi le isiqalisile ukulolonga, ngomzamo wokuthi yehlise umzimba lokuqinela ukujika inqindi.
UMthunywa uzwe njalo ukuthi inyathelo likaDube lokuphenduka kumdlalo we-boxing lisekelwa ngokuphezulu yinhlanganiso ebona ngezomdlalo we-boxing iZimbabwe National Boxing and Wrestling Control Board.
UDube waba yingqwele yamadoda ajika inqindi ngo2009 lapho awisela phansi uJack Els weSouth Africa.
Kodwa kuminyaka emibili edluleyo, wathathelwa ibhanti lakhe loba nje ubelokhe ezigqaja ezitshela ukuthi ulokhe eyingqwele. Isizatho sokuthathelwa ibhanti kwaba yikuthi waswela umuntu ongancintisana laye esitikini okwesikhathi eside.
“UThamu usefuna ukubuyela ku-boxing sibili. Useqalisile ukugijima lapha lalaphaya esenzela ukuthi ehlise umzimba.
Uyakhuluma ukuthi usefuna ibhanti elitsha elizamenza abeyintshantshu yomdlalo eAfrica,” kutsho omunye wabangane bakaDube abaseduzane.
Ngomnyaka odluleyo, umgcinisihlalo wenhlanganiso ephethe i-boxing kuleli, uPatrick Mukondiwa wabika ukuba ngempela uDube wathathelwa ibhanti.
Uthe wathola ucingo oluvela kwelinye ilunga labaphathi bomncintiswano weWBA Pan-African title uStan Chrosto owamazisa ukuba uDube kwakumele avikele ibhanti lakhe kudala.
Imbangela yokumthathela ibhanti leli kubikwa yikuthi uDube kazange athole umdlalo wokuthi azitshengisele ukuthi ulokhe eyintshantshu.
“Udubo olwabakhona yikuthi uThamu kazange athole umdlalo kusukela waba yintshantshu ngo2009. Abe-WBA Pan African basitshela ukuthi kwakumele alwe phakathi kwenyanga eziyisithupha ethole isicoco.
“Isizwe sonke siyazi ukuthi uThamu waswela usekelo, okuyikho okudale konke lokhu,” nguMukondiwa lo.
Ebuzwa ukuthi inhlanganiso yakhe izathatha nyathelo bani kulokhu, uMukondiwa uthe: “Sizahlala phansi sikhangelisise ukuthi lathi siphambuka ngaphi. Okusihluphayo yikuthi abadlali bethu esibathembileyo baswela ama-promoter. Nxa ungela sekelo lwama-promoters ngeke waphumelela kulumdlalo.
“Ukuthathelwa isicoco abakwenza uThamu kulusizi kusizwe seZimbabwe. Iqiniso yikuthi lathi sabalephutha, abadlali bethu behluleka ukulwa kulesikhathi.”
Kusenjalo, kuphume omunye umbiko othi omunye umdlali wakuleli uTinei Maridzo obephethe ibhanti leWBO African Super Middleweight Champion laye usehluthunelwe isicoco.
