Lou Bessihoun - Université de Provence

Armana 

di BonProuvençau 

1995 

Centre International de l'Écrit en Langue d'Oc 

3 Place Joffre, 13130 Berre L'Étang 

http://www.lpl.univ-aix.fr/guests/ciel/

Pourtissoun 

Ami de l’Armana di bon Prouvençau, salut! E o! Nous baten mai pèr assaja 

d’empacha nosto bello lengo de mouri. 

Aquest an, coume lou veirés, avèn mescla l’ancian e lou nouvèu, doumaci avèn 

pensa que, leissa de caire lis ancian es perdre la mita de nòsti bèn de culturo. Tóuti li 

Prouvençau an pas de biblioutèco coume d’ùni Felibre, e siéu segur que sarés countènt 

de legi de trobo que couneissès pas e que s’ameriton d’èstre couneigudo. 

L’aveni dóu prouvençau es, coume se dis, proublemati. Tèn au devouamen de 

quàuqui mèstre d’escolo e de quàuquis escrivan, de quàuqui bòni voio tambèn que, 

caduno dins soun endré, entretènon la flamo prouvençalo. Vous n’en pourriéu cita bèn 

quàuquis-uno. 

Es tóutis ensèn que faren viéure nosto lengo e lou faren de noste mies, n’es pas 

inutile de lou dire. S’aparan nosto lengo prouvençalo s’agis de la respeta. Sarié inutile de 

faire viéure un patoues que marcarié, dóu bon, la fin dóu prouvençau. Lou dise pèr tóutis 

aquéli qu’an idèio de nous ajuda, e ié dise: «Travaias, legissès, es dins nòsti grands 

autour que retrouvarés la bono lengo de nòstis àvi. E, pèr la parla lou mies poussible, fau 

l’escriéure lou mai prouvençalamen dóu mounde, ço que vòu pas dire à cop de 

diciounàri e d’espressioun granado, mai emé lou naturau de touto lengo, un cop despassa 

lis entramble gramaticau (n’i’a bèn quàuquis-un) mai soun pas incourregible se tant 

soulamen voulès durbi uno gramatico. Sarés paga, es iéu que vous lou dise, de voste 

bono voulounta, quouro relegirés uno pajo de vous que vous fara dire: “pèr lou cop es 

pas mau escri”. E pensarés tambèn que farés plesi à-n-aquéli que vous legiran.» Vous 

n’en dise pas mai, trouvarés dins l’Armana “escampiha un pau pertout”, coume di 

Mistral, d’entre-signe utile à vosto curiouseta prouvençalo. 

Acò di, pourtas-vous bèn e counsideras noste armana coume un… ami de l’oustau. 

Lou Baile 

*

F. Mistral 

Lou Cant dis Ange 

Revihas-vous, gènt de troupèu, 

veirés la meraviho: 

i’aguè jamai rèn de tant bèu 

dessouto lou soulèu. 

Lou Segnour a manda soun fiéu 

dins lou sen d’uno vierge, 

pèr vous sauva, pàuri catiéu, 

e vous adurre à Diéu. 

De Betelèn vers li Jusiòu, 

jasènt dins uno grùpi, 

lou trouvarés dins lou maiòu 

entre l’ase e lou biòu. 

Ei vengu naisse pauramen 

lou rèi dóu paure mounde, 

pèr que visqués pacientamen 

e caritablamen. 

Pereilamount sus li neblas 

au segnour Diéu la glòri! 

e sus la terro perabas 

i voulountous la pas! 

*

A Mounseignour lou grand Priour de Franço 

Belaud de la Belaudiero 

Tous encens pèr estreno 

Monseignour vous dounan, 

Noun d’or uno cadeno: 

Mai bon-jourt e bon an. 

Vous dounas d’avantagy 

Aquo n’es defendut: 

Car tout nostre heritagi 

Lou mau tèms l’a fondut. 

Mai nous faren priguiero 

A la grand Trinitat 

Que mill’ans faces chiero 

En bono sanitat, 

Car si la salut tiro, 

D’aure n’avez beson, 

Despuis que l’aste viro 

Tous-tens dins la meisson. 

Per encin nostre mestre, 

Diou vueille que tous-tens, 

En salut pousqués estre 

Puis qu’avez pron de bens. 

*

Ansèume Mathieu 

(1828-1895) 

Nascu à Castèu-nòu-dóu-Papo, lou 21 d’abriéu 1828, dins uno famiho de païsan, 

Ansèume Mathieu devié rescountra à-n-Avignoun,, au Pensiounat Dupuy, Mistral e 

Roumanille.Rescontre prouvidenciau. Mathieu, se saup, seguiguè Mistral à-z-Ais, 

Mistral pèr ié faire soun dre, Mathieu soun dre d’amour! 

Ansèume devié coulaboura au Roumavàgi dei Troubaires de Gaut. Devié tambèn se 

retrouva emé li foundadou dóu Felibrige, encò di Giera, à-n-Avignoun coume à 

Fontsegugno. Amourous de Zani, coume Aubanel, partejara l’enganamen dóu pouèto de 

la Miougrano. L’intrado au couvènt de Zani li metra d’acord, se n’èro besoun. Mathieu 

se maridara, en 1861, em’uno chato de 17 an (16 an de mens qu’éu), que dison forço 

galanto. Mai Ansèume poudié espousa qu’uno chato galanto. Mathieu vendra soun vin, 

lou famous castèu-nòu-dóu-papo, en boutiho, ço qu’èro uno ennouvacioun. 

Mathieu anavo faire la couneissènço de Daudet, que devié èstre pèr éu lou meiour 

ami dóu mounde.Mathieu reçaupié voulountié e soun oustau èro sèmpre plen de 

mounde. Es gaire un mejan de s’enrichi, se n’es un pèr se faire d’ami. Mathieu, noun 

countènt de reçaupre à Castèu-Nòu, reçaupeguè tambèn à l’oustalarié dóu Louvre, à-n- 

Avignoun, que n’avié pres la gerènci, lou malurous, en janvié 1875. Ié devié pas faire 

fourtuno. D’en proumié, ié mouriguè sa femo à 33 an e l’oustalarié, fau dire, èro pas 

soun fort. Rouina, menaça de la presoun, sis ami faguèron ço que poudien pèr lou sauva. 

Aguènt fa quinquinello dins l’oustalarié, s’assagè dins la limounado. A Marsiho. Mai 

durara gaire. Tournamai rouina, revendra à Castèu-Nòu, ounte reprendra soun raive de 

pouèto de sèmpre. Es alor qu’escriéura lou galant pouèmo à Bonaparte-Wyse, que 

seguis. Mai fau viéure e Mathieu, que dins lou tèms, avié presta d’argènt quand n’avié, à 

Daudet, sara sauva pèr Daudet éu-meme que ié fara avé un alougage dóu Menistre. Es 

dire que Mathieu avié sèmpre d’ami fidèu e l’un di meiour fuguè segne Constantin, lou 

proupriétàri di “Fines Roches”, à Castèu-Nòu, que l’aculiguè à Paris, dins sa prouprieta 

de Fontenay, dous mes de tèms. Ero en 1893. Mathieu devié mouri en 1895. S’èro 

roumpu la cambo sus la glaço e èro resta dos ouro sènso èstre secouri. 

“Enterrement d’une cigale, dira Mariéton, sans personne, pecaïre! car cette mort aura 

fait moins de bruit que sa vie. Notre Anselme, qui était une des poésies vivantes de la 

Cause, n’aura même pas eu la revanche posthume des autres poètes. Nous lui devons, toi 

et moi (Marieton escriéu à soun ami Vidal), cher Critobule, d’installer la légende de ce 

rêveur délicieux, du dernier troubadour.” 

R.J. 

*

Lou vin de Castèu-Nòu 

Felibrejas 

Souto la touno: 

Cacalejas 

E taulejas ! 

Dóu jus d’autouno 

Li got soun plen: ami, vejas ! 

J. Brunet 

Li forço, au vènt-terrau, vènon ravoio 

L’aiòli douno au cor la bono imour; 

Li bello de vint an dounon l’amour; 

Lou vin de Castèu-Nòu douno la voio, 

Emai lou cant, emai l’amour, emai la joio! 

A. Mathieu 

*

A Guihen Bonaparte-Wyse 

Aqueste mes de mai, s’ères vengu me vèire 

Dins moun vièi Castèu-Nòu, 

Aurian, bèu roussignòu, 

Coume dous amourous, ensèn turta lou vèire, 

D’aquéu bon vin d’elèi, viéu coume lou quinsoun 

E dous coume la pruno, 

Que, dins sa coulour bruno, 

I’a lou sang dóu jouvènt e lou fiò di cansoun… 

Se lou Rose, es verai, de ma pichouno terro 

A rousiga li bord, 

Me rèsto enca lou cor, 

Bon coume lou bon pan e plus grand que ço qu’èro. 

Me rèsto lou soulèu, que res pòu nous gara, 

Lou cant de l’auceliho 

Que l’aubo escarrabiho, 

E li flour qu’au printèms flourisson dins li prat. 

Me rèsto, bèu milord, l’eissame di chatouno 

Au quilet fouligaud, 

Au rire que fai gau, 

Car se mesclo de-longo au brut de si poutouno. 

E me rèsto li bos, e lis erme, e li riéu, 

E lis aureto folo 

Que refrescon la colo, 

E fan de moun vilage un paradis de Diéu. 

Milord, s’eres vengu dins ma chambreto bluio, 

Un recàti mignoun 

Que regardo Avignoun 

Enaura peralin sa tourre de la Luio 

Ve, mies qu’à Santo Estello aurian felibreja: 

Aurian, au noum di rèire, 

Tant fa dinda lou vèire, 

Que li rèire d’amount aurien richouneja.

As mies ama, parèis, di comte e di princesso 

Lou frou-frou vouladis 

E lis entravadis, 

Que de veni treva ma pauro gentilesso. 

Sabes dounc pas, milord, qu’au païs prouvençau, 

La pòusso que varaio 

Dins lou founs d’uno draio, 

Es mai noblo, souvènt, que li ro li plus aut?… 

Li tres quart dóu Miejour, sian de bono famiho, 

E tau, dins un gara, 

Lou vesès laboura, 

Que se pourrié signa Comte de Ventimiho. 

Mai au siècle ounte sian, li fièr ounte es que soun? 

Tout cour à la rapiho… 

Fau manja si grapiho 

Se voulès resta libre e canta de cansoun. 

Adounc, en t’esperant pèr faire uno regalo, 

Fidèu à la foulié 

Coume un vièi chivalié, 

Libre demourarai dins moun canto-cigalo. 

E coume nòsti rèi gardon si flourdalis, 

O, dre mau-grat l’aurige, 

Gardarai ma deviso «inimitabilis » 

Ansèume Mathieu 

*

F. Mistral 

Desiranço 

Que la chatouno que iéu sabe 

Nòuse sa vido emé la miéu! 

Que sa videto en pas s’acabe, 

Quand res aura besoun de iéu! 

Qu’un brave ami que m’arribèsse 

Tout póussous un matin d’estiéu, 

Coume pourrian dire Mathiéu), 

Pèr se reviscoula troubèsse 

Un bon flasco au fres dins lou riéu! 

E pièi, pèr acoumpli la fèsto, 

Dau tèms qu’à taulo escoutariéu, 

Que me diguèsse un coublet siéu, 

Tout perfuma de roumaniéu, 

De ferigoulo o de genèsto! 

Vaqui tout co que voudriéu 

Pèr ma bono anado!... Moun Diéu, 

En quau voudres baia lou rèsto! 

(Aquest tèste, di proumié pouèmo de Mistral, es esta escri en “parlar de Sant- 

Roumié”) 

*

Presènci de Mas Felip Delavouët 

Avèn vist mouri, l’an passa, lou grand pouèto Fernand Moutet. Publican eici sis 

adiéu à Mas Felip Delavouët, esmouvènt que soun pèr nautre que lis avèn vist mouri 

tóuti dous. 

Vaqui de semano que Mas-Felip Delavouët nous a leissa. N’i’a quàuquis-un que de 

mouloun d’auvàri — uno marrido santa pèr eisèmple — lis an empacha de i’adreissa 

l’oumenage afetuous que meritavo. Ero un ome qu’avian pèr éu uno founso amista e, 

tambèn, un di mai grand pouèto que siegue, un d’aquéli que soun l’ounour de noste païs 

e de noste tèms. Mai es pas trop tard, sara jamai trop tard, pèr parla d’éu. 

I’a d’annado que noste amista nasquè. Suli-Andriéu Peyre avié publica dins sa 

revisto, Marsyas, uno pouësìo que i’aviéu semoundudo. E vaqui que recebe, un bèu jour, 

uno letro de Delavouët, uno letro talamen gènto, talamen espountanivo, que m’aduguè 

uno emoucioun qu’es pas de crèire. Belèu es Suli-Andriéu Peyre que i’avié counseia de 

m’encouraja. Me sèmblo qu’èro en 1955, l’annado que n’en ère encaro, dins li letro 

prouvençalo, à moun proumié barboutimen. Que que n’en siègue, aquelo letro me 

pertouquè forço: me venié d’un pouèto que n’en couneissiéu”lou pitre”, coume Aubanel 

disié de Mistral. “S’ère lou mèstre de Maiano / S’aviéu lou pitre de Mistral!” Es à-naquelo 

amista que iéu siéu devènt d’agué chausi, pèr m’espremi, “la lengo mespresado 

di pastre e di gènt de mas”. 

Ai garda la memòri d’aquéu jour qu’erian vengu, Roulando emé iéu, à soun mas dóu 

B a i l e - Verd, mounte nous avié counvida. Es un ome simple que nous esperavo sus la 

routo e que nous saludè sènso faire de long discours, mai que sa pougnado de man nous 

avié rassegura, nautre qu’erian un pau espauri de nous trouba davans un pouèto coume 

aquéu d’aqui. 

De quant de causo auren garda lou souveni! Un oustau ensouleia dins uno pasiblo 

som de luserno. Uno paret, dins la grand salo, que lou pintre qu’èro tambèn l’avié 

ournado d’uno fresco que vous retrasié li tapissarié de l’Age-Mejan: devian aprendre 

qu’èro pivela pèr li libre d’ouro di rèino d’antan, lis estatuo que represènton d’ùmbli 

femo emé si man crousado dins la preguiero, e li gràndis ouro de Chrétien de Troie e 

d’Aucassin e Nicouleto. I’avié tambèn, me n’en rapele, uno toupino que ié servié pèr 

ranja quàuquis-un de si cachimbau. 

Pèr ço qu’es de l’obro dóu pouèto, sarié mestié de n’en parla loungamen, mai me 

despache de fisa, à-n-aquéli que me fan l’ounour de me legi, que pèr douna ‘no idèio 

d’aquelo obro, faudrié èstre un critique d’elèi, ço qu’es uno gràci que l’ai pas reçaupudo. 

I’a de grand critique coume i’a de grand troubaire, valènt à dire que fan pas nèblo. 

Urousamen, d’autre l’an fa em’un gàubi, uno coumprenesoun estraourdinàri; ié dison 

Jean Thunin e William Calin. 

Diren soulamen qu’aquelo obro tèn quatre voulume de 200 pajo cadun — o mai 

encaro — que fan uno meno d’epoupèio lirico. Es pas uno epoupèio coume Calendau:i’a 

ges d’aneidoto aqui dedins. Lis aventuro soun tóuti dins la tèsto e dins lou cor dóu 

pouèto. Es un ome que nous fai descurbi un mounde que, pèr éu, es sèmpre en trin à

naisse, un mounde clafi de mistèri e de miracle inabenable. Lou tros que vejeici es leva 

dóu pouèmo que duerb lou proumié libre: “Pouèmo pèr Evo”. Aquéu pouèmo es dedica 

à-n-aquelo que devié deveni soun espouso. “Pèr Arleto. Rèn de mai en aquelo dedicàci: 

l’autour sabié que l’autro lou coumprendrié. 

“Mai liuen que lou lebrié se courrènt à l’après 

se batrien dins un jour dóu camin que s’estiro, 

i’avié la terro e sa fourruro de fourèst 

que prenié lou soulèu mai liuen que touto amiro; 

i’avié, mai liuen que mi dous iue, 

la terro e lou soulèu que sourtien de la niue.” 

Lou libre III a quaucarèn d’uno escoumesso. La “Balado d’aquéu que fasié Rouland” 

tèn tout lou recuei, d’un bout à l’autre. Nous retrais la bello ambicioun d’un Claudel, 

d’un Péguy, d’un Saint-John Perse, d’un Thuroldus e de quàuquis autre coume n’i’a 

gaire. 

S’aremarco adejà que la pouësìo de Mas-Felip Delavouët es recouneissablo pèr 

manto uno resoun. Tóuti aquélis estrofo soun facho de 6 vers: 4 aleissandrin em’1 

óutousilabo. Es vesible qu’aquelo estrofo i’apartèn coume aquelo de Calendau apartèn à 

Mistral. Apoundèn qu’en mai de sa fidelita à la rimo tradiciounalo, li legèire amiraran 

lou drudige de sis image. Soun sèmpre nòu, vivènt,poupu coume de fru madur. E qunte 

que siegue la vesioun que nous vòu coumunica, lou pouëto ié saup jita uno lumièro que 

la trasmudo. Es-ti besoun de precisa que ço que fai soun ouriginalita es, subretout, aquel 

engèni que lou fai recounèisse entre milo. 

Auriéu ama acans de leissa dourmi ma plumo proun desgaubiado, prepausa au 

legèire un retrat de Delavouët clina sus soun presfa de tóuti li jour. Me fai pensa i 

bastissèire que taiavon, i’a cinq siècle d’acò, aquéli pèiro blanco que devien desfisa lou 

tèms. Eron d’oubrié, de segur, mai sabien ço que fasien e uno fe prefoundo lis abitavo. 

Es coume acò que fuguè Mas-Felip Delavouët. De touto uno vido fervourouso e 

counsacrado à servi la bèuta, soubro quaucarèn qu’es soulidamen tanca dins lou terraire 

e que se drèisso vers lou cèu coume uno catedralo roumano. 

* 

Fernand Moutet

Pèr Mas-Felip Delavouët 

Tres jouvènt se soun rescountra (1) 

Pèr la glòri d’un jour d’ivèr, 

Vengu d’eici, vengu d’eila, 

Vengu de liuen ‘mé lou vènt fèr. 

L’un escoutavo dins soun amo 

La cantadisso di bóumian 

Que lou secuto, sèns calamo 

Emé lou vira de soun sang. 

Lou segound jouvènt avié, d’ouro, 

Treva li colo e li relarg 

Dóu grand cèu nus que se desflouro 

E se blesis au vènt testard. 

E lou tresen sabe pancaro 

Quinte secrèt tenié ‘scoundu, 

Mai l’on vesié ferni sa caro 

Quouro i dous autre a respoundu. 

Tres jouvènt an crousa si vido 

Un matin d’ivèr e de gèu, 

E si tres jouvènço avanido 

Que passaran mai o mens lèu. 

Passaran car lou tèms degruno 

Sus lis espèr e sus li flour, 

Passaran, e li vièii luno 

S’esvaniran jour après jour. 

Mai se soun ande nous emporto 

Voudriéu sauva, pèr moun coungoust, 

Avans de m’esmarra pèr orto, 

Un pau de lus d’aquéu jour blous, 

Un pau de lus dins mi man grèvo 

Pèr enlusi l’escur ermas 

Ounte aniue vanegon li trèvo 

De mi vièi pantai jamai las. 

15 de janvié 1945 

Jan-Calendau Vianés 

(Aquéli tres jouvènt èron M.F. Delavouët, Carle Galtier e J.-C. Vianès)

Devinaio 

(siècle dès e vuechen) 

Dau luec onte logo un sarpen 

Sian ministres impitoyables 

Per son ordre matan, rompen 

Sujets delicious agreables 

Jamai ren rintro impunament 

Dedins son obscuro caverno 

Car es embrigat au moument 

E jitta dins uno citerno. 

1 

2 

Siou discret, fazes me va veire 

Bellos you vous va moustraray 

De mon chef, vous pregue de creire 

Que tout ço que fares faray. 

Confidas me senso scrupulo 

Ce que pretendes estalar 

S’a quaucaren de ridicule 

V’enseignaray a la celar. 

3 

Un membre gros emé nervis tendus 

Forço souvent lei plus cruellos! 

D’estre ni fièros ni rebellos 

Ei pas deis amans assidus. 

Quand leis a boutados en trin 

Sont piegi que d’abandounados

Elei fan e sauts e gambados 

Jusqu’à n’en suzar à la fin. 

4 

Jouino fillo m’aguent entre sei detz 

Pren gros plaisir a me metre onte penso 

En me pousant voou que de ma semènço 

Ce que toque se trobo pres. 

Ma semenço es fino e subtilo 

Douno la formo en quaucaren 

Au may la filleto es habillo 

Au mies mon engien li conven. 

5 

Plouri davant que metre au jour 

D’enfans conceus à moun hounour 

Que ben que sien senso malici 

Devon soufrir rude suplici. 

Leis eleve ben tendrament 

Lei curbi de pau d’escaufestre 

Ay bel a faire un cruel mestre 

Me lei derrabo impunament. 

6 

Quand eme mei doui bens esquichi 

Un bouton de roujo coulour 

Au mitan d’un endrech lou fichi 

Que li consumo son ardour. 

Vesen la passien relanquido 

De sujets pronts à s’enflamar 

Iou tachi de lei ranimar 

Et li fau liar novo partido.

Responso: 

7 

Ai nombre d’amans indiscrets 

Li descurbi mon fond eme grando confianço 

Per peno de moun impudenço 

Ell’examinon et van desclara meis secrets. 

Quand an debita ce qu’an vis 

A sei plus famíliers amis 

Aquestei non contens de creire 

Me trousson souvent per va veire. 

8 

Fonds au mitan fach en auvalo 

Em’uno rego per detras 

Es un manche que fa balo 

Et sènso eou m’emplegarien pas. 

Quand me veson la panço pleno 

M’ausson emé amfaso eme hounour 

Et la van vujar senso peno 

Dins un trauc qu’es fa coume un four. 

1- La bouco 

2- Lou mirau 

3- Lou viouloun 

4- L’aguillo 

5- La vigno 

6-Lei mouchetos d’un fuec 

7- Lou libre 

8- Lou cuillé 

*

En souveni de Francés Jouve 

«Que voulez-vous, Monsieur… 

tout a une fin en ce monde…» 

A.Daudet 

Le Secret de Maître Cornille 

A-DIEU-SIAS 

A parti de deman, un autre que iéu empurara lou Four di Bloundin!… 

D’acò n’ai un grand crebo-cor!. 

Desempièi 1825, mi rèire, moun paire e iéu avèn tengu abra lou vièi four que nous 

fasié viéure. A l’ouro d’aro, amalauti, manquant de voio, n’aguènt plus l’en-avans 

necite, —sènso parla d’àutri resoun qu’escudelarai belèu quauque jour!— siéu dins la 

tristo necessita de fisa en d’espalo mai jouino lou fais trop grèu pèr iéu dis oubligacioun 

mestieralo e de leissa à jamai lou fourniau de mis àvi mounte, pèr ma part, de moun 

miés, quasimen cinquanto an de tèms, sènso relàmbi, ai rustica. 

Pode, deman, la tèsto auto, me presenta davans aquéli que m’endraièron e me 

faguèron ço que siéu, aquéli que me precediguèron dins l’oustau mounte visquèron si 

joio emé si malamagno, éli, miés que degun, sabon que se, coume éli, i’ai “viscu” 

penousamen, à soun eisèmple, ai “tengu” tant coume ai “pouscu”. 

Avans de quita aqueste rode mounte nasquère e mounte s’ei debanado l’escagno 

adeja longo de mi jour, ai vougu vous traire mis à-diéu-sias à vàutri, mi chaland fidèu 

que toustèms faguerias provo d’un estacamen prefound à ma famiho autant qu’à iéu; à 

vàutri, felibre, galoi coumpan, pantaiaire e artisto de touto meno que, tant voulountié, 

trevavias lou «Four di Bloundin» e que, tant souvènt, me baierias testimòni d’uno franco 

e seguro amista… 

En tóuti vàutri, à plen de cor, — de moun paure cor adoulenti! — vous porge mi 

gramaci recouneissènt! 

Retira dins moun ermitage cardinalen de Frescàti, dins la grando siau dóu campèstre, 

mounte vau viéure aro de restricioun e de souveni mai encaro que de rèndo, vous 

assegure que lou remèmbre de vosto afecioun pèr nàutri enlusira souvènti-fes lis ouro 

malancòni dóu calabrun de ma vido… 

Voste vièi ami, 

Four di Bloundin, 31 de Mars 1942. 

* 

Francés Jouve

Louis Viany 

Dins l’ana dóu mounde 

Tournejo eilamount uno tartarasso, 

que menon forço brusour dins l’aurasso 

li cimbalado de sis alado. 

Lis ouro picon, picon, 

emai apoundon si repi, 

e li jour flouquejon de long d’un gaudre que fai ferni; 

à rode, bramant 

dessouto un marrit vènt, 

S’abrivo lou briéu à l’entour d’un peiroun, 

desert, tenènt autant que li clos de mort. 

Quand se rounson li boubau coume de mar, 

intro dins li narro aquelo asprour de sang… 

«Passioun! malan!» gingoulon tant de resson. 

La lumiero, d’aqui entre aqui, s’espeço en oumbro 

sus li calanc, e canton clàri ‘quéli toumbèu 

dis aujòli vertu 

au founs dóu tèms cura. 

Tout de long di serro, 

se sarrant di sèr 

li nivoulado 

à troupelado 

Caucigon à bèl èime li cresten; 

Mai d’à cha pau se gausisson lou trist, 

eila subre lou tai, 

pèr peri li pantai 

en ferano escousso 

li chourmaio de fum. 

La cresinado, 

Sus lis annado 

tenènto e vierge s’enarto à l’aurasso, 

emparo e signau pèr la vièio raço. 

*

Prouvènço e Roumanìo 

Dóu tèms de la darriero guerro (en 1944), rec,aupeguèron à-z-Ais, de Roumanìo, à 

l’adrèisso de la Faculta de Dre, un mandadis dóu tron: nòu touno de danrèio de touto 

meno: òli, farino, ris, pasto, sucre, saboun, bescue, bono e meme liquour. Lou sabèn 

gràci au journau que tenié Jorge Lobin, de l’Acadèmi de-z-Ais e que ié marcavo tout. 

Voudrias saupre coume se fai que la Faculta de Dre avié reçaupu tant de bòni causo 

de Roumanìo? 

Es bèn simple: la Faculta de Dre de-z-Ais avié aculi forço estudiant d’aquéu païs ami 

qu’avien óublida ni si proufessour, ni si coumpan. 

Crese pas que se siegue jamai 

remembra. 

N’en valié pamens la peno. 

Adòufe e soun bòchi 

Cacalaus 

Adòufe, que manjavo dins si trento-cinq an,menavo soun bèn soulet desempièi que si 

gènt avien trepassa de la gripo espagnolo à la Nouvè de 1918. Ero arriba en permessioun 

tout-bèu-just pèr vèire li dous atahut descèndre dins lou trau e, coume la guerro èro 

finido, fuguè un di proumié à-n’èstre desmoubilisa. Acrouquè sa crous de guerro à 

coustat de la medaio militàrio de soun paire, atubè soun cachimbau e faguè lou tour de si 

terro. Pas gaire poulido! Lou paire, que se fasié vièi,avié fa ço qu’avié pouscu mau-grat 

si maudìchi doulour que ié bloucavon li jougadou; mai la naturo ei coume uno panturlo, 

avié prouficha de sa feblesso pèr redeveni mita-sóuvajo. 

Tre l’endeman, au proumié cant dóu gau, Adóufe estroupè si mancho e se meteguè à 

travaia sa terro tout lou sanclame dóu jour; e fuguè coume acò tóuti li jour. Quouro 

vengué lou tèms di proumiéri semenaio, tóuti li courrejolo e li marrìdis erbo avien 

dispareigudo. 

Tre l’endeman, au proumié cant dóu gau, Adòufe estroupè si mancho e se meteguè à 

travaia sa terro tout lou sanclame dóu jour; e fuguè coume acò tóuti li jour. Quouro 

venguè lou tèms di proumiéri semenaio, tóuti li courrejolo e li marrìdis erbo avien 

dispareigudo. 

Despièi dès an, afant de l’aubo à soulèu tremount, avié à-cha-pau remés en esta soun 

bèn, l’agrandissènt quouro l’óucasioun se n’en presentavo. Lou dimenche, se l’obro lou

permetié, anavo chourla uno o dos sibèco, jamais plus, emé li coulego, au Cafè de 

l’Unioun. De tèms en tèms, descendié à la vilo faire de croumpo e n’en proufichavo pèr 

ana saluda uno di fiho de Madamo Berto. Uno fes, èro mounta à Paris, qu’avié gagna un 

bihet à gràtis à la loutarié dis ancian coumbatènt e soun record mage fuguè la 

moulounado d’ensuca que courrien de pertout coume de fournigo folo e que 

s’acuchavon dins aquéu foutu metrò que pudissié mai que soun bòchi. 

******* 

Que me fau vous dire qu’en mai d’un chin sèns raço, Pataclò, poussedavo un bòchi 

que i’èro esta baia pèr un cambarado de guerro qu’avié un escabot. Tron èro d’aquéu 

tèms un brave bestiaret i bano poulidamen revertegado doumaci uno medecino à baso de 

cataplasme de bledo-rabo boulido. Adòufe aurié bèn vougu refusa aquéu presènt 

empouisouna (ei lou cas de lou dire), mai poudié pas dire de noun à-n-un emé quau avié 

parteja li còlis, lou gros-quiéu e li pesou durant quasimen quatre annado au founs di 

trencado. L’avié pas regreta que, tre lou proumié jour au mas, Tron s’èro estaca à-n’éu, 

lou seguissènt coume un chin e, de cop que i’a, anant lou cerca dins la campagno vo dins 

lou vilage quouro l’avié pas vist s’enana. Imaginas la caro di coulègo d’Adòufe, ataula 

em’éu souto li platano, au Cafè de l’Unioun, quouro vesien Tron travessa jouiousamen 

la plaço pèr veni faire un bèu-bèu à soun mèstre. E coume Pataclò e Tron èron toustèms 

toco-toco (li gènt dóu caire ié disien “li bessoun”), acò fasié dos boulo pudènto 

qu’enfraganavon la terrasso… e la mita dóu vilage. 

D’un autre coustat, l’Adòufe èro pas mau-countènt, que Tron ié permetié de faire de 

bòni maniero à si vesin. D’aquéu tèms, forço oustau dins la campagno avien quàuqui 

cabro e la presènci d’un bòchi de roubuste temperamen e sèmpre valènt à l’obro èro uno 

vertadiero benuranço pèr la cabruno de l’encountrado e soun prouprietàri; e coume 

aquéli coustituïssien l’essenciau de la pratico dóu Cafè de l’Unioun, li vagaboundage 

dóu bòchi, tant regretable que fugon dins lou doumaine óudouratiéu, èron bèn aceta, 

franc de quàuqui barrulaire vengu aqui se leva la set. 

Mai un bòchi sufisié pas pèr faire lou bonur d’un ome qu’à forço de travai èro 

pervengu à-n’un bèn-aise materiau tant counsequènt que cachous. I’avié bèn la 

Mounico, mai… 

******* 

La Mounico èro ourfelino, coume se dis, amor que si gènt èron tóuti dous parti pèr 

Santo-Repausolo, mai n’èro pas pèr acò un pintadiéu de la darrièro couvado; avié un pau 

mai de si tres crous que pourtavo em’uno tranquilo indiferènci. Grando e bèn facho, èro 

uno poulido femo e lou savié. Li marrìdi lengo e li jalouso la troubavon grandarasso e 

maigro coume un anchouioun, mai tout lou masclun èro d’acord pèr recounèisse qu’avié 

dins soun boumbet redoun tout ço que falié pèr rempli la man d’un brave ome. Ignourant 

lis un, risènt dis autre, vivié souleto e sajo au-dessus de sa boutigo e, coume n’avié jamai

fa d’acrò à soun coutihoun, demouravo à la sousto di bassesso e di caloumnìo. Noun que 

pourtèsse sa viergineta en bricolo mai, d’aquéu tèms, li gènt avien lèu fa de bateja lis 

esterlo que fasien provo d’un brisounet d’independènci. 

Tenié uno meno de basar, mié-espiçarié, mié-drougarié mesclado de merçarié,bèn 

apratica, au bèu mitan de la plaço de la coumuno; sa boutigo quasimen toujour pleno 

èro, emé lou Cafè de l’Unioun, un endré privilegia dóu vilage. Dóu plus matin jusqu’à la 

tardo, sèmpre siavo e sourrisènto emé tóuti, Mounico amoulounavo à cha sòu uno 

couqueto fourtuneto que n’i’avié que soun noutàri à counèisse lou mountant eisa; mai la 

souleso coumençavo de ié faire veni de petego… 

******* 

Es à-n-aquéu moumen que l’Adòufe, que n’en tenié pèr Mounico, i’avié fa 

crentousamen li proumiéris avanço. Hoi! pas grand causo; es qu’èro pas gaire acoustuma 

de parla emé de damisello. Fuguèron, à la debuto, que quàuqui regard un pau apiela, uno 

meno de dire soun noum s’èro souleto dins la boutigo quouro anavo ié faire si croumpo; 

pièi retenguè sa man dins la siéuno un pau mai que lou falié pèr ié dire adessias. Sentié 

bèn qu’èro mai qu’amistadouso à soun respèt, mai avié pòu, se ié decelavo si sentimen, 

que faguèsse bouqueto, ié diguèsse de noun e lou mandèsse i Baus. Avié tort lou bougre, 

que lou jour ounte ausè lou faire, liuen de jouga li micouqueto, la Mounico, li rouito 

roso de plesi, fuguè tras qu’urouso de ié revela qu’esperavo desempièi de luno aquéu 

dous istant. 

Couneissès la seguido; despièi que la terro viro à l’entour dóu soulèu, soun toustèms 

li meme mot e li meme gènt. Menèron emé delice uno doublo eisistènci; à bel iue vesènt, 

avien un tau biais d’avé dous èr que li gènt cresien à-n-uno grando facharié entre éli. 

Aquelo cresènço subre la naturo de si relacioun apoundé encaro au plesi qu’avien de se 

retrouva cauto-cauto. Se disien, de-segur, qu’un jour se marridarien, mai èron talamen 

urous coume acò que n’en remandavon toujour à l’endeman la decisioun. 

Aquelo felicita aurié pouscu longo-mai se perlounga, sèns aquéu foutralas de Tron! 

******* 

La Sant Jan d’estiéu èro procho, la niue caudo e siavo. Souleto, la Magalouno 

prevenié de trelusi dins un firmamen alumina pèr la luno pleno, que sa lus frejo 

tremudavo lou païsage n’enmascavon li causo li mai banalo; l’oumbro de l’aubran e dis 

oustau decoupavo de gràndi taco negro subre lou sòu argentau. La journado èro estado 

tourrido e tóuti li gènt èron au siéu quouro lou reloge de la glèiso piquè lou cop d’uno 

ouro. 

Tron èro parti foulastreja coume n’avié l’abitudo. L’Adòufe avié tout assaja pèr l’en

empacha mai, que que fague, lou bòchi se n’en trufavo; petavo sa cadeno, enfounsavo li 

porto e sautavo li cledo; alor avié fini pèr leissa faire. 

Adounc, Tron revenènt d’uno de si permenado nuenchenco, travessavo li carriero 

dóu vilage, cabesso auto e bato vivo. Subran —vai-t-en saupre perdequé— s’aplantè 

davans la veirino de la boutigo à la Mounico. Avié-ti agu pòu d’un flar de luno vo 

cresegu vèire un aversàri dins lou reflèt de soun propre image? Toujour es-ti 

que,badabom-badabam, founsè tèsto basso dins la veirino, qu’espetè souto lou tuert e 

s’afoundrè dins un gigantesc chin-nana-chin que revihè la bono mita dóu vilage. Li 

contro-vènt dis oustau d’alentour claquèron, d’ome sourtiguèron en cors de camiso, 

quàuquis-un arma de soun fusiéu, segui de sa femo qu’avié tout-bèu-just près lou tèms 

de jita quaucarèn subre sa camiso de niue. Tóuti s’avancèron prudentamen vers la 

boutigo, sènso rèn ié descurbi, que Tron, espeloufi pèr lou tarabin-taraban, èro dejà à-nuno 

miejo-lègo d’eila. 

Inmoubile, sachènt pas dequé faire, esperèron à la mudo un moumenet; li mai 

courajous, à cha pau s’avancèron vers la boutigo silenciouso. Tóuti parlavon à soutovoues 

coume se sa prouprietàrio èro deja morto; d’ùni que i’a la vesien amassoulado, 

escanado vo pougnardado e chasco segoundo li raprouchavo de l’ourrour estrèmo. 

N’èron arriba à-n-imagina la pauro Mounico decoupado en pichòti roundello coume un 

saussissot d’Arle, quouro la veguèron desboucha, estrechamen enlaçado, emé soun 

Adòufe, au recouide de la plaço. Degun sachè quau s’atroubè lou mai sousprès dóu 

galant parèu tout aureoula pèr li raioun de luno vo de la chourmo en braio e camiso arma 

de fourco e de fusiéu, mai soun pas nòsti dous amourous que se sentiguèron li mai 

couioun. 

Aguènt perdu soun ounour e sa reputacioun e se n’en foutènt coume di proumiéri 

bretello de Jan-de-l’Ourso, la Mounico s’amoulierè emé soun Adòufe. Fuguèron urous e 

s’aguèron pas forço enfant, fuguè pas de sa fauto. 

******* 

E Tron, me dirés? Vouguènt plus lou garda, lou baièron à quaucun que, 

malurousamen, pousquè pas supourta soun óudour. Après mai-que-d’un prouprietàri, 

finiguè pèr desbarca dins un regimen de tiraiaire tunisian cantouna près de Marsiho. 

Cresta e gras à n’en peta, mai sèmpre autant pudènt, defilavo darrié la nouba à la tèsto di 

sóudard. 

E vuei encaro, quouro lou marin rabat li marrìdis óudour di rafinarié de Berro, li gènt 

dison: “Tè! Vaqui li tiraiaire que defilon!” 

Jan Collette 

*

Legèndo 

Terro sèns fin di vènt à la raro di rago 

E qu’uno tristo niue velo de sa soumbrun, 

Es sus li roucas fre que cridon sènso bago 

Li fiho di pèd nus d’un rebelle rèi sourd. 

Quinte nòvi voudran d’aquelo car frejasso, 

Quint voudra recaufa aquéli trìsti sen, 

Pèr quinte lié maudi de tristuge e de glaço 

S’escaragno soun sang à l’erso dis aven? 

Si long péu soun desfa despièi la niue alabro 

Que s’ausiguè lou crid d’un vaste negadis, 

Sis iue se soun fa grand pèr pantaia li labro 

Blanco d’amaro sau d’aquéu bèl Ante-Crist. 

La mar lis embrutis de sa michanto escumo, 

Mai éli de la mar amon fin qu’is escra, 

E pèr un sèr parié, sa vèio se counsumo 

Dins lou vent de la niue que tèn soun péu abra. 

Sa nourriço s’esmòu d’aquéli cors sauvage 

Que ié crèmo lou clot d’un sèisse grèu d’afan 

E si man vanamen porjon sis abihage 

I folo que s’en van sus la sablo en cridant. 

«Dauras-vous, elo dis, aguès de lòngui raubo, 

Tóuti de sedo claro e de coulano d’or, 

Aguès de peirarié de la coulour de l’aubo, 

Oublidas la blancour de vòsti trìsti cors. 

«Venès! Faren de fiò dins la prefoundo salo, 

Sabe de conte vièi que redounon l’espèr, 

Vòsti nòvi vendran à la porto reialo 

Quista lou tèndre esmai de voste eissame fèr.» 

Mai l’einado que l’oundo espousco de si rire, 

A pas desvira l’iue de la vasto negrour, 

Sono dins l’oumbro amaro uno oumbro que l’atire 

Èmé li pàuri mot d’uno folo impudour. 

La segoundo mourdié la sablouso estendudo,

Ressautavon di plour sis espalo de la, 

E lou vènt de la mar, emé si dènt pounchudo, 

Moussihavo si sen que l’aigo avié bagna. 

La tresenco, sèns mot e sèns gèste, dins l’oumbro 

Semblavo lou roucas d’un triste mounumen, 

E soun iue fanati gueiravo dins la soumbro 

Vasteta de la mar un negre evenimen. 

Mai la jouino, en ausènt sa nourriço que plouro, 

Es tournado au castèu, tristamen. Si sen nus 

S’adoulouiron davans la porto que s’aubouro 

De se saupre de sen que res quichara plus. 

La nourriço a vesti soun cors blanc de chatouno, 

A couifa lou mouloun ufanous de soun péu, 

E la flamo dóu fiò que, subran, s’enferouno 

Fai giscla de belu d’aquel or pensatiéu. 

Pièi la baile a vueja lou dous endourmitòri 

D’un conte souleious, plen de bèu chivalié, 

Es anado bèn liuen au founs de sa memòri 

Cerca pèr soun enfant un conte messourguié. 

E dóu tèms que l’enfant s’endor davans li flamo, 

Un prince vèn d’intra dins l’estrange castèu 

De la pousterlo estrecho e, jouvènt que s’aflamo, 

Entre vèire l’enfant, l’a vougu autant lèu. 

E li fiho dóu rèi que plouron sus la plajo 

Sabon pas qu’au castèu l’amour vèn de flouri 

E qu’au cor enflurgna de la sourreto sajo 

Un inmènse bonur, subran, vèn d’espeli. 

R.J. 

*

Pleno luno 

Un brave camelié restavo emé sa mouié dins lou desert maroucan. Tóuti dos vivien 

pauramen dins un tibanèu de pèu, emé un tian, un fiò de pèiro, uno cuberto de pèu de 

camèu. Lou brave ome pantaiavo d’ana à la vilo, noun pèr despensa li sòu: avié ges de 

sòu, mai pèr vèire la vilo. N’en charravo tant e tant, de la vilo, à sa mouié... Mai elo, 

voulié pas lou leissa parti soulet. Subre-tout, voulié pas resta souleto emé lou troupèu de 

camèu... 

Chasque sèr, ié parlavo de la vilo, di meraviho à descurbi, di carriero clafido 

d’oustau, d’ome... Ero devengu un vertadié desvàri, e fin finalo, sa mouié, pèr ié faire 

plesi, acetè de lou leissa s’enana, mai en escàmbi, ié demandè de ié radurre un presènt: 

- M’agradarié tant que me pourgiguèsses un diadèmo d’argènt. 

Au Marò, li diadèmo d’argènt soun de causo banalo, e lou camelié faguè la 

proumesso. 

- Se jamai óublides moun presènt, te bastara de regarda la luno, e te n’en ramentaras. 

Sourtiguèron dóu tibanèu e regardèron lou cèu: la luno èro à soun proumié quartié: 

semblavo un diadèmo d’argènt. 

- Veses, pensaras que me fai lingueto un diadèmo d’argènt. 

Lou brave ome partiguè à la vilo sus soun plus bèu camèu e ié restè quàuqui jour 

meravihous à regarda li boutigo, à bada lis oustau, à chaspa li bèsti au marcat, à bèure la 

birro emé d’àutri camelié en se racountant d’istòri de camèu... Pamens, lou sèr dóu 

depart, óublidè pas lou presènt de sa mouié. Intrè dins uno boutigolo, mai avié óublida 

ço que sa femo voulié. Se ramentè simplamen que ié diguè que s’óublidèsse lou presènt, 

sufirié de regarda la luno. Sourtiguè de la boutigo pèr regarda lou cèu: la luno èro pleno: 

semblavo un mirau. 

- Es simple, ié diguè lou menudié, voste mouié vous demandè de ié radurre un mirau. 

E lou camelié croumpè un mirau. 

De retour au desert, souto lou tibanèu, pourgiguè lou presènt à sa mouié. Ero uno 

pauro femo simplo, qu’avié jamai vist un mirau. Se regardè, se pausè au founs dóu 

tibanèu e plourè. 

Sa maire, la vesènt ploura, ié demandè la resoun de si lagremo. 

- Moun ome es parti à la vilo. Ié demandère de me croumpa un diadèmo d’argènt e 

tournè emé uno autro femo. 

E plourè... 

La maire, touto esmougudo, prenguè lou mirau e se regardè. Ero pamens uno pauro 

femo simplo, qu’avié jamai vist un mirau: 

- As resoun, ma fiho, a ramena uno autro femo, mai te fagues pas de marrit sang, es 

uno femo vièio e laido... 

Tricìo Dupuy

Istòri vertadiero d’un autre tèms 

Moun paire me countè souvènt que, quand li de la Grandcoumbenco 

venguèron istala l’eleitricita dins noste vilage, un ome, un brave païsan d’encò nostre, 

qu’èro pas trop ana is escolo, venguè vèire lis oubrié que travaiavon dins soun oustau. 

Voulié saupre coume acò marchavo. Espinchè un roulèu de fiéu d’aran, lou pourtè à sis 

iue, espinchè un pau mai e s’estounè: “Pamens soun pas trauca, aquéli fiéu!”. 

Davalè pièi à l’establo de l’ase ounte lis oubrié venien de plaça uno 

lampo, e s’escridè: “Aquelo d’aqui, segur que marcara pas au coumtour, es bèn trop 

luencho!… 

Un vesin mai isoula dins li bos e que poudié pas avedre l’eleitricita, 

se counsoulavo, éu, coume poudié: “Vai, moun calèu, quand sa mecho es bèn tirado, 

esclaro tant coume l’eleitriceta!”. 

* 

Pèr la Cigalo d’Or de Patric Revellat 

La Couvertoirado, lou 6 d’avoust 1994 

Ami, d’abord que vuei l’amista nous acampo 

Qu’aquéu jour siegue un jour qu’óublidaren jamai, 

Un jour que raubaren, perdiéu, au tèms que lampo 

E que n’en gardaren sèmpre lou tèndre trai. 

Sian tóuti lis enfant d’uno memo famiho, 

Que viven pèr l’amour dóu mounde e de si doun, 

Enfant dóu vièi soulèu que fai bèlli li fiho 

E baio soun envanc generous i garçoun. 

Vuei, tout coume deman, flourira noste pege, 

Saupren resta fidèu au vièi sant dis aujòu, 

Dintre nòstis enfant couneiren pas d’eirege 

E li veiren trachi dins li meiour draiòu. 

Pau Roussel

D’un passat generous saran li bèu gagnaire, 

Faren proun ço que fau pèr li faire gagna, 

Fièr, coume vautre, un jour, dóu legat de si paire, 

Saran fidèu coume éli e coume éli encagna. 

Patric, moun bèl ami, e vous, Ano-Marìo, 

Vous vese camina pourta pèr l’amista 

Dins li varai festié di jo de la Patrìo 

Ounte vous anaren voulountié retrouva. 

Aussaren aut lou vin famous de nòsti vigno 

E faren ço que fau pèr que li jour venènt 

Siegon de jour fruchous pèr nosto raço ensigno 

Que saup quouro lou fau faire de sang bouiènt. 

Ami, bèus amourous, vuei la Couvertoirado 

Fai de vous, coume antan, de valènt chivalié 

Que, coume éli autrifès, de nosto colo amado, 

Sias li bèu seguidou de nòsti Primadié. 

Sara coume un secrèt, bèl ami, bello amigo, 

Que tras que precious sèmpre demourara 

Aquelo ouro clariero, aujourd’uei, que nous ligo, 

E que, se lou voulèn, sèmpre nous ligara. 

Que deman, coume vuei, senten la memo joio 

Sus li mèmi camin de nsote sant païs, 

Felibre, ami fidèu qu’estren la memo voio, 

Vivo nautre e lou fiò sacra que nous unis. 

Ami, nous souvendren sèmpre d’aquélis ouro 

Que nous fan ço que sian e que voulèn resta 

Dins un mounde ounte l’ome es sèmpre l’ome quouro 

Viro la bano au giscle e de-longo se bat. 

Ami, nous souvendren d’aquelo amista santo 

Que fai dóu Felibrige un conte merveious, 

Un conte sènso fin que noste cor encanto, 

E nous fara deman sèmpre sis amourous. 

Uno cigalo, qu’es? Mai quand lou soulèu briho, 

Tout lou païs brusis de soun cant inmourtau, 

Patric, pèr vous tambèn cantara sous la triho,

En l’ounour merita dóu nouvèu Majourau. 

Au jour d’uei t’ausissen, Cigalo de Maiano, 

Tu, que pèr toun canta as reviha la gènt, 

E que de la Prouvènço à la ribo óucitano 

As fa qu’un cor soulet e qu’un espèr poutènt. 

De jour coume aujourd’uei se marcon dins la vido, 

S’estremon dins li cor, que soun si beluguié, 

E s’un jour dóu Miejour l’istòri èro finido 

S’óublidarié jamai la voues di Cigalié. 

Reinié Jouveau 

* 

Li Roco de Satan 

Ero poulido la crous de pèiro, à la flour di camin, en plen mitan di bos, en aquéu bèu 

matin de primo. Touto daurado, fiero sus sa mount-joio, leissavo li proumié rai dóu 

soulèu se pausa sus si bras. Uno ginesto ié daurejavo au pèd. D’aucelet ié fasien 

l’aubado e un pau plus liuen de cantarello l’espinchavon de dessouto lis aguio de pin. 

Tout èro siau. Un bèu jour coumençavo; lis aucèu lou sabien… 

- “Vaqui la crous, es bèn aqui que se sian di. Es pancaro arrriba, mai n’i’a pas pèr 

long-tèms”, se pensavo la chato qu’arribavo sourrisènto. 

Emé soun calignaire se devien retrouba pèr uno longo espacejado dins li bos. Elo, 

avié quita soun oustau proun d’ouro e ié fasié rèn d’espera un pau, souleto au pèd de la 

crous. Li bos, li mountagno, li roucas, èro soun paradis. S’assetè pèr miés aprouficha li 

darriéri ginesto qu’embaumavon e li castagnié que coumençavon carga si catoun. Uno 

agasso ié venguè faire babau pièi s’entournè. La chato levè lis iue vers la tourre 

eilamount. Se ramentè de l’istòri que se countavo dins lou païs: uno istòri dóu tèms di 

Crousado, em’un chivalié, uno bello castelano, lou diable… basto, uno istòri de l’autre 

mounde. Pamens la fin la leisavo toujour soucitouso. Lou diable venié carga li pèiro de 

la tourre, disien, e quand n’i’aurié plus, sarié la fin dóu mounde… 

S’aubourè, culiguè quàuqui vióuleto e se gandiguè vers li pin pèr cerca de celou, fin 

de passa lou tèms.

Lou tèms passè. Passè meme trop. Elo, tournè au pèd de la crous e aubourè mai lis 

iue vers la tourre. 

- “Tè, se diguè, li rèsto di muraio sèmblo que soun plus tant aut coume adès… 

Curious…” 

Regard sa mostro. Sarié tèms qu’arribèsse, quand meme, l’Andreloun. 

A-n-aquéu moumen, se ramentè d’un libre dins sa pòchi, lou coumencè de legi. Lou 

soulèu mountavo que mai. Ausiguè d’esquerlo e bèn lèu un troupèu passè. De fedo emé 

quàuqui cabro foulasso. Un ome jouine li menavo vers d’àutri terro. De vèspre 

tournarien davala vers la jasso… 

En passant proche, la chato ié faguè signe de la man, sènso muta. Tout d’uno un brut 

amount… de roco que barrulon, un chafaret dóu diable. Se regardèron, regardèron la 

tourre, un pau de tubado, o bèn de póusso? Curious… Ié faguè mai signe de la man. Elo, 

ié respoundeguè d’un riset, regardè pièi sa mostro. 

- “E d’aquel Andreloun qu’arribo toujour pas.” 

Lou soulèu picavo. Un pau plus liuen avisè d’erbo mouflo, à l’oumbreto. I’anè, 

s’alounguè, barrè lis iue, reveguè la tourre, soun calignaire, lou pastre, lou libre, e mai 

soun calignaire. 

- “Oh, lou libre, que l’ai leissa au pèd de la crous.” 

L’anè querre. L’aureto avié vira fuiet. Lou libre se devinavo dubert à la pajo 666. Ero 

la fin d’un chapitre. Legiguè: 

“- Em’acò s’ausira un chafaret dóu diable, un pastre passara emé soun avé, e de 

mounde i’aura plus. 

Ansin disié lou vièi Tibetan.” 

Lou chafaret, lou pastre, la fin dóu mounde, tout acò viravo dins sa tèsto. Curious… 

A-n-aquéu moumen, avisè Andriéu, soun Andreloun que davalavo. 

- “Hòu, hòu!… Moun Andreloun, coume siéu countento qu’arribes. Coumençave de 

me prene pòu. Figuro-te que…” 

A flour e mesuro que parlavo, l’Andriéu risié, risié… mai risié! 

Alor, coumprenguè tout. 

- “Oh, noun! es pas verai, digo… es pas verai, siés pas… Pas tu…” 

Eu dins qu’un cacalas s’esvaliguè. 

- “Oh, noun! moun Andreloun… Alor, lou vièi Tibetan avié resoun?…” 

L’endeman la retroubèron au pèd de la crous. “Mort naturalo” diguè lou legisto. 

Pamens, lou jour de l’enterramen, noutèron qu’Andriéu, lou calignaire, èro pas vengu… 

* 

Peireto Berengier

La Divesso e soun Diéu 

(Prouvènço e Ventour) 

La tèsto dins li niéu, d’assetoun sus la plano 

Entre de mountagnolo embeimado de flour, 

Seren sout lou soulèu, valènt dins la chavano 

Despièi la niue di tèms segnourejo Ventour. 

Sus sa tèsto an passa li milàntis ourasso 

E li siècle, qu’en bas coumoulon li toumbèu, 

Eu subre-viéu, gigant, dins li nivo qu’estrasso 

E vincèire dóu tèms, despoudèro li flèu. 

Nascu d’un treboulun qu’entremesclè la terro 

Arèbre sourgissié de la goulo dóu tèms, 

Li liò èron marin, amount sus la coustiero 

L’aigo retrounissié au founs di caraven. 

L’aigo descendegué di cresten auturous 

Li siècle, lou soulèu, li founsour souteirano 

Faguèron regreia si flanc escalabrous 

Que lis aucèu avien ensemena de grano. 

Tu, Prouvènço, à l’aflat dins li toumple marin, 

Divesso que deja pantaiaves de glòri, 

Miraves à travès li flot blu e clarin 

Aquéu Diéu subre-bèu qu’intravo dins l’istòri. 

Lou tèms revenguè siau; l’aigo estalouirado 

I bord mediterran, restè dins soun cruvèu, 

Tras que bello permié li terro alegourado, 

Sourgiguères en flour vestido de soulèu. 

Tal’ uno emperairis clinado vers l’autar 

Reçaupies deVentour la courouno blavenco 

D’azur e de soulèu, qu’un rebound de l’asard 

Gaubejè pèr para ta tèsto vierginenco.

D’aquéu jour benesi lou tremount s’alumino 

I coulour sang e or quouro lou jour fali, 

Que retrai ta bandiero en sedo cremesino 

Mesclado emé l’or di sèr enfestouli. 

Gilbert Jouvaud, de Carpentras 

* 

Naïs 

Uno grosso treno usclado de belugo d’or bat l’esquino de la pichouneto que sauto à 

pèd-cauquet long dóu draioulet. I’a cinq an qu’es espelido Naïs, la chatouneto dis uei 

negro-nue velouta coume flour-de-la-ternita. Sa caro es clafido de pigo rousso e dos 

crouseto risouleto aluminon sa poulideta. De mounte l’an destraucado la couquelino? 

Que, li saup calineja si gènt, si grand e la sequèlo d’ami à sa devoucioun. Tant lèu faguè 

babau sus terro, tóuti n’en siguèron fòu. Entre que la regardavias espetavo dóu rire e 

mandavo si pichot bras à l’endavans de vòsti ba. Gustino aflouravo si man moufleto e 

coutigavo si petoun sèmpre descaus, cambo en l’èr. 

Bèu tèms enfantouli tournara pas dous cop! 

La coucourello a tres oustau pèr lou mens. De tout biais es au siéu d’en pertout que 

sis atroubat van coutrìo ‘mé l’amista que lis enchusclo. Si pichot det furnon, desplegon, 

chipoutejon de causo menudeto dins li pòchi de sa grand Delaïdo. N’an ges de valour 

franc la sabour de la coumpliceta de longo toco tras li vièi e la ninèio. Un croustet de 

pan dur coume uno bano qu’a peneca dins lou faudihas de la mameto es-ti pas la 

meiouro di lipetarié? Es que Naïs niflo subre l’oulour assegurativo de la bravo femo que 

ié vòu tant de bèn. 

La pichoto rèsto d’ouro e d’ouro em’elo. S’envan ensèn faire d’erbo pèr li couniéu 

vo rabaia lis iòu que la mameto passo caudet sus si parpello pèr l’apara dóu mau d’uei. 

Sènso se n’avisa Delaïdo fargo pèr la chatouneto li maioun à deman, fin que sa vido à la 

mouderno noun laisso s’escapa aquesto richesso descasiblo dóu passat dis umble. Emé 

pepé Fonso n’es un autre engàmbi! Segur lou sant ome aurié miés capita em’un drole 

que sauvèsse lou noum d’oustau. Alor… Naïs empasso li raconte de casso, de pesco e li 

garrouio que bressèron soun aujòu. A la tèsto brusissènto di cop de fusiéu e di bacelado 

di galapian. Tout acò bourroula en un pantai poulit tèis uno istòri siéuno, subre-bello, 

secrèt perdurable d’un sang vièi à-n-un sang de nòu. E, quouro retrobo un chilet au fin 

founs d’un tiradou, Naïs l’escound souto la couissiniero, e la nue sènt batre soun cor 

metalin mai fort que se siguèsse vivènt.

Anessias pas crèire que la pichouneto es acouvassado souto lou vieiounge. A 

l’oustau meno lou brande e noun poudès durbi l’armàri vo un cafournoun sènso que 

cabusson sus vosto tèsto li jouguet envahissèire. A la debuto, Gustino reguignè que la 

bono meno dóu meinage n’en patissié, pièi n’en faguè soun dòu. E, à l’ouro d’aro, i’a 

sèmpre uno titè encabedelado contro la testiero dóu lié vo de terraieto que faroutejon sus 

l’eiguié. Naïs boundo coume un cabrit, quilo, viravòuto, fai de zistoun-zèst à plus fin. 

Mai i’a de causo entre-pèd, mai es urouso: pico di man, enrouitado, flamado vivo. 

Talamen que, estramassado, sa maire la meno jaire sus sis esquino, plegado en dous 

double coume uno panoucho, dins lou reiaume benesi de soun chambrihoun. 

Naïs… Naïs… Naïs… La pichouneto fai mino de dourmi. Espincho l’ana-veni de sa 

maire tras si parpello mita plegado. Carougneto. I’agrado d’ausi lou vòu lóugié de soun 

coutihoun contro lou cabés, i’agrado lou raspaia fin de si pantouflo sus li toumèto maucloto, 

i’agrado d’alena aquest noun-rèn mouvedis just avans soun vertadié revihun. Tout 

d’uno, Naïs se jito dins li bras de Gustino e l’aclapo souto si poutoun: moumen precious 

d’amour jamai assadoula. 

Tourna-mai, la journado resplendènto anelo lou bonur de viéure de la drouleto. 

Descurbi li pipièu souto la clusso, faire rena la cato estirado de tout soun long à la 

frescour de la porto badiero, boustiga un fourniguié, chaucha si pèd dins l’aigo d’un 

valat, marca de piado sus li maloun, tant lèu secado à la cisampo, faire lampa lou gàrribabau 

contre lou buget, n’i a proun pèr countenta Naïs. Mai, de fes que i’a, ié pren lou 

revertèri. Alor, dins un vira d’uei, endemouniado, la pichouneto embalo tout à soun 

entour, leisso tout barco-au-travès, urouso de crida, de rampela, de trepeja, de faire cènt 

trin. A un babot dins la tèsto se sounjo Gustino. Aquelo drolo ié pren trop passioun. Ai 

cregnènço pèr elo. 

Un jour, la boulegueto se recampo au Cafè, à l’ouro que sa maire gouverno la pratico 

assedado. Es la papo au sucre de tóuti. Vague de pica sus la bouito à musico que n’en 

regisclon, agudet, lis èr à la modo, vague de bala coum’un fouletoun assóuvagi, vague 

de s’espoumpi coum’un pivòni enfloura. 

“Hòu, pichouneto, as proun fa l’arlèri”, ié vèn la maire. Alor la chatouneto s’envai 

fougna souto la viseto: soulet, sis uei negre beluguejon dins lou sourne, à l’espèro… 

Chois intro. Naïs lou pren à la brasseto. Lou paire es urous coum’un rèi: “Moun bèl 

astre, moun courassoun, moun tresor deVeniso”. La pichouneto n’aprouficho. To u r n o - 

mai revouluno si danso damiselenco, si capelado, sis entrechau encigala. Chois la 

caranchouno, meme la leisso chima lis escourriho de sa verdalo. 

“O, Chois, siés pas resounable, de que n’en faren d’aquelo drolo?” 

“Gustino, siés qu’uno meirastro, leisso-la viéure”. 

Gustino muto plus. Chois s’esmòu de la bèuta d’aquest boulegun que rèn i’es 

d’enfèrri, éu que touto sa vido perpensè si mouvemen dintre sa tèsto mai noun li 

pousquè vertadieramen coumpli. Sa bello drolo esperlongo si cambo e deliéuro si pensié. 

Vengue que vengue e Diéu ié mete sa santo man. 

Jano Blacas de la Pampeto

(MUSIQUE) 

La Cansoun d’Arlequin 

Paraulo de Carle Galtier 

Musico d’Ive Rebufat 

Acaba lou darrié coublet pèr la varianto d’agu emé pount d’orgueno. 

Lou Cor: lou cor repren lou refrin après lou coublet d’arlequin. 

Arlequin: Soulisto que respond au cor en dounant sis esplico. 

2 

Aquest an ai coumpres 

Dirai de mau de res… 

Amas pas lou verai, 

De messorgo dirai! 

3 

Dirai qu’en noste endré 

Tout marcho bèn e dre, 

Que mesquin e catau 

Soun tóuti sèns defaut. 

4 

De ladre, de voulur 

N’i’a plus, es bèn segur. 

De prevericatour, 

Aquest an, n’en sian court. 

5 

Li niais e li…coudoun 

Se saup plus mounte soun, 

Meme li vièi cagot 

S’atrobon plus en liò. 

6 

De groumand, de feniant 

N’ai ges vist de tout l’an, 

De couquin e de gus 

Nimai se n’en vèi plus.

7 

I’a plus ges d’ourgueious 

De traite, de jalous, 

De meichant, d’araca, 

N’i’a mens que l’an passa. 

8 

De puto e pistachié 

N’i’a plus coume n’i’ avié 

De Jan-Sausso e coucu 

N’i’a plus coume n’i’ a ‘gu. 

9 

Rèsto qu’un messourguié 

Eici, dins noste endré: 

Es lou brave Arlequin… 

Diguès pas!… S’es fa fin! 

10 

E, de soun grand bastoun, 

N’en fai un espoussoun 

È vai vous benesi 

Pèr vous faire plesi. 

11 

Sias que de bràvi gènt, 

Sèmpre urous e countènt, 

Vivènt coume de rèi, 

L’amour vous fasènt lèi. 

12 

S’acò ‘s pas verita 

Venès me desbaussa! 

Se vous plais pas ansin 

Metès bas Arlequin!… 

*

L’estello de l’Apoucalùssi 

Lou flar de flamo de l’estello de l’aubo, en fanau fouguejant di fin de niue, fiéuletavo 

deja emé lou filtra dóu jour, tal un esperit fouletin que fouligaudejo à la fousco après uno 

belugo de fiò. 

En aquelo ouro que lou fousfore brihant di tenèbro s’escampiho, la darniero lus de 

l’escurino s’amosso. La perlo lusènto s’esvalis pèr s’ana acata dins l’escrin de l’auroro 

nacrado. Un nouvel astre daio lou cèu ounte resquiho lou blanc acié de sa fauciho. Pèr 

tai, l’argènt-viéu s’escoulo e ennego la capo celèsto. 

Dins lou fiermanen, la poudro d’arquèmi dóu jour que nais saupousco à bèl èime, en 

tremoulet blavinèu, li coulour blanquinello de l’oundo nouvello. L’ocre proumieren que 

vai giscla à finto-cimo dis angouisso de la niue cerco sa gorgo d’entre li mount 

escalabrous pèr escampa soun or nouvèu dins li vau enneblado. 

L’ome que me countavo lou trelus dóu soulèu coume d’ùni benurous que vivon la 

passioun dóu Crist, éu, revivié chasque jour, à pouncho d’aubo, la creacioun dóu 

mounde, en veritable Diéu ounnipoutènt, sus la santo-cimo dóu Mount-Mourin. 

Lou couneiguèrian, dins lou vilage, l’an dóu gros ivèr. Moun grand que s’anavo 

mouri, me venié de baia soun secrèt de garissèire. Un poudé misterious que davalavo de 

la niuech escuro dóu tèms, rajant à l’asard dis alianço dins li branco torso dóu parentage. 

Aquéu jour d’aqui, me ramassave à l’oustau pèr lou soupa, quouro lou tratour flame 

nòu de Cassagnòu, lou bouscatié, me venguè petarra davans. 

- T’aduse un pelegrin que soufris lou martire. Uno estorso ié boudenflo la caviho, me 

venguè Cassignòu. 

Veguère l’ome alounga d’esquino sus lou platèu de la remorco encaro pimpaiado de 

bren de ressé. 

- Quau es ? demandère. 

- N’en sabe pas rèn. L’ai trouba mita estavani à moun davans. Se tirassavo sus lou 

camin salinié emé la cambo faleto. 

- Coume a fa soun comte pèr se torse lou pèd ? 

- N’en sabe pas mai. Reno e grimacejo, es tout ço que saup faire. Pamens m’es avis 

que l’aigo-ardènt es pèr quicon dins soun auvàri. Quand siés proche d’éu, douno d’alen 

de bouto. 

De-bon lou blessa èro empega, banda coume uno resso. Boufavo, aletejavo e

quilavo, mai, róufelous vo estavani, quinquè pas dóu vèspre. 

Iéu, en reboutaire nouvelàri, ié manipulère d’aise d’aise la caviho endoulourido. 

Restè uno passado coume mort, lou derevihère un pau en ié fasènt canta lis os, mai me 

lou fauguè garda dourmi pèr la niue. 

Es lendeman, reviscoula pèr soun segound vèire de verdalo que Jan Boustin se 

presentè, e m’espliquè sis estràngi crènto, d’esfrai d’apoucalùssi. 

Avié, que disié, segui un Jounas vengu anouncia la cabussado de Ninivo en mountant 

em’ aquéu nouvèu proufèto e soun centenau de fidèu sus la cimo dóu Ventour lou 7 

d’abriéu 1967 pèr espera la fin dóu mounde. 

L’espèro lou deguè rendre fada. Se vesié deja en Nouè après l’abouminacioun de la 

desoulacioun, superbe sus soun pue pèr basti la nouvello Jerusalem. 

Ai ! las !, pariero à chasque jour, la niue toumbè sus lou Mount, claro e estellado. La 

ventoureso prendeguè de soun alen. Plus rèn mutè. 

Lou ventour se tremudè soulamen en isclo à la primo aubo, cencha di neblo de la 

valèio. Aqui creiguè encaro à la proufecìo dóu verset sèt de l’Apoucalùssi de Sant Jan. 

“Veici que vèn emé li nuado, e tout iue lou veira...” Veguè l’estello dóu matin e l’auroro 

d’uno vido nouvello. 

D’aqui vouguè plus quita lou santuàri di mountagno. 

D’en proumié, troubè refuge dins li serro de Luro, mai finiguè pièi sus lou Mount- 

Mourin ounte plantè caviho à la sousto d’uno capitello d’ermitan. 

Aurié de-bon entendu coume uno voues trounadisso dis acènt metalin de troumpeto 

que lou sounavo e ié semblavo dire dóu biais de la segoundo vesioun celesto de Sant Jan 

: “Mounte aqui, e te moustrarai ço que dèu arriba dins la seguido”. Esperavo toujour la 

seguido quand barrulè dins lou gaudre de l’Agnèu e se tourseguè la caviho. Mai deja si 

fòlis esperanço l’avien rendu mié-fòu. 

Me diguè, aquéu matin d’aqui, en davalant sa mescladisso d’alcol, que cercavo d’ùni 

verita di revelacioun dis evangèli dins l’absinte, la liquoureto. Ié prestère pas cas, es tant 

facile de veni vesiounàri en s’embugant d’aigo-ardènt. Coumençavo de divaga, e se 

devié senti vagueja que parlavo deja de l’erso de la counsciènci que perd si limito dins 

l’oucean divin. Descargavo en paraulo sa foulié metafisico. Sabiéu plus s’èro soun 

esperit nebla vo soun lengage simbouli. Destriave mau li briso de soun parla. 

Coumprenguère pamens que parlavo eisadamen touto meno de vièi lengage, quouro 

citavo la biblo en ebriéu, quouro cantavo de saume en latin, quouro passavo au grec 

ancian, mai jamai n’óublidabo la traducioun. 

Sus lou candelié de sa desresoun revenien de longo li verset de l’Apoucalùssi de Sant 

Jan. 

Sa niaisarié me toumbè en plen dessus coume aquelo estello que se dis “Absinte” 

dins lou verset dès chapitre vue di revelacioun sant Janenco : “E lou tiers dis aigo se 

tremudè en absinte...” Aquel escamandre tant saberu, cresié de trouba l’aprocho dóu 

divin dins li redoulènci dóu sucre cristalisa que s’enneigo d’aperitiéu verdoulènt. 

Aquéu jour acabè mai sa recerco sus lou roucas de la boutiho. L’avié secado, lou

deguère acoumpagna en autò enjusco au còu de la Pinedo. 

Trantaiejavo quand l’abandounère, mai coume un animau rendu à la liberta, après 

quàuquis esitacioun, raspè dins lou proumié bos. 

Me pensave que soun meiour sarié encaro de passa d’uno bono sadoulado à vido 

finido crema, pèr soun estello, l’Absinte. 

Lou tresenc ange avié de-segur pas souna la troumpeto. De cassaire lou 

rescountrèron encaro à l’asard de si vanegage, fugissié de-longo coume uno bèsti ferri. 

Jamai se sachè rèn de soun recate, de sa vido vidanto, emai de soun biais de 

s’aprouvesiouna. 

D’ùni disien l’aguè vist d’à chivau, sus uno bello cavalo blanco. Ero poussible, li 

cavalié de l’Apoucalùssi ié poudien bèn trouta dins la tèsto. D’àutri lou veguèron tout 

simplamen d’escambarloun sus uno biciéucleto embastado de gròssi saco, degun lou 

pousquè de-bon recounèisse. 

En 1986, aperaqui, creguerian que lou misterious ermitan avié parti emé soun secrèt, 

coume un proufèto sus soun chivau blanc rejougne lis armado dóu cèu. 

Li randounaire e li cassaire rescountrèron plus jamai de glàri barbassu sus li 

coustiero dóu Mount-Mourin. 

Se bevié plus d’absinte dins lis oustau di vilage, li darnié contro-bandié prouvesidou 

d’anis en fiolo vo en poudro còu-pourtavon que la fin d’un mounde. Li darniés alambi se 

caufavon plus gaire. L’arquèmi meninouso de l’elabouracioun familialo de l’alcol 

s’abandounavo, negado pèr la fabricacioun industrialo dis aperitiéu igienisa. 

Quand m’arribavo, à l’ouro dóu dina, de me versa uno rasado d’aniseto, sounjave 

encaro à-n-aquel estrange persounage. 

Soun souveni me toumbè, de-bon, dóu cèu coume soun estello l’Absinte, la semano 

passado, quouro reçaupère uno letro d’un noutàri marsihés. Me counvidavo à soun burèu 

pèr aceta vo noun uno dounacioun qu’èro carga d’enregistra. 

Coumpliguère aquéu devé. L’ounourable ome de lèi me faguè leituro d’uno meno de 

testamen mai m’avisè tout d’uno que lou dounatàri èro pas encaro mort emai faguèsse 

l’artimo. 

Pensave que soubravo degun dins la famiho pèr me baia un eiretage... Mountère 

liuen dins li rèire-grand pèr crèire en de felen de la lignado di Vidal, li cerco-fourtuno, 

de Barcilouneto que partiguèron en troupo devers l’Americo. M’enganave, lou noum de 

moun benfatour, me diguè rèn, Segne Boustiniero de Bello-Combo, la noublesso devers 

nautre, èro jamai passado dins la denouminacioun familialo. 

Basto ! lou grand clergue ajustè adrechamen si bericle sus lis alo de soun nas, beguè 

soun alen, e coumencè la litanìo di lèi e decrèt qu’autourison la douno souto touto meno

de reservo e coundicioun, lou badaioun n’aurié aganta de mens courajous, esperère 

tranquilet lou debana de si couiounado que justificon si bèus ounouràri e 

m’entendeguère dire fin finalo qu’un oustau emplaça dins lou vilage de Bello-Gardo en 

terro d’Argènço m’èro douna, emé si moble, sa biblioutèco de sièis milo sièis cènt libre, 

- la chifro semblavo ajustado sus lou de la Bèsti de l’apoucalùssi -, e encaro un tros de 

terro de quàuquis eiminado ounte jasié uno cisterno de sièis cènt seissanto sièis litro 

d’alcol d’absinte o de fenouieto. Aqui, l’ome de lèi aubourè sis iue riserèu coume pèr 

espincha moun estounamen davans la revelacioun d’un parié prouvesimen d’aigo-ardènt. 

Coumprenguè de-segur pas qu’acò me caro-virèsse de soulas, pamens aviéu trouba la 

devinaio. Jan Boustin, lou cavalié de l’Apoucalùssi èro pas mort e sa recouneissènço pèr 

lou jouine reboutaire èro di grando. 

Lou noutàri me diguè que, pecaire, moun benfatour anarié pas liuen, la leucemìo que 

lou rousigavo, acabavo soun travai. Lou proufessour Jan Boustinière de Bello-Combo, 

dóutour en semantico, grand praticaire di lengo-indò-éuroupenco e di lengo eslavo, 

especialisa dins la traducioun di tèste bibli, s’amoussavo soulèt dins un chambroun escur 

de l’espitau de la Carita à Marsiho. 

Degun avié coumprés perqué lou dimenche 28 d’abriéu 1986, lou sabentas quitè 

subran soun ermitage pèr parti tant lèu sus lou liò de l’esplousioun de la Centralo 

Nucleàri de Tchernobyl. 

Lou noutàri apoundié que s’èro arresta de bèure, tant soulamen lis isotope de 

plutounium fuguèron mai marrit que l’alcol de raco. 

Jan Boustin parlavo à bel èime l’ukrenian e fuguè un precious interprèto pèr li 

teinician american e francés, que luchavon pèr estoufa lou fiò dóu reatour en torcho. 

Lou noutàri en chancelo davans aquéu geste dessena, parlavo emé d’amiracioun de 

soun anegacioun pèr escoundre la foulié suicidàri. 

L’anave pas dementi e lou presentère tambèn coume un sant ome. 

Moun plus quite aro, ère de l’ana gramacia. 

* 

Lou cadabre dis iue veirous que jasié sus li blanc linçòu d’un lié de ferre, semblavo 

plus lou barbu de l’estorso à la caviho. 

Eu, me couneiguè, e la péu tirado de si gauto cavado se fripè que mai pèr boufa 

quàuqui mot de bèn-vengudo. 

Es aqui que me recitè coume un canti si vesioun dóu revèi dóu mounde. 

Sa revelacioun l’avié fin-finalo couneigudo en terro d’Ukraine, au bate-cor de la 

Centralo nucleàri en bousco d’uno som impoussiblo. 

Dins lou varai di tratour, peletouso, betounouso, nivelaire e barrulaire de touto meno 

lèst à l’ataco de l’infèr, quand la terro mudo counèis qu’un respir, lou de la mort, fau alor 

vèire aqui lou matin dóu mounde coume l’ultime matin davans l’esplousioun celesto. 

Soun respir à-n-éu feblissié, li bèuta dóu soulèu levantés perdien de si coulour, si

descripcioun perdien de vido, coume éu de forço, sentiéu que s’anavo teisa. 

I’auriéu vougu pamens demanda, demanda perqué ? 

Perqué aquelo nouvello foulié ? 

Legiguè belèu dins mis iue, la quisto de moun esperit. 

Bretounejè en aletejant : “l’Ange a souna la troumpeto”, chapitre vue, verset dès e 

vounge, e virè la tèsto devers la taulo de niue. 

Un libre dubert despartissié si pajo. Lou nouvèu testamen badavo sus lou chapitre 

vue de l’Apoucalùssi de Sant Jan. 

Lou prenguère e plan-planet legiguère lou verset dès e vounge: 

“ E lou tresenc ange sounè de la troumpeto, e toumbè dóu cèu uno grando estello que 

brulavo coume uno torcho. E toumbè sus lou tiers di flume e sus li sourço dis aigo. E lou 

noum de l’Estello se dis : “Absinte”. E lou tiers dis aigo virè en absinte, e forço gens 

mouriguèron d’aquélis aigo pèr ço qu’èron vengudo amaro”. 

Regardère lou mouribound sènso coumprendre. 

Reprenguè un pau d’alen, pièi troubè la forço de mai parla: “Uno centralo nucleàri es 

rèn mai qu’uno torcho que brulo”. 

- O, e alor ? demandère. 

- La countaminacioun radiouativo que seguiguè l’esplousioun retoumbè en plueio 

sus la terro, pèr empouisouna lis aigo, la terro, li planto e fin-finalo lis ome que s’en 

nourrisson pèr mouri en moulounado de la malautié dóu cancer. 

- O m’en souvene, diguère, en 86 la farigoulo fuguè de-bon empouisounado pèr lou 

Cesium e sa vèndo enebido. 

- Se i’avié agu qu’acò, mai pecaire, lou dardai de l’irradiacioun pren soun tèms, de 

milié de gènt mouriran plan-planet de cancer vo de léucemìo dins la decenìo, mai aro, es 

de-bon la revelacioun, la fin dóu mounde es procho. 

Lis iue veirous dóu mutila de la sciènci s’enluminavon pèr fissa de la man de vido, la 

bèuta de soun estello. 

M’esfraiave de soun esta-siau de beatitudo. 

M’aprouchère de soun visage, sentiguère pas gaire soun alen. 

- Vai ? demandère d’un ton doucerous. 

- Vai, ai vist l’estello apoucaliptico, aquelo grando torcho que brulo. 

- L’Absinte? demandère, doutant. 

- O, l’Absinte, te dise, aquéu mot en lengage ukrenian se prounouncio, de-bon verai, 

“Tchernobyl”, la centralo atoumico porto lou noum de l’estello de l’apoucalùssi. 

* 

Bernat Giély

Leoun Gassin 

A-n-uno jouino Auvergnato 

Amount dins l’Auvergno mistico 

Couneigudo dins mi vint an, 

Pleno de souveni celtico 

Ai descubert ‘no jouino enfant. 

Dins soun regard que s’amaduro 

A la bèuta di mount natau, 

Briho la pouësìo puro 

Di grand pouèmo eternau. 

‘Mé sa negro cabeladuro 

Que floutejo au vènt levant, 

A la frescour de la naturo 

Dins l’espandi de si quinge an. 

Es de l’age qu’èro Mirèio 

Coume Mistral nous l’a counta, 

E di Prouvençalo en liéurèio 

Sèmblo n’avé lou pur retra. 

O chatouno amourousido 

De noste parla prouvençau, 

Pèr nosto lengo tant poulido 

Toun afougamen nous fai gau. 

Crèi-me, gènto enfant, la Prouvènço 

Qu’as envouca poulidamen, 

Emé la fe de ta jouvènço 

T’a aculido plenamen. 

A toun goust pèr la pouësìo 

Moun cor de pouèto s’enchau, 

Ta vido siegue en armounìo 

Chatouno emé toun ideau.

Cacalaus 

Fau... 

Fau i pichot leissa si petenviaduro, 

I plan-peno leissa li tantost dourmihous. 

A-n-aquéli qu’an pòu, tout l’an, di fourçaduro, 

Lou repaus assoulu dins un lié mesoulous. 

Mai aquéu qu’a de nèrvi e qu’es de bono raço, 

Mai aquéu que jamai sounjè de s’estroupa, 

Aquéu, quand se reviho, a tout d’uno sa plaço 

Dintre lis oubrié que sabon s’enrega. 

Lou mounde es un chantié qu’a besoun de bons ome 

E que se sauvara que se saup s’engermi, 

Dins lis obro dóu bèn qu’a l’age de l’atome 

Res saup ço qu’avendra d’aquéu mounde atupi. 

* 

Lou nouvèu Maniclo 

Sc.I 

Catarino, soun paire e sa maire. 

Lou Paire. Iéu trove que Catarino a resoun. 

La Maire. E iéu, trove qu’a tort. Aquéu garçoun l’amo. Es un brave garçoun. 

Catarino lou trouvavo à soun goust, d’abord que i’a di de O. S’es parti, es pèr gagna un 

pau d’argènt, e aro Catarino n’en vòu prendre un autre. Mai enfin, de que ié reprouchas 

à-n-aquéu garçoun? 

Lou Paire. Ié reprouchan d’èstre un mort de fam. 

La Maire. Coume, un mort de fam! Gagno sa vido. 

Lou Paire. Gagno sa vido, ço que vòu dire que nosto chato aura touto sa vido de que 

pas mouri de fam e pas mai. E troves qu’es proun. Pos dire qu’ames ta chato. 

La Maire. Mai enfin, es pas iéu que lou siéu ana querre. Es elo. 

Lou Paire. E pièi après? A l’age de Catarino l’on pòu se troumpa.

La Maire. E tu, aviés tambèn l’èr countènt d’aquéu mariage. 

Lou Paire. Aviéu l’èr countènt, aviéu l’èr countènt. Belèu. Mai l’ère pas coume lou 

fasiéu vèire. Dins lou founs, pensave que Catarino aurié pouscu mies faire. Mai ai un 

principe, iéu: leissa li jouine faire à soun idèio. Coume acò, podon pas me reproucha de 

i’avié douna de marrit counsèu. 

La Maire. Mai tu, Catarino, as pas crento de reprendre ta paraulo; coume vas faire? 

Un garçoun que t’amo coume un fòu! 

Lou Paire. Avèn pas besoun d’un fòu dins la famiho. 

Catarino. Gusto m’amo tambèn e iéu l’ame. 

La Maire. Mai, Jan-Pèire, l’amaves tambèn. 

Catarino. Cresiéu de l’ama, belèu. 

La Maire. E quau te dis aro qu’ames Gusto dóu bon? 

Lou Paire. Dins tóuti li cas, quand sias pas segur d’ama, vau mies prendre lou plus 

riche. 

La Maire. Bello mouralo, segur. Es que soulamen lou couneissès, aquéu Gusto? 

Lou Paire. Lou couneissèn proun pèr saupre qu’es un galant ome e qu’a la bourso 

ferrado. E d’abord que vòu espousa Catarino, me sèmblo que de gènt coume nautre 

podon pas mai ié demanda. 

La Maire. I’a pas que li sòu dins la vido. 

Lou Paire. I’a belèu pas que li sòu, mai li sòu soun pas de rèsto e, à l’ouro de vuei 

n’en fau pèr soulamen viéure un pau coume li gènt d’aro. Sariéu un marrit paire 

s’empachave ma fiho de se marida coume vòu. 

La Maire. E bèn, iéu, siéu belèu uno marrido maire, mai aquéu Gusto m’agrado pas, 

noun pas que Jan-Pèire lou couneissèn, sabèn qu’es un brave garçoun e qu’aurié tout fa 

pèr rèndre Catarino urouso. 

Lou Paire. Urouso, urouso: uno femo es urouso quand pren aquéu que vòu e 

qu’aquéu que pren es capable de ié faire uno vido agradivo. Li bràvi garçoun fan pas la 

soupo meiouro e passa touto sa vido em’un brave garçoun que gagno tout bèu just pèr 

pas mouri de fam, es fin finalo uno tristo eisistènci. 

La Maire. Mai enfin, de que ié dirés à-n-aquéu paure garçoun, quand vai veni, tout 

aro? 

Lou Paire. Ié diren la verita. Que Catarino a chanja d’idèio, qu’a coumpres que lou 

rendrié pas urous e que, pèr soun bèn à-n-éu, amo mies reprendre sa paraulo. 

La Maire. Ié dirés, se voulés, mai iéu ame mies ié pas èstre. 

Lou Paire. O, tu, pèr lou courage, sabèn que siés pas forto. E bèn! t’en anaras. Ié 

parlaren. Ié faren coumprendre que vòu mies pèr éu se pas encara. N’en manco pièi de 

fiho! N’atrouvara toujour uno que lou voudra. 

La Maire. E vous fai rèn de pensa qu’aquéu paure garçoun vai soufri? 

Lou Paire. Se fara proun uno resoun. A soun age, se mor pas d’amour. E pièi, avèn 

de pensa au bonur de Catarino, avans de pensa à-n-aquéu de quaucun que nous es rèn. 

Catarino. E Gusto, creses que soufririé pas se ié disiéu, aro, que vole plus d’éu? 

Lou Paire. Catarino a resoun. Penses à Jan-Pèire, penses pas à Gusto. 

La Maire. Gusto a pas l’èr de quaucun capable de soufri pèr tant pau. 

Catarino (pessugado). Es tu que lou dises.

Lou Paire. Vo! Es tu que lou dises. Catarino a resoun. As un feble pèr Jan-Pèire. Acò 

t’arregardo. Mai es pièi pas tu que te marides. 

Catarino. Vos pas lou bonur de ta fiho! (Plouro) 

Lou Paire. Té! regardo toun obro! La vaqui que plouro. Te fai rèn de vèire ploura ta 

chato. Catarino, ploures pas! Ço qu’es di, es di. S’un cop Jan-Pèire vèn, ié parlarai, iéu, 

e faudra bèn qu’entende resoun. Restarès dins la chambro e boulegarés pas. Vòu mies 

que vous vegue pas. 

(Picon à la porto) 

Lou Paire. Es éu. Embarras-vous lèu. Ié vau parla. 

(Li femo sorton. Lou paire rèsto soulet. Vai durbi la porto. Intro un ome d’age). 

Sc.II 

Lou Paire. Té! Marcelin, que vént? Es pas tu qu’esperave. 

Marcelin. Siés soulet? 

Lou Paire. O, siéu soulet. De que me vos? As l’èr bèn secrèt. 

Marcelin. Un afaire proun delicat. 

Lou Paire. A quet prepaus? 

Marcelin. A prepaus d’aquéu garçoun que caligno ta chato despièi que Jan-Pèire es 

parti. 

Lou Paire. Gusto, vos dire? 

Marcelin. O, Gusto. 

Lou Paire. E bèn, de que i’a? 

Marcelin. I’a que vènon de l’arresta. Parèis que la pouliço lou recercavo despièi 

proun. Fasié partido d’uno bando que desvalisavo li burèu de posto. Tre qu’ai sachu que 

l’avien enmena, te lou siéu vengu dire. Coume acò, ta chato l’aprendra pas de quaucun 

autre que de tu. Vaudra mies ansin. 

Lou Paire. Te gramacie. A te dire lou verai, aquéu garçoun m’agradavo qu’à mita. 

Vesiéu proun que virouiejavo autour de Catarino e me fasié peno pèr aquéu brave Jan- 

Pèire qu’anavo reveni. Disiéu à Catarino: «Vas faire parla.» Remarco que Catarino avié 

douna sa paraulo à Jan-Pèire. Ero pas questioun que la reprenguèsse. Mai couneisses li 

gènt. An lèu fa de vèire lou mau. Basto! se l’an arresta, se n’en parlara plus. Vòu mies 

ansin. 

Marcelin. Me fai plesi de vèire que lou prenes coume acò. Aviéu pòu qu’aquéu 

falibustié vous ague tóuti enmasca. 

Lou Paire. De que vas cera! Pèr m’enmasca, iéu, lou Dorfo, aurié faugu que siegue 

mai fort que ço qu’èro. 

Marcelin. N’en siéu bèn countènt… Tóuti mis astru pèr li nòvi. Adessias. 

Lou Paire. Adessias e encaro gramaci. 

Marcelin sort.

Sc. III 

Lou Paire (sono li femo). Venès un pau eici. 

La Maire. De que i’a? 

Lou Paire. I’a que la pouliço vèn de metre la man sus vosto Gusto. Un poulit cocot! 

Desvalisavo li burèu de posto. Quand pènse que Catarino s’èro embanastado d’un 

coucaro d’aquelo meno! Anavo faire uno bravo cagado! 

La Maire. E quau ei que ié fasié faire? 

Lou Paire. E quau aurié pouscu pensa qu’aquel ome èro un pau-vòu. Siéu pas de la 

pouliço, iéu. (Catarino se bouto à ploura). Tu, Catarino, ploures pas. Es fini. N’en parlen 

plus. Jan-Pèire vai veni. Se t’atrovo en plour, emé ço que li gènt dèvon dire, 

coumprendra tout d’uno. Lou fau reçaupre coume se l’esperaves despièi de mes. 

La Maire. Ço que fau vèire! 

Lou Paire. Ames mai, belèu, que ta chato rèste au cavihié! Vouliés Jan-Pèire. 

L’auras. Déuriés èstre countènto. Au founs, Jan-Pèire es pas un marrit ome e à Catarino, 

pièi, ié desagrado pas. Parai, Catarino? 

Catarino (en plourant). A iéu, noun. 

Lou Paire. E bèn! d’abord qu’es ansin, deves èstre countènto, tu peréu. 

(Picon à la porto) 

Lou Paire (en anant durbi). Atencioun! Vaqui Jan-Pèire. 

(Jan-Pèire intro) 

Catarino (se jito sus éu). Jan-Pèire, moun amour! 

Jan-Pèire. Catarino, ma cardelino! 

Lou Paire. Bèn jouga! 

La Maire. Que garço aquelo Caterino! 

Ridèu 

*

I Counfraire Vignié 

Quand lou pouèto, ami, pèr vous, pren sa zambougno 

Vòu dire, fe de Diéu, que trovo bèu lou cèu, 

E se, pòu arriva, pamens, lou soulèu fougno, 

Avèn voste bon vin qu’es un autre soulèu. 

Ami, vivo lou vin que lusis dins li vèire, 

E que dins nòsti cor fai courre soun ardour, 

Lou vin, lou vin nouvèu qu’encantè nòsti rèire, 

Es pèr nautre, si fiéu, la suprèmo liquour. 

Quouro di Catalan de vin s’emplis la Coupo, 

Li Felibre, moun Diéu! soun coume en paradis: 

E d’abord que venèn pèr groussi vosto troupo, 

Nous batren pèr lou vin e pèr lou parladis.. 

Ansin, ami vignié, longo-mai nous ensigne 

Vosto flamo freirié la pas e l’amista. 

Dins un mounde crudèu, que lou vin sié lou signe 

Di deman de soulèu que voulèn espera. 

Reinié JOUVEAU 

A Bagnòu de Cese lou 20 de mars 1994 

*

L’Uiard de Pont-Sant-Esperit 

A la Maire adourable que m’ensignè li Pouèto 

Despièi sa descuberto, Guihèn e l’Angloro m’an pivela. Felibre fourestié, demore 

pas fisicamen en Prouvènço, au Païs de la “Lengo d’Amour”. Mai quand ié torne, 

toujour m’enfioco la fervour dóu Prince d’Oulando quistant sa flour d’esparganèu. Siéu 

nascu e reste, coume l’Angloro, à la ribo óucidentalo de Rose, que s’escound eici souto 

la planuro lemanico. Segur, sian pas de long di Ceveno, mai lou Jura traço la memo 

paralelo geougrafico e l’amo subre vivènto de ma maire trevo poueticamen si sapin. 

Adounc, chasque roumavage miéu devers Prouvènço retipo la desciso emé sa rigo de 

barco pantaiado. Que moun èstre vesible siegue pourta pèr l’autoumoubile o lou camin 

de ferre, l’esperit, toujour, navigo sus lou Caburle. 

I’a pau de tèms, d’ami souïsse que me sabon afeciouna dóu Miejour felibren, m’an 

demanda uno charradisso counsacrado à Frederi Mistral e la Prouvènço esouterico. 

Aletissènt ma dicho, ai percèupu lou Poulifèmo de Rose. Segur, coume se dis, “vène 

pas emé mi grand braio” de fin eisegète mistralen. Umblet, au countràri, sabe que degun 

es mouralamen perfèt e dève, iéu, coumbatre l’irritableta, serp verinouso que fai trop 

voulountié sibla lou sang de mis àvi; voudriéu pas mouri avans de saupre l’escounjura. 

Adounc, belèu pus qu’un autre, fuguère atentiéu quand retroubère Acis e Galatèio (Lou 

Pouèmo dóu Rose, cant VIII, L. LXVI), vitimo dóu “pastre Poulifèmo, qu’èro un Uiard 

e jalous de la ninfo coume se pòu pas mai, - oh! lou laid moustre! Li vai decebre avau 

que fadejavon. Abrama d’iro, arranco d’uno roco, éu, un clapas que toumbo à la barrulo 

e vèn, pecaire! escracha lou bèu parèu…” 

Poulifèmo es vertadieramen l’Uiard, lou Ciclope dóu soulet iue parpelejant au mitan 

de soun front. A soun regard borgne escapo lou relèu. Tóuti li plan se ié mesclon. Es 

l’iue, tout just, de l’iro abramanto dins la counfusioun di valour e de sis estànci. 

Adounc es Poulifèmo que fai mouri Guihèn e l’Angloro à Pont-Sant-Esperit. L’Uiard 

ié figuro l’enfachinage rabious que subre-chaupis Patroun Apian quand vèi arriba lou 

vapour “Croucoudilo”. E lou Marinié d’elèi, l’assabenta dóu flùvi, bravejo, s’óublido e 

cabusso dins uno terriblo fauto proufessiounalo. Semound à l’alibre dóu Croucoudile la 

maio de si barco e de si chivalas. Acò’s lou naufrage, lou cataclisme de l’Intelligènci: 

lou fièr trin marinié s’endevèn “rai de moutoun que s’encamino au tuiadou”, valènt-àdire 

se roumpre contro lou “Pont espaventable”. 

E Mirèio, la douço Mirèio, es-ti pas, tambèn, vitimo dóu Poulifèmo sicoulougi? 

Mèste Ramoun, dins soun nescige ourgueious, bouto sa chato au gourg de la doulour e

de l’esglàri. La paureto óublidara soun capèu… I Santo, Mèste Ramoun recurbira la 

justo ierarchio di plan e di valour, mai sara trop tard. 

Guihèn e l’Angloro soun persounage d’epoupèio e perèu architipe deliéurant. La 

flour d’esparganèu vòu demoura dins si man vivènto. La flour d’esparganèu vòu 

s’espandi en nous, coume la Roso de la Crous o l’Iris souleien, tóuti coumpausant de 

“l’ambrousìo que tremudo l’ome en diéu”. 

Fau ana dins la baumo de l’Iuard, em’Ulisse, lou Sutiéu, que fai mestié d’arrouina 

lou mau poulifemisant pèr pourta, Caburle vitourious, lou Prince e l’Angloro enjusqu’à 

la Font de Tourno, à l’autar de si noço pouetico. 

Francés Perret-Giovanna, 

lou Felibre de la Divouno 

Borex (Souïsso) 

* 

Preguiero i Santo 

A Folcò de Baroncelli-Javon 

Quouro li tèms vendran, qu’avien marca lis astre, 

quouro l’ouro vendra de vèire apereila 

d’Aigomorto i Salin e d’en Arle au Queila, 

mounta dins noste cèu lou signau di malastre; 

quand li mèstre de vuei aguènt passa pèr iue, 

e la terro partènt pèr soun darrié vouiage, 

l’aigo coumençara d’escoundre li ribage, 

quand lou mounde e Prouvènço intraran dins la niue; 

uno fes que saren au pica de la daio, 

Santo que couneissias la vigno e lou destret, 

lou plan e lou simbèu, la rego e lou coutret, 

la barco e lou fielat, l’oustau e la sarraio, 

Santo que vesias tout darrié vòsti merlet, 

nòsti lagremo, nòsti dòu, nòsti messorgo, 

lou nescige que tuio emai l’ourguei que morgo,

tóuti nòsti revenge e toui nòsti secrèt, 

souto l’aut pavaioun d’azur e de sinople, 

Lazare sus lou téume e Trefume au guidoun, 

sout vòsti velo d’or teissudo de raioun, 

autour de vòsti sant, acampas voste pople. 

voste pople, mita devot, mita pagan, 

de bracounié, de gardian d’ego e de pouèto, 

voste pople, cor siau, pèd segur, amo queto, 

de bergié, de marin, de fòu e de Gitan, 

emé tóuti si déute, emé tóuti si deco, 

e touto sa vergougno espinglado à la pro, 

si vint milo pecat, e, sout sis èr farot, 

si man nuso, si det maca, si bouco seco… 

Amiralo de Franço en grand mantèu d’argènt, 

coume i’a dous milo an venènt de Palestino, 

pèr la darriero fes prenènt la mar latino, 

segound la velo triplo e la roso di vènt, 

sèns carto ni sestant, sènso ancro ni boussolo, 

mai sèns plus de Grand Càrri e plus d’Adré la Crous, 

despachas, despachas de desfaire lou nous 

que retèn vosto nau à la ribo que molo. 

dóu mòssi au gabié, l’equipage renja, 

esperant plus que lou siblet di despartido, 

o Santo, entreprenènt la darriero embandido, 

la Gacholo amoussado e Faraman nebla, 

adusès dins li raisso e l’erso que deslamo, 

seguro dóu pilot, sèns remo e sèns fanau, 

pèr la darso darriero e lou darrié canau 

lou veissèu tout entié i pèd de Nosto Damo! 

Farfantello, óutobre 1939 

*

La luno e l’enfantoun 

Lou pichounet, sa man dins aquelo de soun grand, badavo la luno, que mountavo 

plan-plan, de darrié lei baus. Uno bello luno pleno, uno lunasso d’estiéu, maduro coume 

un gros càqui. 

Tout d’un tèms, lou pichounet faguè: 

- Digo, Papet, tu qu’as lou poudé d’aganta touto meno de bèsti, de la plus pichoto à 

la plus grosso, mi poudriés aganta la luno? En mai, sabes l’us pèr ana dins lou baus, 

parai? 

- E de que n’en voudriés-ti faire, d’aquel astre? 

- Voudriéu la pendoula dins ma chambro, au caire de la gabiolo ounte li a lou grihet 

que m’agantères e que mi chali de sa cansoun quouro fau la sièsto. 

- Pèr aganta la luno, moun bèu pitouet, li a un biais, si fa pas coum’acò. 

- Mai, digo, Papet, ai lou tèms, mai mi l’agantaras, parai? 

- Deman, assajaren, mai pèr l’ouro, vai ti coucha que si fa tard. 

Avans de plega lei parpelo, lou pichot diguè: 

- Papet, saras proun gai pèr l’aganta, perqué mounto foueço vite, sas? 

- Sarai proun gai, vai, ti l’agantarai. 

L’endeman, lou grand emplissè d’aigo lou buvadou dei galino e lou metè à pourtado 

dóu pichounet. Lou vèspre tiravo sei radierei cartoucho, e lou pichounet esperavo en 

virant coume uno bauduflo. 

- Vène, moun bèu, diguè lou grand, es quàsi l’ouro. Ti vau fa vèire la lèco qu’ai 

carculado pèr pessuga la luno, e saren just proun de dous. 

L’enfantoun seguissè soun grand e veguè ço que lou vièi avié adouba. 

- Mai, Papet, es d’aigo! Voli pas que la luno si neguèsse! 

- Mai moun bèu, si negara pas, la luno. Es uno fremo, e l’agrado de si miraia. Vaqui, 

dóu tèms que li sounjara plus, li mandaren un bourras dessus. Es bèn pensa que? 

- Papet, la viéu pouncheja darrié lou baus! 

La pleno luno atacavo de mounta d’aise, d’aise. 

-Viro-li lou cuou. La fau pas regarda, que noun vendrié. 

D’aquéu tèms, lou vièi avié douna un’auriho dóu bourras au pitouet. 

- Tèn bèn lou cantoun e quouro sara au bèu mitan, l’ataparen d’un soulet cop. As 

coumpres? 

Lou pichounet bouleguè la tèsto en signe de o, puei à souto-voues: 

- Papet, Papet, regardo, la viéu dins lou buvadou. 

- Espèro enca un pau, que siegue dins lou mitan. 

Lou pichounet s’agroumelissè tant que pousquè pèr noun si faire vèire de l’astre tant 

counvida. Sarravo dins sa maneto soun cantoun de bourras à li faire sourti lou jus. 

- Siés lèst, diguè lou grand? Zóu, l’anan. 

E touei dous atapèron d’un mume vanc lou buvadou. 

- Vène lèu à l’oustau, aro e ti revirés pas. 

En intrant dins l’oustau, l’enfantoun faguè peta sa joio.

- Mama, aqueste cop, avèn aganta la luno. La tenèn pèr de bouon! Aquéu Papet! Es 

terrible, que! 

- Mai aro, vai t’escoundre dins toun lié, la pendoularen deman. 

Lou vièi ome regardè un moumen lou pichounet que s’endourmè tant lèu, seis iue lou 

calignavon. 

Lou matin, tout bèu just leva, l’enfantoun demandè de vèire sa luno. 

- L’anan, Papet. 

- Eto, zóu, l’anan! 

Lou pichounet sautejavo, mai quouro arribèron, siguè espanta. 

- Papet... Lou bourras, l’es quàsi plus, la luno si sara escapado? 

- Eto faguè lou grand, mai pèr ti dire tout, l’ai un pau ajudado. 

Tout esmougu, l’enfantoun demandè perqué, la lagremo au caire de l’iue. 

- Ti fagués pas tant de bilo, ti vau counta l’afaire. Dins la niue, ausissiéu soun 

plagnun. Mi disié: 

- Miquéu, duerbe-mi. Laisso-mi m’enana, li a d’autrei pichot que m’espèron. Siéu 

pas bèn dins aquéu buvadou. 

- Alor, n’en poudènt plus, la faguèri escapa, e alor, mi saludè de soun rire. 

- Papet, s’as fa ansin es que falié bèn, puei, auriéu pas vougu la coupa en moucèu: es 

trop poulido. Lei troues sarien pas esta gros, amor que sian uno ribambelo de pichounet. 

- Alor, moun bèu pichoun, restan coum’acò. Mai mi proumetes de jamai douna lou 

mejan de l’aganta: siés soulet de counèisse la lèco. 

- N’en poues èstre segur, dirai rèn! 

- Mai coume la luno es uno gènto dono, e que li fa gau d’èstre mai au siéu, questo 

niue, ti fara un sourire, vèiras! 

La niue pounchejavo, lou grand prenguè soun felen sus sei ginous e touei dous à 

l’espèro, veguèron la luno mounta d’à cha pau de darrié lou baus, lou grand emé lou det, 

li faguè vèire lou rire de la luno. 

D’aquéu tèms, l’enfantoun s’èro agroumeli sus lou pitre de soun grand, lou gros det 

dins la bouco, e dourmié de la souom deis enfant, uno d’aquelo souom que tóuti lei 

pichoun n’an lou secrèt e que rèn vèn degaia. 

E la luno risié, risié, tant que soun rire atravessavo leis iue e lei gròssei moustacho 

blanco dóu vièi que badavo lou pichounet, e lou rire èro un eissame de pountoun. 

Aquéu jour, la luno e lou vièi ome fasien seis obro d’amour. 

Crestian Rinaudo 

*

Au Museon de Souliès d’aut-de-Vilo 

Devistaren li filousello 

E lis indiano subre-bello 

Amiraren braio e gilet 

E li debas e li boumbet, 

E li couifo de touto meno 

En estofo fino emé leno; 

Couifo liso, couifo à canoun 

Li couifo à gauto, li couifoun 

Li supèrbi couifo à courduro 

Emai li couifo de piquro! 

…Li bèu courset espingoula 

Emai li courset courdela! 

Veiren perèu de limousino 

E de fichu de mousselino 

De raubeto, de ‘tèn-ti-tout’! 

De tartan e de moucadou, 

De coutihoun ‘peço sus peço’ 

Resplendissènt, plen de belesso! 

De coutihoun ‘à desparta’ 

Que soun tout plen de majesta! 

De coutihoun pica … e bouto! 

Tambèn aquéli ‘de dessouto’! 

De mito à jour, de susarèu 

De blodo bluio, e de capèu! 

De camiso que soun requisto 

De caraco, de casaquin 

Emai de soulié balarin! 

Tout acò fieramen pivello 

E nous fai gau, e nous abello! 

O lou bèu tresor culturau! 

Serva dins lou flame fougau 

Serva en vilo bèn-astrado; 

Au Moulin en pèiro sacrado 

Au moulin d’òli espetaclous 

Amount dins lou cèu linde e blous! 

Reinié Raybaud

Laus de Clemènço Isaure 

Laus de Clemènço Isauro legi en sesiho publico, lou 3 de Mai 1994, à l’Acadèmi di 

Jo Flourau de Toulouso, pèr segne Andriéu Turcat, Censour de l’Acadèmi 

Gènto Dono, 

Es à vous que me vole adreissa, d’abord que sias emé nautre sus aquéu pountin, vivo 

e douço, emai mudo, 

Car es vous, pèr lou sang, que sias drecho eiretiero 

D’aquéli rèi troubaire e di troubaire rèi 

Qu’au parla toulousen dounèron pèr frountiero 

Tóuti lou souleiant e tóuti li coustiero 

Ounte l’amour fai lèi. 

Es vous que sias l’idèio, es vous que sias lou signe 

Lugrejant sus lou front di pople ounte regnas; 

E tout ço qu’es pious, noble,auturen, ensigne, 

E tout ço que voulèn que lou pouèto ensigne 

Es vous que l’ensignas. 

E li flour benesido à la glèiso Daurado, 

Li flour que vosto man cuei e distribuïs, 

Reviéudon, an pèr an, nòsti glòri sacrado, 

E gounflon mai-que-mai l’ourguèi de l’encountrado 

E l’alen dóu païs. 

Ai las! soun pas miéu, aquéli vers, amor que fuguèron prounouncia, eici meme, l’an 

1879, pèr lou grand Frederi, reviscoulant l’usage de la lengo d’O, óublida de nosto 

Coumpagnié durant tres cènt quaranto an. Acò s’aprenguè à-n-aquel edit de Vi l l e r s - 

Cotterets, estigança pèr restanca lou latin e que nòstis àvi prenguèron tambèn pèr uno 

restanco de nòsti parla prouvinciau. Mai meme pèr lou latin an pas capita, doumaci lou 

gàubi d’ùni sòci que i’a gaire n’en flouriguèron si discours de quàuqui dicho dins 

aquesto lengo. 

E desempièi, voste laus, gènto Dono, noun fuguè mai dich en lengo d’O enjusco l’an 

1925 pèr uno femo (n’i aguè pamens vounge à pourta d’aigo à-n-aquéu moulin), 

Filadelfo de Gerdo. Leva de sièis qu’an segui li piado dins li divers dialèite d’O, cinq lou 

faguèron en vers; e dempièi aquéu tèms trento dous cop aquel óumage vous fuguè rendu 

en vers francés. Dins lou mesclun de vòsti calignaire, ai pica un evesque, tres abat 

(aquéli d’aqui en lengo d’O), un prince regnant, un menistre, un amirau, e mancariéu 

s’óublidave lou laus debana i’a d’acò cinquanto quatre an pèr lou Comte d’Antin de 

Vaillac, moun predecessour dins lou vinto-seten fautuei, paire e grand de nòsti

Counfraire d’encuei. Mai vaqui l’item: demié tóuti aquéli catau, degun noun quinquè 

plus en prouvençau. 

Dóu cop que Mistral fuguè lou soulet, pode dire que l’ounour de laura lou meme 

tenamen es pas la buteto cènt quinge an à l’après, e l’escoumesso es tihouso. Tambèn 

aqueste laus, noun lou farai. D’aiours tout es esta di, Dono, e m’estounarié 

qu’esperessias quaucarèn d’ouriginau à la co -perdounarés à moun ourigino uno chifro 

de mai- de quatre cènt cinquanto fes. 

Mai se me coumpelissès au noum de la tradicioun que nous recampo à noste entour, 

vole bèn vous dire que sias douço, grando, bello, sauro, tèndro, e en demai vierge se 

vous agrado. Bouto! Lou dise! Em’acò? 

Dóu tèms qu’erias uno fatorgo, acò fasié pas mai. Mai dempièi nòu annado de tèms, 

dempièi que noste paure Counfraire Maurise Duby espeluquè e pledejè vosto causo 

davans lou tribunau de l’Istòri, dempièi que cresèn à vous pèr de bon, emai aguessias la 

semblanço e la palour dóu maubre, o belèu dóu gip, noun se pòu dire que que siegue, 

coume que siegue la lengo estranjo que destraucariéu. Car en foro de la lengo nostro e 

de nòsti dialèite d’O, pensave, iéu, pèr faire quaucarèn de nòu, au grand patrimòni di 

milànti parla dins lou mounde, que revelon chascun la diversita dis ome e di climat. Mai 

tóutis aquéli s’endevènon mies: 

— siegue un rufe sóudard, de-fes envahissèire, dóu mounde german, em’au Diéu 

trascendènt d’un Schiller; 

— siegue i chivau emé l’arabe, partènt dóu pur-sang di pouèmo de Imru’al Qaïs 

enjusco lis asenas de l’Atlas; 

— siegue i pintre e i nivo emé si milànti biaisejado de l’anglés e di cèu de Turner; 

— siegue i pensaire emé li mot e li dicho dóu francés d’un Bergson; 

— siegue i coumputour emé lou jargoun de la vau dóu silicium, de ges de biais 

coutrìo emé la pouësìo. 

Fin finalo, miés que tóuti, s’endevenon au femelan nòsti parla dóu Miejour, lóugié 

coume l’italian, fièr em’acò coume nòsti vesin de la man d’eila di Pirenèu, e subretout, 

davans l’espelisoun de nòsti flour, canta emé la desiranço respetouso de Bertrand de 

Born, e vuei encaro emé li counsouno respignant dins li gave engourga dins nòsti 

mountagno o majamen — perdounarés moun racinage arrapa à Prouvènço – emé la 

founso douçour dóu Rose estalouira, de Vincèn, de Calendau, emai aquelo de Mistral pèr 

vous saluda: 

Ero vous, èro vous dono Clemènço Isauro, 

Que sèmpre amistadous i troubaire fidèu, 

En vesènt vosto lengo assalido pèr l’auro 

Ié faguerias riseto, e prenguerias la pauro 

Souto vosto mantèu. 

Mai mounte soun voste mantèu, de lano o de sedo, voste èsse de car, vosto 

benfasènço de testarello à respèt de nautre? Eh bèn, es esta di que dous Proufessour de 

Dre de voste siècle cavèron en cadiero sus lou legat d’uno Dono, pèr de bon noumado 

Clemènço, e la capacita d’uno Vilo de lou reçaupre pèr estigança nòsti Jo. Es esta di 

tambèn que lou Clavaire di Capitoul paguè un pintre pèr vosto epitafo. Alor segound la 

lougico imparablo d’un juge, que Carle Maurras la rapourtè à la bono: «Se pago, es

qu’enterro, e s’enterro, la morto es enterrado», valènt à dire que visquè. 

Mai dins lou laus de Maurice Duby, i’a de manco e se pòu countesta dous poun: 

— Vous dirian pas d’Isauro, estènt qu’aqueste noum vous l’aurien mes après vosto 

vido vidanto. Pamens faudrié dire perqué lou faguèron. Mai bono-di uno generouso 

badarello de nosto Coumpagnié, uno referènci dóu siècle segen me faguè lume, disènt 

qu’aquesto Clemènço tenié soun noum d’oustau de soun segne paire, Louvis, felen dis 

ancian Comte de Roudès. Basto! Avès pas ges d’estaco em’aquéu païs liuenchen dóu 

Levant, l’Isaurìo d’ounte venguè aquel Emperaire de Bisanço Leoun, icounouclasto 

d’aiours e qu’aurié di de nàni à-n-un moudelage de vosto estatuo. De mai vous refuson 

meme que vous aguèsson di Clemènço, un dre de l’Eternau soulet o pèr delegacioun di 

Mèstre e Mestresso tenènt lou poudé. Es verai que segound l’abitudo di païs d’O, vous 

aguèsson pulèu mes lou noum de voste ome, ço que dóu cop levarié la darriero epiteto 

que vous empeguèron. De la memo sourso que vous disiéu tout escas, e que farié mestié 

de verifica, vosto patrìo, qu’es tambèn nostro. De tout biais tèn pas dre la resoun 

countràri e trop escoulatico qu’aqueste prenoum fuguè escassamen pèr li Rèino. 

E s’erias Rèino? Aqui siéu mai à moun cèntre. S’agis plus d’uno epiteto, mai d’un 

estamen. Rèino d’Isaurìo? Que noun! Siegués servado sus nòsti ribo. Rèino de Pouësìo. 

Ges de meiour moutiéu pèr la pousterita de vous baia aqueste noum qu’es bessai pas lou 

de voste batisme crestian. Aquéu nous counvido à vous pourgi emé Jóusè d’Arbaud 

noste respèt e nòsti flour: 

Escusas, o Rèino bello 

Aquéu bouquet salabrous 

D’ièli fèr, de saladello 

E de lausié secarous. 

Sara dins lou meme tèms lou bouquet de mi quatre cènt cinquanto davancié, e tres 

cènt cinquanto autre que me sucediran enjusco lou milenàri de nosto Acadèmi. Mai liuen 

pamens la visto me desfauto. 

Gramaci, gènto Dono, de nous ispira. Gramaci d’escouta, annado à cha annado, 

sènso cala d’un sourrire ounte ai la sentido d’un pounchoun d’escàfi, aquésti lausenjo 

que soun pas toujour de l’en-dessus dóu panié. Mai iéu, me n’en siéu engarda, e me 

revèn pas l’escàfi. 

Gramaci tambèn à vautre que m’avès escouta, e peréu à-n-aquéli qu’an rèn 

coumprès, e meme que legisson uno reviraduro que fara pas miés, à leva de lausenjo, 

que l’umble oumage d’un Mantenèire à sa Rèino. E pèr pas carga un role que lou 

sachère pas teni, acabarai en sounant un cop de mai Mistral, s’adreissant à nautre, à 

vautre, à Toulouso e au Miejour: 

Ve! Mantene ta lengo istourico… Es la provo 

Que toustèms, aut e libre, as pourta toun blasoun. 

Dins la lengo un mistèri, un vièi tresor s’atrovo… 

Chasque an, lou roussignòu cargo de plumo novo, 

Mai gardo sa cansoun.

Au brès de Mistral 

Quand lou cor gounfle d’alegresso, 

Lou ràfi cridè: «La mestresso 

Vèn de n’en faire un bèu!» o vièi Francés Mistrau, 

E qu’aguènt pausa toun araire, 

Majestous coume un emperaire, 

Pèr li draiolo dóu terraire 

Reveniés vers toun mas dins l’azur vesperau, 

Quau t’aurié di que lou remèmbre 

D’aquéu grand vèspre de setèmbre 

Nourririé l’estrambord d’un pople renadiéu? 

Quand diguères, segound l’usage: 

«Que Diéu lou fague grand e sage!» 

Quau t’aurié di que toun presage 

Amount èro marca dins lis astre de Diéu ? 

Quand la calamo dóu campèstre 

T’agouloupavo e qu’à grand dèstre 

Caucigaves li plan envahi pèr l’oumbrun, 

Quau t’aurié di qu’à-n-aquelo ouro 

Mounte un nistoun sourris e plouro 

La blanco estello que s’aubouro 

Anavo pèr toujour coucha lou calabrun ?… 

E tu, crentouso glenarello, 

Quand d’un voun-voun de bressarello 

Tintourlaves toun fiéu en ié douna lou la 

Après i’agué douna la vido, 

Quaut’aurié di, maire ravido, 

Qu’un bèu jour di, la Prouvènço avido, 

A toun oustau vendrié pèr se reviscoula ? 

Ço qu’es escri dins lou grand libre 

Degun lou saup…e lis alibre 

De la rodo, ounte Diéu a grava li destin 

E lou verai de touto causo, 

Viron de-longo…e sènso pauso 

L’auto vertu que i’es enclauso 

Nous desvèlo au tremount la bèuta dóu matin ! 

Mai lou Miejour jamai óublido

L’encantamen de l’espelido 

E li proumié poutoun dóu soulèu risoulet: 

Nosto pensado que varaio 

E s’espacejo dins li draio 

Vuei se remèmbro touto en aio 

Qu’eici lou grand Mistral èro enca Mistralet… 

Prefum d’estiéu, zounzoun d’abiho, 

Bluio clarour sus lis Aupiho, 

Tout ço que d’un païs, i’a cènt an coume vuei, 

A fa la forço emai la joio, 

Tout ço que vuejo amour e voio 

A l’amo lindo di ninoio 

Boulego enca li cor, enauro lis ourguei. 

D’eici s’aubouro uno auro misto 

Qu’eilalin, à perdo devisto, 

Dauro ufanousamen la pouncho di ciprès; 

D’eici la lus trauco l’oumbrasso 

Que sus Prouvènço se tirasso, 

E touto sourno tartarasso 

De-bado uso sis àrpi à-n-aquéu pichoun brès… 

Car dins la pas d’uno naturo 

Ounte l’engèni s’amaduro, 

Mistral a reçaupu Mirèio à soun fougau… 

E dins l’andano ounte s’estalo 

Dis óulivié l’oumbro argentalo 

S’ausiguè pièi de cansoun talo 

Que l’amo de Vergèli a tresana de gau ! 

Bruno Durand 

*

Lou Bessihoun 

(dins la flambour dóu soulèu tremount) 

Toun relèu courouna d’uno roco pelado, 

Einegado de lum dins la frescour de l’èr, 

Segnourejo un relarg de colo enmantelado, 

Pèr lis éuse e li pin espes e sèmpre verd. 

Dins lou ruscle de lus e de la mistralado, 

Dins lou vaste ourizoun linde e bèn descubert, 

Mountagnolo vareso alin dins ma valado, 

Oh! coume siès poulido au clar soulèu d’ivèr. 

Car l’astre en trecoulant eila de vers Marsiho, 

Emé si darnié rai tencho ta roucasiho 

E dins la vignaredo enpandido à l’entour, 

Parèi un castelas esmara subre un mourre, 

Mestrejant vuei encaro emé si vièii tourre, 

Un galant vilajoun enfloura de lusour! 

* 

Reinié Raybaud 

Vacanço bastidano 

Me souvène… quant fai de tèms acò? D’annado e d’annado… Li souveni de 

l’enfanço, que li cresèn esvali, demoron viéu dins la souto counsciènci e lest à regreia… 

N’i’a proun pèr acò d’uno cansoun d’enfant… 

Lou mai se poudiéu agué sèt an! Me revèse en aquéu jour de l’estiéu que 

m’aduguèron au mas pèr de vacanço liuen de la vilo. La revèse, aquelo chatouno 

crentouseto… quichave la man de ma maire que l’anave leissa pèr lou proumié cop e 

durbiéu d’iue coume de paumo davans un mounde que lou couneissiéu pas… 

…E li jour debanavon soun cabedèu… A toujour courre pèr orto, ma caro palinello 

avié pres coulour. La tanto, urouso, me disié: “Ti gauto, aro, an d’acò de l’ambricot!”… 

Li vacanço pamens s’estiravon. Que fuguèsse vengudo uno masiero de proumiero? 

Noun lou poudiéu afourti. Pamens, aguènt fa de moun mies, es tout un mounde nouvèu 

que s’èro dubert à mis iue d’enfant… un mounde que me n’en doutave pas. 

Adounc, tout anavo charmant enjusquo en aquéu jour que… 

Tenian la fin di vacanço. Avalido li calabreno avoustenco, n’aproufichave, dins la

douçour de setèmbre, pèr tasta touto la sabo di darrié jour de vacanço, coume 

agroumandido de rèn perdre d’aquéli moumen de liberta qu’èron à mand de s’esvali. 

Lou mas, en aio, s’alestissié pèr lis obro autounalo. 

Davans lou mas, la tanto jardinavo un brisoun, pèr dire d’agué à pousito lou brout de 

juvert que ié farié mestié… un àpi, que n’en culissié uno branqueto pèr lou boutocouire…e… 

de poumo d’amour! que, dins un dina d’estiéu que n’en sarié esta sènso… 

la tanto noun poudié se l’imagina! 

Plus liuen, darrié lis enclaus, paradis di galino, es l’ouncle que faturavo, emé forço 

peno, uno terro chicho e secarouso. Dins lou gres, à ras de la pinedo, ié venien d’amelié; 

dins gaire sarié tèms d’acana e faudrié pièi desbloua lis amelo, obro de vihado…ai-las! 

ié sariéu pas, iéu! pèr prendre part à-n-aquéu travai tant plasènt… L’escolo! L’escolo que 

tardarié pas de me souna! Lis aviéu tastado, pamens, lis amelo, en lis escrachant entre 

dos pèiro… 

.Quàuquis ambricoutié, que dounavon de fru bèn pichoutet mai goustous… de 

lentiho… que demandavon pas de bèure… pèr la memo resoun de cese. Dins un endré 

un pau meiour… que la terro se ié trouvavo un pau mai abelano, de poumo d’amour: 

mai aquéli jamai noun s’ameritarien lis ounour de l’òli d’óulivo que prefumavo lis 

ensalado de nòsti taulejado estivalo souto l’autin. Pas forço grosso, que vesien l’aigo 

quand plouvié! e, ai-las! plouvié pas de l’estiéu! cremesino dis arderòusi souleiado, 

pulèu loungarudo…ié disian li pendeloto. Farien mirando, l’ivèr, dins li sausso, li tian, li 

fricot… La tanto, en prouvençalo raçado qu’èro, jamai aurié sachu adouba un fricot 

sènso ié douna goust e coulour dóumaci un bon cuié dóu coulis de poumo d’amour 

tradiciounau. En aquelo fin de setèmbre, lou gros afaire èro justamen d’alesti lou 

precious coulis que, majamen, assabourarié la mangiho la mai fadasso de l’ivèr. Li 

poumo d’amour amadurado just e just, èro plus tèms de lambineja; lou foudau negre 

virovòutavo, revoulunavo tant que! Deja, souto l’envans de la remiso, s’èro bouta fiò 

souto lou gros peiròu. L’ouncle, à barioutado, adusié li bèu fru rouge. La tanto, dinsun 

vira d’iue, detriavo li que s’atrouvavon un pau maca; de soun pichot coutèu pounchu li 

triavo, li pelavo, ié levavo li grano e autant lèu,li mandavo dins lou peiròu. Lis autro, de 

la pèu lisso e lusènto, li reservavo pèr un sort mai glourious. Dins aquelo obro, li det, 

boudenfle de milànti bugado, retrouvavon uno agilesso que m’espantavo. Pescavo dins 

lou mouloun, n’en tiravo uno poumo d’amour en la tenènt pèr lou pecout, l’apoundié 

emé d’autro dins uno meno de trenello trelusènto que s’aloungavo… s’aloungavo… Lou 

rest de poumo d’amour s’en anavo pièi rejougne si coumpan penja au saumié. Acò fasié 

uno poulido garlando qu’agalantavo la remiso pulèu sourno. Iéu, que metiéu moun nas 

d’en pertout, pensas s’aquelo boulegadisso nouvello m’escarrabihavo! E vague de vira 

lou coulis emé lou gros cuié de bos! e vague de metre de gavèu! pèr empura lou fiò! 

trop! e la tanto cridavo:”Mai me fara veni rababèu, aquelo pichoto! pamens èro pas 

fachado! 

Assajère meme de trena d’esperiéu mi pendouleto mai moun rest se devinè talamen 

tort que m’alassère en me vesènt tant mau engaubiado. Poudiéu pamens pas me leva 

d’aqui, mi jo abituau vengu subran sènso atiradis… sènso gràci… restave tancado 

davans lou peiròu que coumençavo de bouli.

Me countavo, la tanto, que s’un cop lou coulis sarié proun espès, l’anavo bouta dins 

uno pocho pounchudo, uno meno d’embut de telo, penja à la branco basso de la figuiero; 

tout lou jus s’escamparié, s’agoutarié fin qu’au darrié degout e, à la fin, noun 

demourarié qu’uno meno de pasto de poumo d’amour quàsi seco que se poudrié serva 

enjusquo l’an que vèn. 

S’enauravo dóu peiròu uno oulour au cop aisso e doucinasso que, de tèms en tèms, 

me restè en memento, ligado emé de souveni de fin de vacanço. Long-tèms, l’autouno 

aguè pèr iéu l’óudour di poumo d’amour que soun jus s’espessissié dins lou peiròu… e 

la coulour di rest de pendeloto que dansavon dins la remiso. 

La tanto, abandounant uno minuto soun travai, rintrè dins la souiardo, n’en sourtiguè 

dins la memo minuto dins un nouvèu viravòu de soun faudau… Se secant li man, venguè 

au lindau en disènt: “Te! Pichoto! vèses que vuei l’obro es pas de manco, vos m’ajuda? 

anaras dins la grand salo e me radurras uno damo-Jano. Un revoulun dóu faudau 

negre… virè li taloun e s’encafournè mai dins la souiardo. M’avié di acò, la tanto, 

coume se de rèn noun èro, coume quaucarèn de tras qu’ourdinàri… sènso manco me 

regarda… mai iéu, palaficado…tancado…pensave…perpensave… chifrave… Que ié 

radugue madamo ano? Mai quau sara aquelo? La counèisse pas! e pièi… i’a jamai agu 

degun dins la grand salo! Mai noun! A pas di: madamo Jano! a di, l’ai encaro dins 

l’auriho: Uno damo-Jano. 

Uno damo-Jano… de que sara acò? Ausave pas de leva lengo sus aquéu mistèri. Mai 

que d’un cop s’estounavon de moun noun saupre li causo pèr éli parlanto de sa vido 

vidanto… e se trufavon… Oh! emé gentun… pamens se trufavon. Crento de ié douna de 

rire un cop de mai, sènso muta, me gandiguère vers la grand salo en pensant: ma fisto! 

veiren bèn! Se d’asard i’a quaucarèn d’estrange dins aquelo salo, segur que sara la 

damo-Jano. 

Ai-las! Noun i’avié rèn d’estrange dins la grand salo! D’aiours, i’avié rèn. Rèn que 

de post que courrien contro la paret… de post ounte, arrengueirado s’epoumpissien de 

boumbouno forço poulido dins soun vièsti d’amarino… 

Aviéu bello de cerca, de bousca… pèr cantoun e recantoun… rèn de rèn! M’en vau ié 

dire à la tanto! Té! La vaqui just que nasejo à la porto: 

Alor, mignoto? aquelo damo-jano? 

Pancaro ai fini de dire que n’i’a ges, que la tanto, maugrat soun èr mouquet, 

s’escacalassè!!! 

- Lou sabiés pas ço qu’èro uno damo-jano? Mai, bedigasso! lou poudiés pas dire? 

E, sènso balança… aganto la boumbouno la mai procho e s’en vai, toujour risènt! 

E noun demoro dins la grand salo… qu’uno pichoto emé li rouito… mandant d’uiado 

enmaliciado vers ùni setanto damo-jano…lusènto…e boudenflo coume s’anavon espeta 

qu saup… DÓU RIRE !!!!!!! 

Mirèio Barême 

Prèmi Aubanel au Flourège d’Avignoun (tros) 

*

Quis desiderio sit pudor modus 

Tam cari cupitis 

Ouraci L.I. Odo XX 

Odo à-n-Ansèume Matieu 

Castèu-Nòu! Castèu-Nòu! Sus ti blùii coustiero, 

De vers li Coumbo-Masco, au mié di vigno en flour 

Quau ei aquelo bruno e galanto grangiero 

Que vai, lou pitre au vènt, lis iue gounfle de plour? 

L’Estello di Sèt-Rai sus soun front esbrihaudo! 

Elo, plourant de longo, em’un pan de sa faudo 

Eissugo si poulit vistoun. 

Felibre, aplantas-vous… Que chascun, tèsto nuso, 

La countemple!… Es Galouno, es Agueto, es la Muso 

Dóu gènt felibre di poutoun! 

Oh! di sèt rai de nosto Estello 

Segur n’i’a de mai lumenous; 

Mai digas-me, jouvènt e bello, 

Se n’i’a de plus pur, de plus dous, 

Que vous ensoulèie mies l’amo, 

Que mete au cor plus casto flamo, 

Que vous rende mai pensatiéu! 

E vous, mi mèstre, o grands artisto, 

Quau a d’estrofo mai requisto 

Que li qu’as trenado, o Matiéu. 

Tu siés noste Catulle, e tu siés noste Ouràci, 

Car as lou cor ardènt, e l’engèni, e la gràci 

Di grand mèstre dóu tèms passa. 

E quau, dóu Gay-Saber, miés que tu, gènto abiho, 

A rauba sus li flour lou mèu e l’ambrousìo 

Que li Troubaire avien leissa. 

Ebri d’amour, de souleiado, 

De vin claret de ti coutau, 

En varaiant sus li terrado 

De toun galant païs nadau, 

Tu pantaiaves que poutouno 

Sus frésqui gauto de chatouno 

A l’iue viéu, au pitre dubert; 

Tu depintaves ta vignasso

Louis Tombarel 

En ramo drudo e rouginasso, 

Penjant, bèlli grapo, à toun vers. 

E bagnado di Plour de l’Aubeto naissènto, 

O neblouso coumo un bèu sero, o calourento 

Coumo, à miejour, lou souleias, 

Tis estrofo, enliassado en gaio farandoulo, 

Lesto e pourtant au sen un brout de ferigoulo 

Davalavon vers li campas. 

Coumo Cloè, coumo Lesbìo, 

Coumo li chato dóu Coumtat 

Vous pivelant de sa babiho, 

Vous enchusclant de sa bèuta, 

S’oupilo, adrecho coumo de fado 

Simplo e pamens bèn aliscado 

Desplegavon si roudalet, 

Dins li blad rous, long di ginesto, 

E vous fasien vira la tèsto 

Coumo lou vin de ti coulet. 

Bèllis estrofo, ai-las! à vosto gento escagno 

Aro s’apoundran plus de nouvèlli coumpagno… 

De la glòri dins li trelus, 

Long di siècle à veni countunias voste brande, 

Car lou que vous trenavo e vous dounavo l’ande 

Dort lou grand som que finis plus! 

Mai de l’amour dóu bèu touto amo que barbello 

Voudra poutouneja vòsti vers inmourtau, 

E dira ‘n aprenènt d’ounte venès, o bello! 

« Castèu-Nòu, glòri à tu, pos pourta lou front aut! » 

E tu, brave Matiéu, sourriras dins ta glòri! 

E nous-autre em’amour gardaren ta memòri… 

E quand, de tout caire e ventoun, 

Ensèn, de Castèu-Nòu vendren treva li Coumbo, 

O Mèstre, laisso-me sus la Crous de ta toumbo, 

Emé respèt, faire un poutoun! 

*

Routo eigadouso…? 

Plòu, plòu, plòu, moun amigo, plòu…! aquelo cansoun de Charloun èro dins ma 

tèsto, uno niue d’un divèndre pluvious de nouvèmbre dis annado seissanto d’aquéu 

siècle vinten. A-n-aquéu moumen de ma vido, moun mestié de plaçaire-barrulaire, aro se 

dis “VRP”, me falié travaia subretout dins la Prouvènço e m’entournave à l’oustau 

semano facho, passa lou Muei, dins lou Va r, en venènt de Marsiho, vilo que vesitave 

d’aise d’aquéu tèms mounte i’avié encaro de plaço pèr tanca sa veituro davans sa 

pratico… 

Lou tèms a passa, lou souveni es resta e, poudès me crèire, n’en siéu encaro tout jala 

d’aquest auvàri. Pèr rintra à moun oustau de Cano, passave pèr aquelo celebro 

“Naciounalo sèt”, souleto routo de “grand trafi”, coume disèn dins lou jarg o u n 

d’autoumoubiliste que sian, quouro passan la majo part de nosto vido proufessiounalo 

pèr orto e pèr camin. I’avié ges d’autorouto, bèn entendu, e falié tuia lis ouro au voulant 

em’un poste de radiò, pèr li mai riche, vo tout simplamen, de cop que i’a, en cantant e, 

quouro sias cantaire, acò es lou mai facile de segur; ço que fasiéu ‘mé lou rounfla de la 

mecanico en guiso d’acoumpagnamen! 

L’aigo toumbavo de longo despièi quàuqui jour e un vènt catiéu de mar boufavo dins 

lou travers de la routo, tant fort que falié aganta lou voulant di dos man pèr bèn teni sa 

veituro dins la drechiero. Tirant camin, vaqui que pounchejo eilalin la crousiero de la 

routo qu’à man drecho meno à Roco-Bruno. Au mitan dis “escoubo-vitro” que 

marchavon lèu-lèu, la visto èro tant tapado d’aigo que se vesié tout bèu just pèr pas se 

desbaussa dins la roubino negado long de la routo. 

Maugrat uno vitesso plan-planeto, l’autoumoubilo devenié à cha pau un “barquiéu à 

petròli” que garbejavo mai que mai. Subran, me ramentère qu’en aquel endré dóu 

crousamen, la routo semblavo un valat que picavo un pau d’en proumié, pèr mounta 

tourna-mai après agué passa un cafetoun que se trouvavo à man gaucho, à la baisso de la 

calado. 

Aqui, moun “passo-carriero” gisclous anè s’acaba dins la mountado, un centenau de 

mètre en amount dóu lougissoun. Lou moutour de la “203 Peugeot” vouguè plus rèn 

saupre e la veituro se tanquè au mitan, talo uno barcasso à l’ancrage, dins la partido à 

drecho de la routo, urousamen! 

E aro! de que falié faire? Lou moutur èro esclabousi d’aigo de segur e deviéu sourti, 

souto la plueio drudo, pèr assaja de seca un pau, de moun mies, li bougìo belèu, fin 

qu’aquéu moutour trobo de nouvèu soun bèu rounflamen… Lou tèms d’aganta un paroplueio 

à coustat de iéu, tambèn uno lampo de pocho dins la gàbi dóu tablèu de bord, uno 

estrasso à mi pèd, sènso óublida, bèn entendu, de despestela lou capot, e vaqui lou 

“chivalié” lest pèr afrounta…la mecanico bagnado! La pourtiero se durbiguè pèr bonur, 

just un pau en dessus de l’aigo que me ié trouvave li pèd e li boutèu dedins e… “floc”, la 

chavano m’agouloupè e aro, semblave un marin sus lou pont de soun bastimen, un jour 

de tempèsto en…Mieterrano.

Es aqui que la tragèdi coumenço! 

Avès-ti deja tengu dins la memo man: un paro-plueio, dubert contro lou vènt, uno 

estrasso e uno lampo de pocho, dóu tèms que de l’autro man assajas de durbi un capot de 

veituro coume se farié d’uno bouco de croucoudile? Poudès me crèire, acò’s pas eisa 

quouro lou vènt boufo pèr raisso, que la fre vous fai trampela e qu’avès l’esquino 

roumpudo ‘mé lou nas dins la mecanico…, basto! 

Au moumen d’assaja de seca, de l’estrasso, l’endré que fasié masso à l’entour di 

bougìo, uno rounflado mai forto que lis àutri me raubavo subran moun… tant poulit 

paro-plueio, tout nòu de la vèio, un moudèle nouvèu, especiau pèr lis autoumoubiliste e 

que se duerb soulet… 

Ai pas pouscu l’empacha de vouleteja e de se tanca, fin finalo, au mens à trento pas 

de iéu… dins li vigno procho, rèn qu’acò! 

— Adiéu moun paro-plueio, adiéu ami; t’amave bèn, me manques que me 

mancaras… 

— Messourguié! es pas acò qu’es di. 

Vo, me ramente qu’ai crida ma coulèro coume aquéu generau d’Empèri tant 

couneigu…, sènso óublida li litanìo prouvençalo que couneissèn tóuti, bèn entendu e, 

quatecant, ai agu la sentido de moun desprouvesimen. Tout soulet dins aquelo estendudo 

eigadouso que gelavo mi cambo e tambèn ma tèsto, sènso capèu, e tout moun èstre, 

assajè de countunia lou secamen coumença. Aguère un moumenet l’idèio d’ana cerca 

moun paro-plueio, mai me falié passa la roubino, entre li platano que bourdavon la routo 

e que, d’aquelo roubino, se vesié pus ges de traço, èro nivelado pèr lou lau artificiau, 

obro d’uno plueio loungasso sus aquelo terro argelouso. Alor, ai tapa lou capot e siéu 

rintra dins la veituro, proun bagna qu’ère, pèr faire “parla” enfin, de segur me disiéu, lou 

moutur. Après quàuqui cop de demarrour, aquelo mecanico voulié rèn assaupre, restavo 

muto, voulié pas tussi uno souleto fes. Me siéu di alor que falié pas perdre lou mourau 

que li gènt d’aqui soun pas de sauvage, soun de bràvi Varés, e que troubariéu bèn 

quaucun pèr m’ajuda, siegue un garagiste, siegue li gendarmo e que falié ana li souna 

dóu cabaret proche pèr pas passa la niue sus aquéu flume dins la fre e la trempado. 

Lou tèms de clavela li pourtiero de la veituro pèr segureta, aro me falié bèn me 

desbrouia de camina, sènso auvàri nouvèu, enjusqu’à la begudo que soun lumet se vesié 

de liuen. Aviéu estaca un touaioun sus ma tèsto, en plaço de paro-plueio, e ère lest pèr 

un “cènt mètre” en gaubejant aquéu flumenas que mountavo à cha pau quouro davalave 

vers lou poun lumenous. De carrejadou n’i’avié pas tant qu’acò à nòu ouro de vèspre, 

soulamen quàuquis-un tèms en tèms que roulavon emé prudènci bord que vesien de 

liuen moun “varage” au mitan de sa rout; Aquelo caminado se passavo sènso faire proun 

d’erso, urousamen pèr iéu, lou marin devengu foulaire d’aigo, e me disiéu qu’aviéu agu 

de crespino de m’èstre empaluna ansin, proche d’un cafè. 

Dins la tempèsto que bramavo mai que mai, ai degu m’escarta un pau dóu bord de la 

routo qu’aviéu segui pèr me teni en de foro de la circulacioun dóu moumen qu’uno 

veituro arribè davans iéu, si fare dubert en plen à vous avugla, lou sauvage, emé forço 

gisclado…; vesès lou tablèu! E bèn, aqui sian poulit! Assagère d’evita uno bagnado 

suplementàri e pièi… e pièi… aie! de que m’arribo! mounte ai toumba? de que i’a aqui 

dessouto? me negue… me negue dins lou gaudre negre, acò’s pas poussible… e

d’insurta aquéu couioun que m’avié fa chanja de cap…e d’invouca encaro li 

“Cambrone” e…, fau bèn lou dire, li noum de Sant, que la tiero es tant longo, en 

souvenènço de moun grand, lou pacan, que lis emplegavo souvènti fes aquéli juroun de 

la terro… Ai-las! coumpreniéu qu’ère bèn planta dins un trau de cantounié que se 

troubavo d’asard, aqui, entre dos platano. Vous doune à pensa qu’aquéu moumen de 

panico me semblavo forço long tout en agitant li bras pèr tasta quaucarèn de dur dins la 

terro souto l’aigo, fin de m’assegura. Mi man touquèron enfin dos apiejo e, d’un cop de 

ren, m’estirassavo d’aquéu mini-garagai viscous que noun sai. 

Aquelo trempado en “primo” m’avié empautousa enjusqu’is espalo que soulamen ma 

tèsto restavo espargnado e poudiéu encaro m’espounga ‘mé ma touaio muiado qu’èro 

estado, urousamen, bèn estacado sus moun su e souleto à-n’èstre vierje de counchaduro. 

E moun vièsti…, moun paure vièsti, pecaire!…: vesto, braio, camiso, cravato, tricot, 

caussuro, etc…, tout aquest inventàri èro bon pèr la bugado vo… lou bourdiguié! 

D’aquel esfrai, poudès me crèire, me n’en souvendrai touto ma vido. 

Lou marrit moumen passa, aviéu qu’uno idèio: me leva d’aquelo aigo que 

degoulinavo de longo dins moun esquino, sus lou pitre e mi cueisso e ansin trachelave 

dins aquelo bourrascado de niue. 

Li darrié metre que me separavon dóu tubet me dounavon d’aeln pèr durbi sa porto 

en cridant em’autourita: «Lèu, lèu, siéu tout bagna qu’ai toumba dins un trau long de la 

routo e me jale! un grand cafè arrousa d’aigo ardènt qu’ai bèn besoun de me rescaufa; 

ma veituro es tancado au mitan de l’aigo à cènt pas d’aqui, vous dise que soun moutur es 

bagna e vòu plus rèn saupre; me fau telefouna i gendarmo lèu, lèu; ai de sòu, pode 

paga.!» 

Li dous cafetié qu’èron dins lou lougissoun me regardavon tranquile, estouna de 

moun bramadis, èli qu’anavon barra sa porto passa dès ouro, e qu’esperavon plus ges de 

pratico subretout em’un tèms parié, pièi me diguèron plan-plan: «Eh! moun bèu, fau pas 

vous agita ansin, un pau d’aigo a jamai tuia un ome, n’en veirés d’autre, sias jouine, 

nàutri avèn fa la guerro, la grando, aquelo de 14-18, me disié lou mai vièi e, dins li taié 

avian d’aigo fin qu’à l’embourigo de longo…, veirés s’un jour acò vous arribo!» 

Aquéli responso me dounèron encaro un pau mai lou couquin de… e pousquère pas 

m’empacha de ié dire, en tóuti dous, moun franc valentin. Fin finalo, me fauguè douna 

mai d’esplico sus la pano de ma veituro, entre dos goulado de soun cafè arrousa, d’aise, 

ço que me metié un pau de calour dins lou cors, que n’aviéu grand besoun. 

Aro, falié souna la gendarmarié dóu Muei. Aquéli bràvi servitour de la forço publico 

m’escoutavon emé forço paciènci en me dounant la reviscoulado que n’esperavo: «Vous 

faguès pas de marrit sang, vosto pano la couneissèn bèn cade cop que i’a de grosso 

plueio. Sias pas lou proumié e sarés pas lou darrié de vous tanca au mitan de la routo àn-aquel 

endré. Anas tourna-mai à vosto veituro e veirés que lou tèms a travaia pèr vous, 

car li bougìo an agu lou tèms de seca e voste moutour vai tourna rounfla, vous 

l’afourtisse que couneissen bèn l’auvàri.» 

Rassegura, ai acaba moun segound cafè, ai paga mi gènt e à Diéu sias. 

De foro, aviéu li dènt que jougavon la “Marcho fenèbro de Saint-Saëns”, de passa de 

la calour de l’oustau à la fre de la sournuro pèr m’entourna à ma veituro. Aqueste cop, 

marchave en plen mitan de la mountado e tirave dré davans, sènso cerca li bord

catiéu…, pèr jougne en touto segureta moun “barquiéu à petròli” en mau de 

boulegadisso. 

Dins ma veituro, fasiéu li tacheto dóu tèms qu’assajave de faire rounfla lou moutur. 

Enfin, après quàuqui cop de demarrour e, apiejant d’à founs la pedalo d’aceleratour, lou 

brave moutour tussiguè un cop, pièi dous e pièi…e pièi… a parti! ouf! sian sauva! 

Gramaci, Segnour, adiéu lau, adiéu chavano, adiéu garagai, adiéu cabaret… 

Pamens, me falié un pau espera pèr agué de caufage e pièi cercave dins ma valiso, 

sus l’assèti de darrié, ço que poudriéu trouba pèr me chanja aquéli vièsti proun bagna 

enjusqu’à la pèu. Ai-las! aviéu que moun linge sale de la semano e rèn de caud. Alor me 

siéu eissuga de moun miés e ai reluca, ‘mé forço deleitacioun, lou soulet vièsti que 

poudié me douna un pau de bèn-èstre dins moun desprouvesimen: Moun vèsti de niue 

que ié disen PYJAMA, qu’éu, èro se! 

Dins aquel acoutramen ouriginau, qu’es pas de dire, pèr un autoumoubiliste…, 

repreniéu moun viage de rintrado. Camin fasènt, despèriéu, me pensave: “Se de cop que 

i’a rescontre li poulicié de la routo dins la sourniero, de que van pensa de iéu? segur que 

vène de m’enfugi à la lèsto, valènt à dire “m’avouda à Nosto-Damo di cambo…”, de la 

chambro d’uno galanto mestresso que soun ome venié d’arriva sènso se faire crida! Mai 

noun, ai pas rescountra li gènt de la marescaucié que trevon pas li camin em’un tèms 

parié e, quouro an de missioun, amon bèn se pausa au caud asseta dins un cafetoun, acò 

‘s uman…! 

Siéu arriba jouious à moun oustau, que mi gènt s’esclafavon, estabousi de moun 

istòri, mai subretout dóu biais de moun vièsti! 

E la plueio? O! la plueio s’èro fin finalo arrestado quouro me siéu mes à canta en 

veituro, e pèr óublida tóutis aquélis auvàri, la fin de la cansoun de Charloun: 

«Plòu, plòu, ma douço amigo, plòu. Vène dins ma cabano, vai n’agues ges de pòu…” 

* 

Ive Rebufat

Francés Berengier 

Cacho-fiò 

“Amoussas” dis l’aujòu en prenènt dins si man, 

Au travès de la niue, li man de sis enfant… 

Alègre! Alègre! Li man se soun sarrado 

E la Pas de Diéu, dins l’oustau, es intrado. 

Tres poun d’or. L’amo di candeleto amoussado 

L’an passa pèr l’aujolo es vuei reviscoulado. 

Lou moucèu de busco que soubro de l’autre an, 

Tout negre, tout rima, es long d’un bon mié-pan. 

La mamet l’a serva coume li candeleto 

Que la tradicioun vòu que siegue de la fèsto. 

Es éu que dèu servi, meravihous flambèu, 

Pèr douna l’aviado au cacho-fiò nouvèu. 

D’un rampau d’óulivié trempa dins lou vin kiue, 

lou Rèire benesis lou “Soulèu de la Niue”, 

Pièi de sa voues founso emai encantarello 

Canto, pèr sis enfant, pouësìo tant bello: 

“Alègre! Alègre! E que Diéu nous alègre…” 

Alor, lou fiò tambèn nous cantara alègre, 

S’un cop lou cago-nis, ajuda dóu papet, 

Mando sus li tisoun un fais de verbouisset. 

Ah! Cacho-fiò nouvèu, mèstre de la vihado, 

Autar de tradicioun, de ta branco taiado 

Pourtaras aut l’ounour di bèus aubre fruchau 

E gardaras la fe dins li cor prouvençau. 

*

La Galinastro 

Souto li sause emai li verno, darrié l’oustau coulo uno Sorgo. Coulo plan-plan e fai 

soun obro, desempièi cinq cènts an que la cavèron nòsti rèire, alor que Castèu-Nòu 

n’avié besoun pèr trana soun terraire au printèms, arrousa si pradarié l’estiéu e, tout l’an, 

faire vira soun moulin. 

D’escoundoun, sus si bord, quand de cop ai bada lou pichot mounde que soun aigo 

fai viéure: li peis, lis aucèu, li serp, li gàrri e lou revenènt qu’ei lou vibre, aquéu 

rousigaire de rusco! 

Mai ço que m’agrado lou mai, ei de segur la galinastro, aquelo poulo d’aigo, que se 

dis lou bè-rouge, pèr la diferencia de sa cousino lou bè-jaune. 

Desempièi vint an qu’avèn basti long de la ribo, n’en vèse patuscla sus la tèpo o nada 

subre l’aigo. 

Mai, aquest an, n’en veguerian uno, belèu plus agradivo encaro. 

Galantouno e lisqueto, s’avançavo fieroto, en piéutant à pichot cop. Ero poulido que 

noun sai, emé sa raubo de ceremounié, facho de plumo griso e negro, lustrado coume un 

mirau e soun bè, rouge viéu coume lou fru dóu verbouisset en ivèr! 

L’iue aganchoun, toujour lèsto à cabussa au mendre brut, trafegavo, urouso, sènso 

soucit dóu lendeman. 

Au mes de mai, faguè soun nis, dedins li sagno e, tre semano plus tard, la veguerian 

sourti, fièro e countènto davans si tres pouletoun negre, en quau ensignavo la vido de la 

souvagino. 

E lou matin, dins la frescour, la fasiéu de longo amira à ma feleno meravihado. 

Setèmbre arrivè. Li pichot s’en anèron faire sa vido un pau plus liuen. 

Lou tèms passè. Outobre fuguè aqui. L’aigo mountè en carrejant li fueio que lou 

mistrau ié pourgissié. 

La casso èro duberto, elo noun lou sabié, e piéutavo toujour la galineto! 

Un sèr, à la couchado, lou cassaire arrivè e s’embusquè dins li canèu. 

La cisampo boufavo, e lou soulèu rouginas s’escoundié eilabas, darrié li ginesto de la 

garrigo. 

Un moumenet plus tard, la veguère que bequetavo uno poumo, arrestado sus l’aigo 

pèr uno branco morto. 

Lou cop de fusiéu, mau ajusta, l’ajougniguè sus lou coustat, i’esclapant uno pato e 

uno alo! 

Tressautanto, pietouso, e soun sang tacant l’aigo, lou courrènt l’empourtè. 

La niue èro vengudo, soumbrenco e frejo. Lou cassaire la perdiguè de visto, avié tira 

pèr rèn! 

Mai elo, angounisènto, countuniavo sa darriero escapado sus l’aigo. 

Fuguè arrestado plus bas, pèr li rousigado dóu vibre, calado à-n-un recouide. 

Un grisounas de gàrri à cop pelado la reniflè de liuen e, èro encaro en vido, qu’adeja 

la devourissié.

La luno blanco s’aubouravo, eilabas au levant, sus li mount deVaucluso, quand 

mouriguè. 

E, dins li niue blanquinouso, es lou plagnun de la machoto que ié dindè lou glas. 

La sorgo dins sa courso inmudablo, n’en pourtè lou dòu enjusqu’au Rose en 

Avignoun, en carrejant si plumo negro. 

L’endeman, au leva dóu soulèu, lou bluiet, pèr soun siblet, n’espandiguè la tristo 

nouvello dins l’encountrado, e lou rigau, enferouni, diguè à la bouscarlo entristesido: 

“Se lis ome èron d’ome, durbirien la casso i cassaire!” Mai elo, pensadisso, de ié 

respondre: “Acò vendra un jour, quand tóuti auran coumprés que i’a mai de plesi à nous 

regarda viéure qu’à nous tuia!” 

Piéutara plus la galineto! 

Lou cassaire es vengu… 

Pèire Courbet 

de Castèu-Nòu de Gadagno 

* 

Lou Crevèu 

Masco, sus ti cisèu 

Fai vira lou crevèu, 

Vole saupre lou laire 

Qu’a pres moun aneloun. 

Noste ràfi Andreloun 

Me l’a ‘dus de Bèu-Caire. 

Masco, dins lou tinèu 

Enfounso lou cruvèu, 

Vole vèire la caro 

Dóu gus que me l’a pres. 

Iéu doute res encaro… 

Pamens sus lou cruvèu 

- An! mostro-me lou lèu! - 

M’estounarié pas gaire 

D’ié vèire lou mendi 

Que, me l’an agu di, 

Vau mau à moun fringaire.

Carle Galtier 

Masco, sus toun crevèu, 

Siéu seguro es Miquèu, 

Mou mendi, qu’anan vèire. 

Es jalous d’Andreloun 

Pèr aquel aneloun, 

Moun aneloun de vèire. 

Masco, sus toun crevèu, 

Pòu èstre que Miquéu. 

Lou sènte dins moun amo… 

Crentous, noste mendi 

Encaro m’a rèn di 

Mai coumprene que m’amo. 

Masco, sort toun crevèu, 

Fai-me vèire Miquèu 

Qu’ansin sarai seguro 

S’es de bon que me vòu. 

Andreloun?… vòu mi sòu! 

L’autre a meiour figuro. 

Masco, sort toun crevèu, 

De l’aigo sort lou lèu. 

- Coume moun cor tabasso!- 

Quau èi que se retrais, 

Fai vèire, sus toun drai? 

Ai!… n’es rèn qu’uno agasso… 

*

Court d’amour 

Vaqui lou tèste de l’emissioun que faguerian, au Posto de Marsiho-Prouvènço, emé 

lou regreta Jóusè Olivier, qu’èro lou famihié de nòsti troubadour. 

J.Olivier - Li Court d’Amour soun tant estado contro-dicho que, fin-finalo, an leissa 

‘no doutanço. 

Dono Jouveau - Es mai qu’uno negacioun. 

O. - E lou pople, mai pouèto que lou sabènt, resto dins lou raive counsènt de la 

desiranço, souvènti fes bèn proche de la realita. Iéu pèr lou proumié, me fai gau de crèire 

que li Court d’Amour an eisista. Acò nous chanjo un pau di “Court” qu’empuravon li 

garrouio e li batèsto; nous n’an proun gounfla à l’escolo! 

J. - Nous fai gau de saupre que i’a agu de Court ounte, liogo de parla de guerro, se 

parlavo d’amour. 

O. - Se cantavo l’amour! E bèn, fuguès n’en segur: li Court d’Amour an bèn fa flòri 

en terro miejournalo; vous n’en vau douna de provo. Mai ço que nous engano es que 

vuei, entenden pèr “Court” de tribunau ounte de juge grave, en bouneto e en luneto, e 

lou su pela, prounouncion de jujamen e baion de punicioun. 

Li Court d’Amour èron de jurado de femo -de Damo- que, mai arbitre que juge, 

disien soun vejaire sus de questioun d’amour, de tournès poueti sus de cas amourous, 

que s’espremissien en cansoun. Jujavon d’idèio, de jo e de talènt. E pas de fauto. 

E liogo de prounouncia de punicioun, se dounavo de joio. Un pau coume vuei li 

councours de cant ounte uno jurado douno de pres. 

La coumparesoun es bèn paloto se fasèn cas de la qualita de nòsti cansoun à respèt di 

partimen e di tensoun, ounte li parteneire boulegavon la metafisico amourouso, e 

coumpousavon éli-meme li paraulo e la musico. E, de fes que i’a, improuvisavon. Verai 

que la lengo -èro lou prouvençau- la cadènci di mot, lou ritme de la fraso e sa cantadisso 

ajudavon forço. 

Fau pas óublida nimai qu’à l’age mejan lou mot “Court” voulié dire, lou mai 

souvènt, fèsto e divertissènço. 

J. - Mai alor, n’èro pas uno literaturo bèn…seriouso? 

O. - Quau vous a di qu’uno literaturo es sèmpre seriouso? Fau de tout pèr faire un 

mounde. E nòstis àvi li troubadour, e li bèlli Damo di court, tant i’arrivavo de se vougué 

un pau diverti. Tenès, legissès, dins aquest libre saberu, quauco questioun qu’èron 

prepausado i Cour d’Amour: 

J. - L’amant e l’amanto an-ti l’un sus l’autre de dre egau? 

- L’amour baio-ti mai de joio vo mai de soufranço? 

- De qu’es acò qu’adoulentis lou mai: la mort de la femo amado vo soun 

infedelita? 

- Uno femo que se refuso à soun amant e l’empacho de courre après un’autro, 

agis-ti pèr amour vo pèr ahiranço? 

- Un chivalié qu’a long-tèms soulicita uno Damo, sènso reüssi, se viro de-vers uno

autro que i’acordo un rendès-vous; mai la proumiero -que l’a sachu- ié douno un rendèsvous 

à la memo ouro. Ounte dèu ana? 

- Uno Damo assetado entre tres calignaire mando uno guinchado amourouso au 

proumié, sarro tendramen la man dóu segound, e, à l’autre, i’esquicho un pau lou pèd. 

Quau es lou prefera? 

O. - E nous rèsto de camelo de proublèmo vo questioun d’amour, mai serious, vo mai 

leste, vo meme un pau trop amourous. Acò n’es pas discuti amor que li papié parlon: 

paraulo e musico soun counservado dins li biblioutèco naciounalo de Franço e meme de 

l’estrangié. Li countestacioun di sabènt repauson sus de questioun istourico, pèr 

eisèmple l’epoco e li liò ounte se tenien li Court d’Amour, ounte se debanavon li tournès 

amourous. 

N’i’a que dison que li Court d’Amour se sarien fourmado quasimen à la fin di 

Troubadour; dison que li Court d’Amour de Signo, Pèiro-Fiò e dóu castelas de 

Roumanin, proche Sant-Roumié, èro de fablo. Garrouio de sabentiso. 

J. - De que nous fai, à nous autre, au founs, proun que sachen que se soun tengudo en 

quauque part. 

O. - N’i’aguè bèn à l’oumbrino di bousquet. Se de riche e celèbre troubadour 

trevavon li castelas di grand segnour, quau vous a pas di que li troubadour paure vo 

sènso renoum tenien pas d’acampado au mitan dóu pople, vo encò di bourgès vo di 

marchand…qu’èron souvènt mai dru que li baroun, e que proutejavon li pouèto. 

J. - Oubliden souvènti fes que Prouvènço èro artisto dins lou sang, qu’èro libro e 

independènto; que la femo prouvençalo avié dre de courtesié, alor que dins lou Nord li 

femo èron encaro vassalo, e, davans soun segnour e mèstre breguignavo pas, becavo pas. 

O. - Dins nòsti countrado lou chivalié, fuguèsse Prince vo Rèi, saludavo la pastresso; 

es belèu ço que faguè dire à-n-uno grando Damo “Au païs de la courtesié, i’a ges de 

ierarchìo”. Pièi acò changè. 

J. - La femo prouvençalo s’amoulounè mai au cantoun dóu fiò, pecaïre! 

O. - Beh! dise pas!… Acò nous venguè belèu d’amoundaut, coume forço modo. O, 

pièi, a tant de vice la Prouvençalo, que tant amavo mai… poudié faire sauceto dins 

l’oulo… Mai vuei acò a mai chanja! la femo… 

J. - Basto, aqui n’es pas la questioun. 

O. - Vo, parlen pas de ço que facho… 

J. - Amor que parlen d’un tèms que nous sèmblo un tèms de fado, leissaren i sabènt li 

doute, pèr n’en veni i noum di damo que fuguèron jurado di Court d’Amour en 

Prouvènço. Se l’istòri es un pau espiado, ié perdra gaire, e l’ilusioun -que fai tant de 

bèn- ié gagnara. Veici de noum que sèmblon veni d’un bèu conte, e que nous venon de 

Jan de Nostrodamo, lou fraire de l’astroulogue sant Roumieren. 

O. - Avisas-vous, Dono Jouveau, Jan de Nostrodamo es regarda coume un blagaire; 

es éu que diguè que la Court d’Amour de Roumanin èro soubeirano, e n’i’a que dison 

que i’aguè ges de Court d’Amour à Roumanin; Jan pòu agué enventa acò… coume lou 

castelas, belèu… 

J. - Mai pamens rèsto encaro li rouino. 

O. - Lou sabe, lou sabe, mai em’aquéli couquin de Sant Roumieren se fau avisa: 

Quau saup s’an pas basti de rouino pèr faire encrèire qu’avien un castèu?

J. - Ié fai rèn. Verai que pas verai, li noum soun tant galantoun que fau que se sachon: 

Jano, Damo di Baus, 

Mabiho de Vilonovo, 

Isouardo de Rocofueiho, 

Blancho de Flassans, qu’apelavon Blancoflour, 

Doulço de Moustié, 

Toineto de Cadenet, Damo de Lambès, 

Madaleno de Seloun, 

Briando d’Agout, coumtesso de la Luno, 

O. - Vesès, vous lou disiéu: segur es de galejado; es l’astroulogue qu’aura engana 

soun fraire. 

J. - Eh! de que ié fai. 

Riéussendo de Puyvard, Damo de Trans, 

Bertrano, Damo d’Ourgoun, 

Bertrano de Signo, 

Adalario, Vicoumtesso d’Avignoun, 

La Coumtesso de Dìo, que fuguè la mai celebro di Troubaïris dóu siècle dougen, e 

Estefaneto, Damo di Baus… 

O. - Faneto di Baus, aquéli Baus que fan tant parla d’éli, terro de Guihaume di Baus, 

prince d’Aurenjo, de Barrau di Baus, que tenguè tant pèr Prouvènço quouro lou Rèi de 

Franço la voulié mestreja. Aqui, segur, n’i’aguè de Court d’Amour; Barrau e Guihaume 

èron troubadour e aparaire di troubadour; Li Baus èron la principauta de la pouësìo e de 

la musico qu’èron proudigado liberalamen e à gràtis sus lou Plan de Castèu. Si nouvèu 

prince nous jogon pas la memo musico, emai sachon canta-z-aut! Pàuri Baus! Quau t’a 

vist que te vèi! 

J. - Acò nous lagno un pau, nàutri de Prouvènço qu’avèn jamai couneigu la tiranìo 

emé nòsti segnour dis Aupiho. 

O. - Eto, èron mai pouèto qu’ome d’afaire, vo counquistaire. 

J. - Defendiguèron Marsiho, se n’en cresen lou troubadour Paulet de Marsiho, qu’à la 

mort de Barrau di Baus faguè uno coumplancho pèr espremi la doulour di Marsihés, que 

n’en avien fa soun Vicomte. 

O. - Amor que sian dins la lagno… e que lou quart d’ouro passo, déurian acaba su’n 

plagnun. 

J. - La coumplacho èro pèr li mort. Mai i’a d’àutri plagnun que cantavon de causo 

que moron pas e que trevaran toujour li gènt, tant que n’i’aura. 

Veici lou plagnun que faguè la Coumtesso de Dìo quouro fuguè leissado pèr soun 

bèu troubadour Rimbaut d’Aurenjo. 

O. - E veirés la franqueta de nòsti rèire: se metien ni pebre ni sau dins la paraulo, 

avien quand meme la finesso dóu sentimen. Franqueta pougnènto d’uno grando 

amourouso que couneiguè de l’amour tóuti lis aubencho e tóuti lis auvàri. Dins la

meloudìo, uno di bello dóu siècle dougen, la Troubaïris a sachu, dins un art simple mai 

fin e esmouvènt, adouba sa tristour d’amanto vouluptuouso ‘mé sa fierta de femo 

trahido. 

Dono Jouveau vai canta aquéu cant doulènt en lengo prouvençalo dóu siècle dougen 

que segur sousprendra. N’en veici la traducioun en lengo mouderno: 

Grand peno m’es vengudo de l’amour d’un chivalié qu’ai agu. 

Vole que dins tóuti li tèms se sache l’eicès d’amour que i’ai pourtado 

J. - E aro me veici deleissado - Dis que i’ai pas proun douna d’amour - Pamens, 

quinti fuguèron pas mis estraviaduro, au lié coume abihado - Coume lou voudriéu teni 

dins mi bras nus - Sarié coumbla pèr pau que de moun sen ié faguèsse un couissin - 

Aquéu que m’a presso pèr amigo m’a fa tant de peno - L’ame mai que tout sus terro - E 

pode coumta ni sus la pieta 

O. - Ni sus la courtesié 

J.- Ni sus ma bèuta, ni sus moun merite, ni sus moun esperit - Siéu pas mens 

troumpado e trahido que s’aviéu ges de chalun - Vous ame, moun ami, e siéu urouso - ô 

moun car ami -… de vous surpassa en amour. 

CANT … que finira en moulant coume un sounge que s’escafo plan plan. 

* 

Après lou revihet 

Dins la douço tourpour que seguis lis agapo, au retour d’uno messo de miejo-niue, 

quouro que l’auraio se tirasso encaro sus la taulo e que dins lou silènci tout sèmblo 

dourmihous, dóu tèms que lou cacho-fiò finis de se counsumi souto lou recaliéu, un 

pichot santoun se boulego sènso brut. 

Sabe pas s’es lou Conse, lou bóumian o lou pastre. Lou fiò s’es amoussa, se ié vèi 

plus rèn, mai dins la niue founsudo noste pichot santoun, plan-planet s’en vai de la 

crecho. Travessant lou grand bos, lou camin, la ribiero, dóu coustat dóu regòli sèmblo 

voulé d’ana… Es acò, lou veici arriba au bout de soun viage. 

- Moun Diéu, que de lipetarié! Que tout acò sènte bon! Qu’acò’s plen de gràci! 

D’ùstri, de marlusse, d’àpi, de froumage! Quente meravihous decor, quente bèu regalun! 

Es de moun devé de ié faire óumage e sènso m’endourmi, quaucun pòu arriba… Tasta 

d’aqui, tasta d’eilà, tasta un pau de tout, belèu sarié pas mau. Assajen, veiren bèn,

vesiten la countrado. De qu’avise, aqui? De nougat, de vin vièi, de fru, e eilà d’aigo 

d’agreno?… 

Noste pichot santoun toco en tóuti li plat, pièi, tout jouious, chausis pèr dessèr la plus 

poulido amelo. 

Mai tout a uno fin e lou reloge que dindo, sus soun timbre ascla anouncio la primo 

aubo. Tout urous, lou viéure èro tant bon, vaqui noste santoun lèst à revira camin, un cop 

avé clafi sa biasso de mànti lipetarié. 

Quouro l’aubo es levado, a retrouva sa plaço. Tout es intra dins lou gouvèr… Belèu 

qu’aurai pantaia… 

Francés Berengier 

Teresino (Zino) e Zidore, un vesin 

* 

La poulaio empaquetado 

Teresino. Itè, chin ! Mai de qu’èi aquèu chin ? A trapeja moun juvert, patuscla dins 

l’aigo di canard, e aro espavènto mi galino. Itè ! Vas vèire se t’esclape moun escoubo sus 

l’esquino ! Itè ! chin d’ibrougno ! 

Zidore. Zino ! lou piques pas ! Es miéu. Es un cadèu que m’a douna lou mège, lou 

mai bèu de sa chino. Es un “épagneul breton”. Pèr la casso, i’a pas mies. 

Zino. Un “espagnóu bretoun”! Aro m’estouno pas. Lis estrangié an tóuti li dre. Mai 

sono lou que mi galino van perdre sis atifaio. 

Zidore. Soun de galino, aquéli paquetoun de pato, de touto coulour ? Quento merço 

de poulastre es aqui ? Quéntis ióu as douna à couva à ti clusso ? Soun-ti de bestiàri 

d’Africo que crègnon la fre, que lis avès acata coume Sant Jòrgi ! 

Zino. Moun paure Zidore ! Soun de bèlli galino - talo que li veses… Mai aganto toun 

chin, e tèn lou sarra. S’aviéu pas crento que te trufèsses de iéu, te countariéu l’afaire. 

Mai… s’anaves embrudi acò, me pourtariés tort… A l’abitudo, lis escounde, que res li 

vègue. 

Zidore. Agues pas pòu ! Avèn fa lou service ensèn, emé toun Gustet, e se sian jura 

lou secrèt pèr… 

Zino (que lou coupe). N’avès degu faire de sóutiso que res n’en pòu rèn saupre, 

meme iéu… 

Zidore. Alor ! veses. Pos me faire fisanço. Zòu ! desnouso lou bout. 

Zino. Bon, crèse que l’anaras pas crida sus li téule, qu’es tout de la fauro de Gustet. 

Zidore. Es Gustet que t’a empaqueta ti galino emé de roupiho ? 

Zino. Noun ! Mai lou couneisses. Es un chucho moust, un escoulo-bureto… Liparié 

li gavèu pèr n’en tira lou jus. Pode ges me soubra d’aigo-ardènt dins l’oustau;

qu’amariéu semoundre la gouto, quouro vèn quaucun. Mounte qu’escounde li fiolo, lis a 

lèu destouscado… e secado. 

Zidore. Mai vese pas perqué Gustet es l’encauso que vosto poulaio siegue malauto. 

Ié fai de tort de parla ansin. Ah ! li femo 8 

Zino. Se m’aviés pas ocupa, te l’auriéu di. Vaqui: aquest an, pèr vendùmi, aviéu mes 

dins l’aigo-ardènt (que n’aviéu escoundu uno boutiho darrié mi linçòu, un plen panié de 

muscat de Roumo. Avien d’age coume de nose… Mountère moun boucau dins lou 

granié, pièi lou boutère souto lis escalié, darrié li douire d’òli. 

Mai sabe pas se Gustet, aquel embriaga d’ome, es pèr senti la bevendo, coume li 

trueio (emé lou respèt que te dève), senton li rabasso, mai me pènse qu’un bèu jour anè 

teta quauco goulado dóu jus. E d’aqui en là, de goulado en degout, a tout chourla, e s’es 

ansin bagnouleja la gargamello à lesi. 

Zidore. Mai lou poudiés pas teni d’à-ment… 

Zino. Ero l’estiéu. Avian tant d’obro… 

Mai quouro vouguère faire tasta mi rasin à l’aigo-ardènt, en de cousin, trouvère 

moun boucau tout plen d’uno meno de mousso negrasso, mis age tout móusi, plen de 

barbo. 

Manquère agué un cop de sang, e n’en plourère. Agoutère lou boucau e, pataflòu, 

bandiguère lou countengu sus lou fumié. 

Zidore. Auriès pouscu li neteja, que l’alcool counservo. 

Zino. Que lou bon Diéu t’entende que s’es ansin Gustet viéura vièi… Que te digue 

encaro. Au vèspre, quouro vène pèr sarra li galino, de que vèse ? Quinge! estendudo pèr 

sòu, emé dos dindo, l’arpo virado, rede morto… Li cambo me manquèron e me braquère 

à ploura coum’uno Madaleno. Me fasien un iòu tóuti li jour, meme li dindo… Tout en un 

cop, pensère que l’endeman èro marcat à Carpentras, e que li pourriéu chabi. 

Zidore. Auriés vendu de bestiàri empouisouna ? Te siés dicho que, vague que vague, 

e l’ase fiche, se n’en tires pas quàuqui sòu. Te couneissiéu pas ansin, tant sarrado de toun 

argènt. 

Zino. Me digues pas de causo ansin. Sian pas riche… Basto, agantère mi galino e mi 

dindo, e me boutère à la lèsto à li pluma, e de faire voulastreja de plumo dins tout 

l’estable, qu’après, aguère de peno à lis escouba. 

Pèr li garda au fres, li meteguère, tèsto pouncho, sus uno pichoto canisso dins la 

croto. 

Zidore. Mounte n’en vos veni… Vòu m’en ana que moun cadèu tiro sus la cordo que 

se vai estrangla. 

M’esplicaras aquéli patouias que piéuton ? 

Zino. Espèro… L’endeman, me levère d’ouro pèr ana au marcat. Davale à la croto… 

O gràndi Santo ! Quente treviramen ! Tre durbi, touto ma poulaio me sauto dessus, emé 

de cacarasco, de glou glou, s’escapon, quau d’eici, quau d’eila, nuso coume de verme, 

courrèn devers l’abèuradou. 

Zidore. Ah! Ah! Eron pas morto ? Eron empegado! Ah! Ah! Urousamen que Gustet 

tèn la ganarro. Se i’èro arriba, belèu l’auriés entarra ! Ah! Ah! 

Zino. As coumprès! E, coume erian encaro au tèms di fresquiero, li pàuri bèsti 

tremoulavon e te ps crèire que fasien “la chair de poul”, coume dison li franchimand.

Vouliéu pas que s’enraumasson e que calèsson de faire l’iòu. 

Zidore. Ansin, lis as vestido ? Coum’ as fa? 

Zino. Ai courdura d’abihage, emé de vièi coutihoun miéu, de braio routo de moun 

ibrougnasso d’ome, de courset, e de debas trouca, di pichot. 

Aro, soun bèn au caud dins soun amagage, manjon bèn, cascaion coume se rèn n’èro, 

e fan soun iòu tóuti li jour. 

Bèn lèu si plumo auran mai creissu, e meme se rèston nuso, emé l’estiéu riscaran pas 

de s’aganta mau. 

Mau Zidore lou diras pas, que ? 

Zidore. Auriéu pas degu te lou proumetre, mai crèse pamens que, pèr la vihado de 

Eèst Jour pèr Prouvènço, countaren ensèn aquelo ufanouro istòri à nòstis ami. 

Zino e Zidore. Es ço qu’avèn fa. 

(A prepaus d’un raconte publica dins l’Armana Prouvençau signa Ta l e r a s s o 

(Dóutour Tallet de L’Ilo), dialogo adouba e aumenta pèr lou Majourau Carle Roure, pèr 

la vihado dóu 19 de mars de 1991). 

* 

Uno esclapo d’ome 

Asseta sus la muraieto de soun bastidoun, l’ome pantaio vo pulèu devisto l’ourizoun 

eilamount ount lou mourre encapouchouna di pinatèu rescontro la capo dóu soulèu, 

esbléugissènto de belugo d’or que tremolon dins la calour setembrino. 

Se pauso uno vóuteto, lou tèms que lou chivau reprengue alen à l’oumbriho 

soustarello. Si man, pariero en de bacèu nouselu, aflaton li pèiro seco dóu bancau, 

cercant bessai, sènso se n’avisa, quauque cacalaus entrauca dintre si fendiho que lou gèu 

alarguè. 

Vuei, l’ome es urous. Li vesin i’an presta soun chivau, lou darrié de l’encountrado, 

pauro bèsti que l’an jamai vougudo mena à l’escarrissage, Diéu garde, e que acabara sa 

vido plan-planeto encò de soun mèstre recouneissènt. O, a pouscu sóuca dre la longo 

faisso dóu campas. Pèr la glòri. Pèr la souvenènço di coutrejat tant bèu qu’enlusiguèron 

sa vido de païsan de la bono. Deman reprendra lou tratour… Deman. 

Sis uei de sourso claro que faguèron dansa li fiho, veson dins soun dintre sa 

jouineeso fouligaudo e pamens ounèsto, qu’à l’oustau èron uno garenado de goujard e 

deguè, d’ouro, manja’n afana e ajuda la famiho. Segur soun prefa siguè pas toujour 

d’aigo-nafro, mai à soun epoco degun reguignavo. Lou faguèsse, soun paire i’aurié 

desvira la tèsto. Tout au contro, lou fiéu mage tenié à l’ounour de regi lou mentoun di 

plus jouine. 

Pièi s’amouierè: la bello fihasso, gaiardo, lou boutèu bèn fa, poussarudo, la caro 

enflourado emé d’uei carogno à faire vira bandinello au plus fin. Avien pa’n pièd, mai

d’amour uno garbelado. Aro, l’ome se ramento lou tèms que se parlèron, que se 

calignèron à travès di carrairo flourido de flot de lano ensahinado vo proche l’eissour 

que s’amourravon à soun neissoun. 

Si gènt ié faguèron soun nouviage d’un bastidoun. N’èro, à l’epoco, qu’uno marrido 

cabano apouncheirado à la restanco d’óulivié, pamens soun Paradis sus terro. Lou fiò 

bas que tubavo li jour de levantas, l’èstro, la souleto fenèstro que viravo à la colo 

cantadisso d’auceliho, enclauguèron soun bonur. Uno bello chatouneto venguè ensouleia 

soun fougau, gaio coume la calandro au trelus, galantouno que noun sai emé si trenello 

usclado d’or e soun risoulet couquin. Uno cabreto assedado d’amour e de vènt fòu! 

Pièi soun astrado virè de caire. Lou marrit mau embalè sa femo dins qu’un boufe e 

l’ome deguè faire taïto emé la vido. Pico soulèu, avanço reloge, s’es abitua teni targo au 

mal-astre, siguèsse que pèr coumplaire sa bello pichoto que meno lou trin coume uno 

grando… E la chato se maridè e anè fournia à Pamparigousto. 

L’ome cargo lou grand faudihas de sa pauro femo que sa pacho ventriero es sèmpre 

coumoulo de brout de ferigoulo e de sàuvi. Eu, s’envai faire d’erbo pèr li couniéu e tant 

rabaio d’ensalado fèro que rescound à la lesto dins lou faudiéu pendu darrié la porto. 

L’endeman, pecaïre, es passido coume l’amo de Judas, pamens la ventoulo e la mastego, 

urous, que a lou goust sacro-sant de soun bèu tèms de maridage. 

Ço que lou carcagno lou mai es de faire li croumpo. La mouié, elo, anavo d’à pèd au 

vilajoun e revenié au bastidoun embastado coume un ai. Acò siguè toustèms la toco di 

femo. 

Lou creirés bessai pas! Aquel ome qu’es jamai entrepacha pèr adouba sis óutis, que 

gaubejo la terro emé la mecanico à la mouderno, saup pas mena uno veituro. Si cambo 

l’an toujour carreja. Mai, à l’ouro d’aro, manjo dins si quatre-vint sièis an. Emai, li 

boutigo dóu vilage an barra sa porto à cha uno, raport i grand negòci manjo-crestian que 

devourisson li pichounet. Pièi, se soun aplanta tànti liuen dins lou relarg! 

Li vesin soun bèn brave e ié fan de bòni maniero. Mai éu es acoustuma se n’en tira 

soulet. Alor, quouro lou refrejadou bramo pitanço, encambo soun tratour e s’envèn à la 

viloto vesino emé lou pichot toumbarèu atenènt soun engen, cafi de biasso, de coufin e 

de banasto. Parlas d’ùnis ensàrri! Pas uno ouro après soun pleno coum’un iòu. L’ome 

crebara pas de fam, a de recàti pèr teni lou cop tres mes de reloge. 

A la debuto, li gènt se trufèron d’éu, l’èr mousquet. L’anamen fièr e digne dóu bon 

prouvençau amoussè li barjacaire. Tout au contro, aro ié fan signe de la man quouro lou 

veson quiha sus sa sautarello roujo. Sabon qu’aquest biais tout siéu de se despegouli dis 

empacho es l’ounour d’un ome que fai avans, desplegant la grand velo à la ventoulado 

de noste tèms… 

Hou, sarié mestié que recampèsse lou chivau à l’estable. En passant caranchouno lou 

tratour à l’espèro souto l’envans. Deman l’adurra au marcat: soun amo rangoulejara e 

bressara si souveni tout de long dóu grand camin. 

Jano Blacas de la Pampeto 

Tros de la vido vidanto de Mèste Edouard Olive, mèstre d’obro dóu Felibrige, 

Cabiscòu de l’Escolo de la Sourso de Camps la Sourso.

A Jóusè Olivier 

Au bèu païs de Roumaniho 

Ausiren plus toun tambourin 

Aro que darrié lis Aupiho, 

Di rei as rescountra lou trin. 

Mai un resson que rèn degaio 

Camino i raro de l’estiéu 

Pèr nous manteni sus la Draio 

Dins la lus qu’es l’oumbro de Diéu. 

Pèire Millet 

Dedicau au me caru amigu Emile Gaziello, cun a me’ amiraçiun e a me’ afeçiun. A 

se revede! 

E Noço de Caná 

Tempu fá, tantu, tantu tempu fá, ün Galilea, che aura se ciama Terre Santa, Maria, a 

máire de Gesü, che aura é a Santa Madona, üna bela matin ghe dije a so fiyu: “Fiyu, fate 

a barba cuma se deve, vá a te lavá ben ben ünt’a rayana, pœi se meterëmu ün camin per 

andá a Caná da i nostri cujin primi che fan ë noçe d’u so fiyu u ciü grande”. Gesü ghe 

responde: “Me fussa stau ciü caru d’andá a dí due parole ai Scribi, o tamben, perche 

nun, d’andá a frust´i marcante d’u Tempiu, sci’ u camin me fussu arrestau ün mumentu 

da u panaté per resciuscitá a so’ muyé, bunarima, che é morta ieri sera; achëlu meschin 

nun sá ciü unde mëte ë man üntra a casa, cun i qatru fiyœi, u furnu, e per deciü, i clienti 

che gh’an tanta fame. Ma, per te fá cuntenta, vegneró cun tü a Caná”. 

E, sença astetá ch’u suriyu sice tropu autu se ne sun üncaminai tüt’ i dui, Gesü e 

Maria, ürusi de iesse ünseme suta u mágnificu celi blü. D’ün tantu ün tantu, i aujeloti, 

cin d’alegria, i seghëvun ün scivurandu, ün scivurandu… Era propi üna bela giurná. 

Arriva a Caná, an salütau i parenti che devëvun salüta, an baijau achëli che devëvun 

baijá. An truvau i spusi belissimi, i áire e ë máire cuntentíssimi, a ceremuniadevutissima, 

cina d’uresun, de canti e de parfümi. 

Pœi, tüti se sun avijinai â sala prepará per u banqëtu, e u pastu é stau serviu. Tütu 

d’ün cou, au mesu d’a bandoria, Maria, mucia, mucia, gh’ á ditu a Gesü: “Nun an ciü de 

vin”.

U páire d’u spusu era russu d’a verghœgna, a sócera, ünviperita, storzeva u nasu, a 

servitú, nun savendu cosa fá, girava tüt’ ë ánfure cun a sperança che ghe ne fussa stau 

üncura üna cina, ma… ren, ren de ren… a secagna! 

Gesü a ditu â so Mamá: “U sai prun ben che nun é a me ura”. Maria a regardau u so 

fiyu cun teneressa e a ditu ai servitú: “Stélu ben a scutá, e fé ben tütu çe che ve dirá”. 

Alura Gesü gh’á ditu de ience i ánfure d’áiga e de serve…Achëli meschin an ubediu cun 

a schina bassa, ün se dijendu che da süguru andavun a iesse bastunai per fá büve d’aiga â 

cumpania, püra se era áiga d’a Terra Santa. Ma, u padrun de casa gh’á sulamënte ditu: 

“Perché aví tegnüu u ciü bon vin per a fin, savi ben che fó fá giüstu u contrari, se serve 

primu u bon, pœi, candu i óspiti sun ün pocu ciuchi se ne prufita per serve u menu bon”. 

E, Gesü e Maria se ne sun returnai ün casa, cian cianin, felici e cuntenti. 

Múnegu, u 13 d’a Madalena de l’anu de Diu 1994. 

Paulette CHERICI-PORELLO 

* 

Aquesto nouvello de Cristiano Vivier pareiguè en francés dins “La Croix”, lou dilun 28 

de setèmbre de 1981. Ancian proufessour de letro, Dono Vivier èro devengudo avuglo 

quouro escriguè aqueste tèste. 

D’iue de lins 

- Alvar, Alvar... Escouto aquesto nouvello! Ai croumpa lou journau pèr te la legi, 

crido Caliano, l’alen coupa. 

A degu mounta lis escalié quatre à quatre. Alvar devino que si gauto soun rousenco 

de l’esmougudo e que si mècho bruno boulegon encaro sus sis esquino. Tourno devers la 

voues, sis iue anequeli. 

- Pense qu’es uno bono nouvello, diguè. 

- Justamen, escouto un pau. 

E Caliano legis: 

« Uno chourmo de cercaire d’Americo es arribado, après mai de vint an d’estùdi, à 

enserta sus un avugle, lis iue d’un lins.» 

- Alor, de que n’en penses? 

- Es en Americo, venguè Alvar pèr neutralisa lou bate-cor que se descadeno en 

dedins d’éu.

- Mai rèn trepasso mai lèu lis oucean que la sciènci... Deman l’ensert dis iue se fara 

en Franço. Vas vèire... 

Tóuti dous prenon counsciènci en meme tèms dóu jo de mot invoulountàri. Caliano 

evito de risouleja pèr pas lou pertouca. Alvar repren: 

- Veirai.. d’un biais pantaiaire. 

L’article precisavo que l’óuperacioun, facho un mes avans, avié reüssi e que l’ome 

avié retrouba la visto. Ero di, dins un apoundoun, en debas de la pajo, que lis iue enserta 

fuguèron pres sus uno bèsti sano e vivènto. 

Caliano èro muto. Alvar sèn un embarras dins lou silènci: 

- Un enuei? ié dis. 

- Enuei? éu, ié vèn après uno esitacioun, es que li loubo-cerviero soun pas dins li 

carriero. 

- As resoun, soun de bèsti belèu fèro, noun? Uno meno de cat, crese. 

- De-segur, preciso Alvar, urousamen pèr éli! 

Risoulejo d’un biais doutous, que legis pas la galejado sus la caro de soun ami. 

Despièi que sis iue soun plen d’oumbro, Alvar refuso lis alusioun coumico dóu 

mounde. A óublida vo a pancaro descubert que soun pas tóuti dins lou jo di mouvadisso 

e di coulour. Oubliga despièi pau de tèms à viéure dintre lis oumbro, saup pancaro 

esplecha en plen soun nas, sis auriho, sa pèu, si souveni... Pèr aro ié servon à avaloura 

tout ço qu’a perdu. La caro d’Alvar es grisasso, e Caliano dins soun cors, se lagno de 

pieta. 

- S’anavian en Americo? elo, ié crido, emé la voues de l’estrambord. Vendrai emé 

tu... Te racountarai tout enjusqu’au moumen qu’auras ti nouvèus iue... 

Aganto la man de soun amigo, la quicho gentamen: 

- Perqué noun! 

Mai Alvar devino que si pensado courron sus d’àutri camin. 

Au verai, despièi que vèi plus rèn dóu mounde, Alvar qu’es pas un ome à se bagna 

de farfantello, s’es bèn garda d’espera qu’uno descuberto, uno envencioun, arribarié tout 

bèu just pèr lou sauva. Pamens, quouro ausiguè la nouvello legido pèr Caliano, i’aguè 

coume uno revihado de la vido en éu. 

Tout s’es atuba subran en dedins perdequé dins quàuqui séuvo luenchenco, uno bèsti 

dóu noum e dis iue estrange, èro vouda à soun salut, à-n-éu, Alvar. 

Parti is Americo... deman... aro, tout d’un tèms? Perqué noun? Mai Alvar avié pas 

lou cor. L’oumbro tourno-mai en dedins, doublant la nèblo luminouso que nego si 

prunello. De quete dre estigarié-ti à la vido d’un animau pèr retrouba la siéuno? En vertu 

de queto priourita, lou coundanarié-ti à la vaguesoun avuglo dintre li trabuquet d’uno 

naturo despietadouso vo mai, de-segur, encaro à uno mort baiado pèr la pieta de si 

mutilaire? 

Alvar perpenso à tóutis aquélis esperiènci facho au pres dóu suplice e de la mort 

d’animau, pèr miés gari l’ome de si malautié e de sis infirmita. Se lou penso tant fort de 

que devèn aquest cat que soun cuer nus es pica d’eleitrodo, aqueste chin qu’a li cordo 

voucalo trancado e crido sènso brut dins un laboratòri de chaucho-vièio, vo aquelo rato

desequilibrado pèr la vengudo dóu marrit mau artificiau. Li sènt, tóuti, agounisa souto sa 

pèu, aquéli pichot fraire di péu dous, dis iue crentiéu vo tèndre. E meme à la granouio 

frejo, de la bouco leidasso que batejo, escarteirado. 

- Quet ourguei qu’es lou nostre! penso Alvar, que decido sènso meme l’arresouna, la 

preeminènci de nosto raço, que la quiho au centre dóu mounde e subourdouno à la 

siéuno, tóuti li malur dis autre. L’ome se coumporto autramen que lis àutri raço dóu 

règne animau que se fan la guerro pèr subre-viéure? I’a de-segur de que se vanta 

d’aquesto qualita d’ome, de moustra à la fàci de l’univers coume un parangoun de 

couneissènço e de sensibilita. 

- Anaren pas en Americo! Courre libramen dins ti fourèst, loubo-cerviero, dis iue de 

lins. Moun malur sara pas tiéu! 

- Es uno bono causo, diguè simplamen Caliano quouro lou sachè. Esperaren uno 

óucasioun mai justo. 

E Alvar coumpren, au lóugié rauquige de sa voues, à la caresso de sa man sus la 

siéuno, qu’es d’un meme cop, urouso e tristo. 

Dos annado passèron, Caliano guidant soun camina avugle, Caliano l’ajudant à 

s’aceta infirme, dóu tèms que pèr lou mounde se multipliquèron li reüssido di cirourgian 

aquista à l’ensert d’iue d’animau. Li lins decima, loup e singe prenguèron la seguido. 

Dins li carriero di vilo, dintre li pieloun de betoun, se crousèron de regardaduro jauno, 

estràni. 

Pièi, un bèu jour que Caliano e Alvar ausisson la radiò, espeto la nouvello: 

« Lou darrié sucès de la cirourgìo dis iue: pèr rendre la visto is avugle, se saup 

pratica l’ensert dis iue uman. S’evito ansin d’ùni anoumalìo de la visioun e li treboulèri 

esteti à la seguido d’un ensert d’iue d’un animau. Li proumié sujèt oupera an ges baia de 

fenoumène de rejit. Pamens, pèr l’ouperacioun fau que l’ensertoun siegue pres sus un 

individu san e vivènt.» 

Seguisson la nouvello de la creacioun d’uno banco d’iue e un rampèu i baiaire 

voulountàri. 

- E bèn? diguè douçamen Caliano, aurai pas besoun de te racounta l’Americo, la 

descurbiras soulet, emé mis iue verd... 

E Alvar sèn qu’aquésti darrié mot soun aureoula d’un sourire. 

- Alor sara à iéu de te racounta l’Americo? Mounte es l’avantage? ié diguè en 

assajant de trouba uno voues neutro. 

- Bedigas, quouro te dise “mis iue”, es un biais de charra. Es mai poulit que de dire 

“moun iue”. De-segur que n’en gardarai un! 

- Me rassegures, ié respoundeguè emé sa voues neutro. Soulamen óublides uno 

causo? 

- E de que? 

- Moun counsentimen! 

- O, vas pas recoumença! Siéu pas un paure lins secuta, iéu. Siéu voulountàri! 

- Seriousamen, Caliano, as-ti pensa qu’un soulet moumenet poudriéu aceta aqueste 

sacrifice? 

- Vese, Moussu sarié facha d’agué un iue verd e un iue negre... Siéu regretouso, ai

èn d’autre en esca! 

- Arrèsto-te de galeja e respond-me. 

- A dire lou verai, noun, ié diguè, en leissant soun badinage. Mai desespère pas de te 

counvincre. Coumprenes pas que moun bonur lou mai grand sarié de parteja lou mounde 

emé tu? 

- Siéu pas lèst à te baia aqueste bonur! 

Es talamen pas lèst que dèu reveni, mant un cop à la cargo, jour après jour. 

- Troubariés-ti mau vengu qu’uno maire dispausèsse de sis iue pèr soun drole? 

- Noun, sènso doute, mai siéu pas toun fiéu! 

- O, souvènti-fes, un pau... 

Es de soun avejaire, amusa, mai rèn cambio à soun nàni. 

Vèn lou jour mounte, esfraiado de prouvouca uno catastrofo, ié fai subi l’esprovo de 

la crudelita. 

Lis auvàri de soun nouvèl estat d’infirme qu’à-n-éli dous, an pouscu lis aplani. Elo li 

reviéudo, lou plagnènt dubertamen d’ana dins la vido, li man sèmpre tendudo e detastoun, 

dintre lis empache invisible. Fai de mens en mens de raconte sus lis evenimen 

dóu quoutidian que, éu, pòu plus n’en aproufita. Quouro lou fai, es pèr reviha en éu lou 

regrèt pougnènt de pas pousqué vèire, pèr éu-meme, lou signe dóu soulèu sus li vièii 

pèiro de la catedralo dintre lis oumbro mouvedisso di nivo vo lou tèndre e cambiadis 

coulouriage dóu fuiage au printèms vo l’esmouvènt cambiamen di caro e di gèste, que 

n’en pòu soulamen aganta lou parla e li silènci. 

Alvar saup à quete jo s’amuso Caliano e enjusqu’aro, éu à gagna tóuti li partido. 

Emai li cop de soun amigo sieguèsson devengu lèu-lèu previsible, ié fan mau quand 

meme. Soun infirmita, à grand peno begudo à nouvèu, es aclapado coume i proumié 

tèms. De mai, ié fau lucha contro la generousita de Caliano, contre la tentacioun d’aceta 

soun ofro meravihouso. 

Nàni! Lis iue verd cambiaran pas de mèstre. Coume dos fueio bessouno plantado 

torto sus la fino ramo dóu nas, countinuiaran de lusi d’aise souto l’oumbro di ciho, dins 

lou bèu visage clar. 

Dins aquest afrountamen singulié, Alvar vèi que Caliano se maco, elo tambèn, dóu 

patimen que i’inflegis. La plan de tout soun cor. Ié dis, de-bado. Tant se pau mascado 

que siegue, Caliano desmascado, countunio de manda si cop. 

Pamens un sèr, tout bèn just à soun intrado, éu, perçaup dins sa voues uno joio 

nouvello, uno impaciènci. 

- Tè, ié diguè Caliano, metènt uno pichoto bouito de plasti dins sa man. Es pèr tu! 

Recounèis la formo e lou touca d’uno casseto. 

- De musico? Alvar ié demando. 

- Noun, vas ausi. 

Elo, la pren, e Alvar imagino li gèste precis dóu tèms que cargo lou magnetoufone. 

- Escouto, ié diguè encaro. 

Es d’abord un indicatiéu sounore mounte crèi recounèisse la “Symphonie du 

Nouveau Monde”, pièi uno voues, la voues claro e fino de Caliano. 

« Iéu Caliano C., sano de cors e d’esperit, declaro lega tre aro, un de mis iue à la

Faculta de Medecino e èstre lèsto à subi l’intervencioun cirourgicalo necito à la 

realisacioun vertadiero d’aqueste legat. Pamens, demande, es ma souleto coundicioun, 

que siegue beneficiàri d’aqueste legat, Alvar A, atualamen apriva de sa visto. Dins lou 

cas d’un nàni d’éu, declare aceta touto autro persouno coume ma legatàri. 

Fa à la banco dis iue, lou 10 de mai de 19.. » 

- Astucious! diguè Alvar emé uno voues que s’estranglo. Creses qu’anave marcha? 

- Nàni! ié venguè Caliano, pas marcha, vèire! 

Adeja s’èro buta dins la direicioun de l’eisino, butassant uno cadiero, se turtant à la 

taulo. Emé un gèste brusc, sort la bando magnetico de sa plaço, la tèn dins sa man en la 

gançaiant. 

- Pèr lou cas qu’auriés fa aqueste bestige, aro as plus ges de provo. 

Caliano bouleguè pas, ié venguè d’aise d’aise, maugrat qu’avié lou bate-cor: 

- Mai me creses tant pau ourganisado? Sache que la banco a lou tèste d’aquesto 

declaracioun, escricho e signado de ma man, emé forço tampoun óuficiau. Se me creses 

pas, podes souna eilabas. Sabes de-segur lou numerò. Es tant e tant repepia à la radiò. 

Siéu seguro que l’as retengu. 

- O, lou counèisse, lou counèisse, crido Alvar emé sa desesperanço, e que me faudra 

tout bèu just souna se sias d’acord pèr fourça ma voulounta. 

A coumpres que maugrat sa resoulucioun, s’es jamai arresta de garda d’entreteni uno 

esperanço sus lou sacrifice dis autre. 

Caliano emé un gèste devengu familié, ié caranchouno la man: 

- Perdequé te desespera d’uno tant bello amista, ié diguè Caliano, douçamen. Tóuti li 

lins d’Americo an pas agu de meiour ami que tu, que iéu, tambèn, lou sabes? E quand li 

gènt nous veiran... 

Mai Caliano s’arrèsto pudicamen, la gargamello nousado. 

Alor Alvar pren à soun tour sa man, l’empresouno dins la siéuno e repren, en éumeme, 

sèns ausa ié dire encaro: 

- Quouro li gènt rescountraran Caliano e Alvar emé sis iue parié, lusissènt de tóuti li 

rebat dóu mounde, veiran, éli tambèn, tout ço que sis iue auran encaro jamai vist.... 

Tricìo Dupuy 

*

L’espaventau 

Clavela, au mitan d’un camp, sus uno crous de bos, un paure espaventau, regardant 

dins la niue blanqueja lis estello, tablavo, pèr la sesoun nouvello, de se revenja. Soun 

maufatan de masié, avié óublida de ié faire fèsto e de lou tourna vesti, coume cade an, 

avans la nèu e li jalado. 

Pèr rescaufa soun triste mourre peginous, avié plus, contro li marrit tèms, qu’un 

capèu de féutre negre e sèns formo e, pèr se tapa, qu’uno trasso de camiso estrassado 

souto un vièi caban trauca! Fini lou plasé d’estrena ‘no camiso caudo pèr s’apara di biso 

ivernenco! 

N’avié soun proun de faire porto-esfrai, soulet, quiha sus soun pau, e de passa pèr la 

masco di masco, sourtido dis infèr dóu diable, rèn que pèr acassa li pàuris aucelet 

qu’ausarien de rapuga dins li semena. Maucoura d’aquelo vidasso, l’envejo l’avié pres 

de cambia soun ande. 

Es à la primo de mars, qu’uno ribambello de sagato ié greiè sus lou piquet tournamai 

enracina; atapa de fueio à bóudre, à l’ouro d’aro, noste espaventau coucouno un drole de 

secrèt dins sis esquino… Touto uno nisado de bouscarlo griso ié grouon dins lou nis bèn 

mouflet de soun vestoun! 

D’après un pouèmo en waloun de 

Robert Mayence 

Tèste prouvençau de P. Berengier 

Mort de Mounsegne Rivière, archevesque de-z-Ais 

Es em’uno founso emoucioun e uno grando doulour qu’avèn aprés la mort de 

Mounsegne Rivière, archevesque de-z-Ais. 

Nascu à Paris, ounte fuguè, avans de deveni evesque, curat de la glèiso de la 

Madaleno, poudèn dire d’éu qu’es esta un grand evesque prouvençau. 

Entre s’asseta sus lou trone archevescau de-z-Ais, sa pensado la mai ardènto siguè de 

metre à l’ounour la Lengo Prouvençalo e d’acouraja si prèire à se n’en servi en cadiero. 

Me souvène que, benesissènt l’estatuo de Mirèio, i Santo, s’escusè de pancaro 

pousqué prene la paraulo en prouvençau: « Mai, apoundeguè, vau aprene vosto bello 

lengo de tout moun cor, e, l’an que vèn, l’espère bèn, es en prouvençau que vous 

parlarai.» La lengo, l’aprenguè perfetamen, mai se doutavo pas, pecaire, que de l’aprene 

sus li libre e de la parla, pèr un que de neissènço n’en a pas bresiha li nuanço, fai dos 

causo. 

L’an venènt, nous counfessè sa decepcioun e apoundeguè: « Aro, lou coumprene lou 

sant evesque de Grasso quand disié: se lou Bon Diéu me dounavo à chausi entre lou 

doun di miracle e aquéu de parla la lengo prouvençalo, chausiriéu de parla la lengo 

prouvençalo.» 

MounsegneRivière tenié de manteni tóuti li tradicioun de nosto terro. Afeciouna di 

Biòu (avié segui pendènt d’annado li gràndi courso d’Espagno e couservavo

preciousamen un parèu de banderiho que Lagartigo i’avié óuferto), s’amiguè tout-d’untèms 

emé li Gardian. Chasque an, lou matin dóu 26 de Mai, simple coume lou Crist, bon 

coume lou bon pan, venié faire sa vesito au pelot de l’Amarèu, e, coume un mouloun 

d’autò, en routo pèr la ferrado, avien segui sa veituro e s’arrengueiravon davans lou mas, 

disié, galejaire, en li regardant: « L’Amarèu - Longchamp! » 

D’aqui s’anavo à la ferrado. Mounta sus uno carreto, coume tóuti, se gouspihavo de 

vèire li gardian courseja lis anouble e li santen lis arrapa, e rèn i’agradavo mai que de 

reçaupre di man dóu manadié o de l’escoussuraire lou brout d’auriho dóu premié 

bouvachoun marca. 

L’après-dina presidavo la courso, aguènt toujour remés à la coumessioun quàuqui 

bèu bihet pèr li coucardo, e restavo jusqu’au darrié. Li rasetaire, sachènt sa generouseta, 

amavon de ié pourta li coucardo enlevado. Aro s’avisaran qu’ei plus aqui. 

Fau pas óublida qu’éu s’empleguè de tout soun poudé, au moumen que li courso de 

biòu èron menaçado e que, di dous coustat, se fasié fiò di dènt, pèr que Roumo se 

prounouncièsse pas contro éli. Lou Cardinau Gasparri i’aguènt demanda soun avis ié 

respoundeguè: « Leissas moun pople s’amusa coume i’agrado: vous responde qu’aquéli 

jo soun autramen sanitous que li cafè-councert.» 

Es éu qu’a vougu vèire li Gardian escourta, à la proucessioun dóu 25 de Mai, la 

Barco di Santo e s’avançavo dins la mar quouro lou Sant-Bras di Santo la benesis. Es éu 

qu’a vougu soulenno la benedicioun di biòu de courso, dins lou plan di Santo, lou bèu 

jour de Sant Jan. 

Avié pres li Gitan souto sa prouteicioun, vesitant, chasco annado, soun campamen, li 

plaçant à l’ounour pèr pourta la Barco à la proucessioun. E lou premier an que, nouvèl 

archevesque, venguè presida li fèsto dóu 24 de Mai, vouguè bateja de si man un de sis 

enfant. 

Quau, dins la “Nacioun Gardiano”, pòu óublida aquéli soupado dóu 26 de Mai? 

Mounsegne Rivière, simplamen, afetuousamen, venié, chasque an, s’asseta à l’oustalarié 

de Madamo Courlas, à la taulo di Gardian. Aqui i’avié de catouli, de proutestant e de 

lìbri-pensaire, mai sa grandour de visto, sa bounta crestiano, sa larjour d’idèio lou fasien 

ami emé tóuti. Rèn de plus bèu que de l’entèndre parla sabentamen emé noste ami 

Audry de touto la gamo flourido di passo de capo o de mouleto. Mai lou fiò d’artifice 

d’aquéli vesprado inóublidablo èro li brinde flamejant, espetaclous, erupcioun de tóuti 

lis ancian voulcan miejournau, de Bernat de Montaut-Manse emé li responso noun mens 

flamejanto e espetaclouso de Mounsegne Rivière. 

La Glèiso, la Prouvènço e tout lou Miejour perdon un grand evesque, li Santo, li 

Gardian, li Gitan un grand ami, l’Afecioun un grand afeciouna. 

E iéu, que me siegue permés, lou cor gounfle de lagremo e de recouneissènço, de 

pausa sus soun atahut, à coustat de soun camai vióulet de prince de la Glèiso noste 

bouquet vióulet de saladello. 

F. de Baroncelli 

(Avèn pouscu reproudurre aquest manuscri gràci à la bèn-voulènci de segne Maurise 

Pezet, en quau apartèn, e à-n-aquelo de segne Felipe Bonis, qu’a douna soun 

autourisacioun en soun noum e en aquéu dis àutris eiretié. Li gramacian de soun gentun).

Cousino prouvençalo 

Tres mèisse prouvençau 

En Prouvènço, rèn èro mai emplega que la farino de cese. 

A Marsiho, èro li panisso. Dins un litre d’aigo, un pessu de sau e dos cuié d’òli, 

vuejarès 250 gramo de farino de cese, que virarés em’uno branqueto de lausié, pèr fin 

d’evita li moutas. Fau que bouligue entre 10 e 20 minuto. 

Quouro vosto bourrouleto sara lèsto, la vuejarés dins de mole plat, coume pèr de 

tarteleto. Un cop frejo, li sourtirés de si mole e li farés fregi. De dos minuto n’i’a proun. 

La cado es toulounenco. Se fai coume uno tarto.Pèr 200 gramo de farino de cese, 

vous fau mié litre d’aigo em’ un pessu de sau. Viras vosto bourrouleto. Leissas-la pausa 

uno bono ouro e passas-la dins un sedas. Apoundès mié-vèire à bourdèu d’òli e vuejas la 

pasto dins uno tourtiero. Caufas voste four e fasés-ié rabina vosto cado. 

A Touloun, la cado se vendié dins li carriero, coume se vèi sus nosto cuberto, pèr un 

dessin d’Enri Pertus. 

Enfin, la soca, qu’es de Niço, se fasié emé 125 gramo de farino de cese, mié-litro 

d’aigo, dous cuié d’òli, sau, pebre e un iòu. 

Mesclas la farino à l’aigo e à l’òli, leissas pausa lou mesclun. Vougne d’òli d’óulivo 

un plat e l’empli de vosto bourrouleto. Metre au four pèr 20 minuto. Leissas la crousto 

s’endura au goust de cadun. 

*

Nòsti dòu 

Pèr la despartido de la Rèino Viveto 

Acampa sian pèr un adiéu. La rèine Viveto nous a leissa. Un caro amigo n’es plus. 

Poudèn desenant qu’evouca l’amigo qu’avèn ama quouro, à la tèsto dóu Felibrige. Soun 

gentun ié fasié la pus bello courouno que se posque. Chausido pèr rèino dóu felibrige en 

1962 pèr lou laureat di Jo, Pau Marquion, soun reinage fuguè saluda pèr lou Felibrige 

tout entier e lou Majourau Leoun Teissier pousque escriéure: “Lou gentun encarna uno 

rèino vestido à l’arlatenco coume jamai Mistral, Baroncelli e Peyre, n’en an pouscu 

souveta de mai; 

Es dire que, dóu tèms de soun reinage, e emé joio que la retrouverian, au païs de 

Madaleno Juvenal à Castèu-Nòu-dóu-Papo, ounte, souleto femo, presidè lou regale 

óufert pèr lou Municipe, à l’óucasioun dóu Centenàri de “La Farandoulo” d’Ansèume 

Mathieu, à-z-Ais pèr la Santo-estello ounte prolounguè soun reinage en l’absènci de la 

rèino Mirèio. E noun voudriéu óublida l’ajudo que, Capoulié nouvelàri, li Jonnekin me 

proudiguèron quand se parlè de ma proumiero Santo-Estello. 

E, ma, fe, se fau pas s’estouna se devian nous rescountra souvènt, en Prouvènço 

coume au Piemount quouro, à Roure, nous retrouvarian emé Marìo Mauron, Marcèu 

Bonnet, Pau Pons e lou parèu Escallier. 

Dóu jour qu’emé Reinat venguèron planta bourdoun à Souliès, l’idèio d’un museon 

fuguè dins si plan e sian vuei espanta de ço que n’an fa: un oustau de la gràci feminino 

onte tóuti podon avaloura l’escretour de nosto civilisacioun prouvençalo. 

Vous ié retrouvaren, Viveto, retrouvaren vosto gentun, e nosto amista se souvendra di 

cènt óucasioun qu’avèn agudo de joui de vosto presènci e d’avaloura voste devouamen 

au felibrige. Coume restarias pas prefoundamen tancado dins noste cor; 

Reiné Jouveau 

A Souliés, lou 17 d’óutobre de 1994 

*

Tèste integrau 

Còpi interdicho 

Reserva pèr aquéli qu'an la licènci d'utilisacioun 

Centre International de l'Écrit en Langue d'Oc 

Sèti souciau: 

3, plaço Joffre - l3l30 Berro. 

Tóuti dre reserva - Tous droits réservés - All right reserved. 

© Centre International de l'Écrit en Langue d'Oc - l996 

© Adoubamen dóu tèste pèr Marìo-Terèso Jouveau, de la meso en pajo: Tricìo Dupuy 

e de la maqueto pèr Bernat Giély, 

en sa qualita de mèmbre dóu Counsèu d'Amenistracioun dóu CIEL d'Oc.

Lou Bessihoun - Université de Provence

Create successful ePaper yourself

Delete template?

Save as template?