Horren harira, Osakidetzaren egungo egoeraren gainean hausnartzeko bi mahaiinguru antolatu ditu: lehenengoa sindikatuekin egingo dute datorren astean, hilaren 21ean, Herriko Antzokian, 18:30ean, eta hauek izango dira hizlariak: Jose Luis Paulin (SME), Esther Saavedra (ELA), Pilar Mendia (Satse), Jesus Oñate (LAB) eta Patxi Nikolau (ESK). Osakidetzaren egungo egoeraren diagnosia egin eta etorkizunerako konponbideak izango dituzte hizpide. Martxoaren 26rako, bestalde, alderdi politikoekin ari dira mahai-ingurua lotzen. Elgoibarren diharduten alderdi politikoen mahai-inguru bat egiteko gonbidapena egin die Plataformak, honakoei: EAJ, EH Bildu, PSE eta Podemos.
EAJren adierazpena
Elgoibarko EAJ da mahai-ingurura gonbidatu duten alberdietako bat, baina gonbidapenari uko egitea erabaki dute, eta honako adierazpena kaleratu dute erabakia arrazoituz:
Eusko Legebiltzarrerako hauteskundeen bezperan, 24/7plataformaren gonbidapena jaso dugu mahai-inguru edo eztabaida publiko bat egiteko, kanpaina bezperan, Osakidetzari buruz eztabaidatzeko. Horretarako, gure udalerrian bizi diren (edo bizi ez diren) pertsonak gonbidatzeko aukera proposatu digute. Hauteskundeak baino bi aste eta erdi lehenago. Kanpaina ofizialki hasi baino 9 egun lehenago.
Eskerrik asko, baina gonbidapenari uko egitea erabaki dugu. Erabaki horren arrazoiak argiak dira. EAJ-PNV Euskal Herritik bertatik sortutako alderdi politikoa da, herriak eman dio legitimitatea eta herriak jarri du guztion autogobernua gidatzeko erantzukizunean denbora honetan guztian. Horregatik guztiagatik, gure alderdia mugimendu politiko erabat demokratikoa izan da, herritar guztien giza eskubideak errespetatzen dituena eta jendearekin eta gizarte antolatuarekin etengabe hitz egiten duena, herritik sortu ginen eta herriari Zoe gara. Hala ere, sentitzen dugu adieraztea planteatzen diguten proposamena ez dela jendearekin izandako elkarrizketa espontaneo eta natural batetik sortzen, baizik eta edozein elgoibartarrek antzeman dezakeen bezala, alderdi jakin baten estrategiaren barruan kokatzen dela, hau da, EAJren gobernuaren eta PSEren arteko kudeaketaren etengabeko irudi onaren kontrako, kaltetze eta gutxiespeneko estrategia batetik abiatuta herri honen alternatiba bihurtu nahi duen alderdiaren estrategian.
Ez da beharrezkoa oso urruti joatea (uztailaren 18an, beste hauteskunde batzuetatik 5 egunera); izan ere, modu ez oso ortodoxoan eta inolako inpartzialtasunik gabe, ordutegiaren murrizketa hipotetikoei, osasun-zentroko solairu bakarra irekitzeari edo Elgoibarren ohikoak baino osasun-langile gutxiago edukitzeari lotutako mamuak eta beldurrak zabaldu ziren. Teorian diogu, ez zen eta horrelakorik gertatu. Beraz, ez, ez dugu parte hartuko EH Bilduren interes eta estrategiari soilik erantzuten dioten eztabaida eta formatuetan, eta gaitzetsi egiten dugu pertsona batzuek gurea bezalako gizarte demokratiko eta aske batean gizarte-mugimenduez eta kezka guztiz legitimoez egiten duten instrumentalizazio partidista. Gauzak argudio arrazoituekin eta fede onez eztabaidatzeko, hurrengo euskal hauteskundeetako kanpainan daukagu.
Izan ere, apirilaren 21ean aukera paregabea ematen digu Euskadirentzat nahi dugun etorkizunari buruz eztabaidatzeko, eta, jakina, honek, Osakidetzaren beharrezko hobekuntza barne hartzen du, baita ekonomiaren kudeaketa, hezkuntza, azpiegitura-politika edo memoria-politikak ere. Gai horiek ez dira soilik tokikoak, eta ezin dira zatikatuta egon; aitzitik, ordena nazionalekoak izan behar dute, eta sentsibilitate politiko bakoitzeko herrialde-ikuspegi orokorretan kokatu behar dira. Eztabaida hori oso garrantzitsua da, eta, horregatik, guztientzako baldintza berdinetan eta formatu neutraletan egin behar da, alderdikeriarik gabe, nork bere ideiak eta proiektuak kontrastatzeko beharra bidegabeki baldintzatzen edo pozoitzen duen sesgorik gabe.